“Mujye ikuzimu”, igisubizo Perezida Kagame aha abamutwaza igitugu

  • NTAWITONDA JEAN CLAUDE
  • Mutarama 14, 2024
  • Hashize amezi 2
Image

“Ku rwego rwanjye rimwe na rimwe hari ubwo nitwararika ariko ni isomo nize kera, nabyanze kuva kera, rwose njye namaze no kwigomeka. Mbwira uwo ari we wese utekereza ko yambwira ibyo gukora, uko iki gihugu gikwiye kumera, ndababwira ngo mujye ikuzimu…”

Perezida wa Repubulika y’u Rwanda Paul Kagame yakomoje kuri ubwo buhamya bwe, mu ijambo yagejeje ku bitabiriye amasengesho ngarukamwaka yo gusengera Igihugu no gushima Imana, yabaye kuri iki cyumweru tariki ya 14 Mutarama 2024.

“Go to hell” cyangwa se “Jya ikuzimu” ugenekereje mu Kinyarwanda ni imvugo ikoreshwa n’umuntu wanze kwemera ibyo umusabye kandi arakaye.

Perezida Kagame yavuze ko kwanga gukoreshwa cyangwa kuyoborwa bishingiye ku kuri yamenye ko ntawushobora guhindura icyerekezo cy’ubuzima bwawe.

Yavuze ko aho u Rwanda rugeze nyuma y’imyaka ikabakaba 30 ruhuye n’ibyago bikomeye rukabura urutabara, hashingiye ku mahitamo y’Abanyarwanda, atari ibyemezo by’undi uwo ari we wese.

Yagarutse ku buryo ibihugu byo mu Majyepfo y’Isi (Global South) bikennye kandi ari byo bitunze byinshi, ahubwo ibyo mu Majyaruguru y’Isi (Global North) bifite imitungo kamere mike bikaba bikize.

Ati: “[…] Ayo ni yo mahitamo navugaga. Ukwiye gufata amahitamo, niba ushaka kubaho nk’umucakara cyangwa nk’umuntu utagira agaciro. None se imyumvire dukwiye kugira ko tureshya, waba ubyizera utabyizera turareshya imbere y’Imana, kuki utagira amahitamo mazima?”

Yasabye buri wese kubyanga byaba na ngombwa akigomeka mu gihe hari abagerageza kumuhitiramo uko abaho ubuzima bwe, ariko anibutsa ko gukorana n’abandi no kumvikana na bo mu byubaka ari ingirakamaro.

Perezida Kagame yakomeje agira ati: “Mbivuga nkomeje ntitaye aho waba uvuye hose, ariko uramutse ufite igitekerezo cyiza gitandukanye n’icyanjye ndakumva. Aho dushobora kugirana ikiganiro ariko sinzigera mfata itegeko ry’uwo ari we wese, mpereye ku byo batekereza ko ari bo beza kuturusha twese.”

Perezida Kagame yakomeje agaragaza ko icyifuzo cye ari uko buri wese yabaho atemera ubusumbane n’akarengane, akamenya gutega amatwi abafite ibitekerezo byubaka bitandukanye n’ibye atemera kugaraguzwa agati.

Yaboneyeho kugaragaza ko mbere ya byose guharanira amahoro ari cyo kintu cy’ingenzi kandi ko buri wese ayakeneye ndetse akwiye guhitamo kuyakorera.

Ati: “Amahoro kutaboneka adutwarira n’abacu batagira uko bangana. Ubwo rero ni ukuvuga ngo turayakeneye cyane, tugomba kuyakorera. Kuyakorera ni uguhitamo neza. Ni ugukomera, uguteye iwawe ukamenya kwitabara. Ni ugukora tugakoresha ibyo dufite, tugakoresha ibyo dushobora kuvana mu bandi dukorana, hanyuma no kwanga gukorerwamo cyangwa gukoreshwa.”

Muri ubwo butumwa, Perezida Kagame yashimangiye ko izo mpanuro urubyiruko rukwiye kuzumva by’umwihariko kuko bazaba ari bo bayobozi mu gihe kizaza.

Ati: “Igihe muzaba ari mwe muri ku isonga, muzagaragaze ko amateka yacu, amasomo yari ari muri ayo mateka, atapfuye ubusa mufite icyo mwize, bityo n’abandi bazaza inyuma yanyu namwe abe ari bwo burere muzaba mubahaye. Na ho kubaho mu buryo bw’ubugwari butagira inzira ntabwo ari byo.”

Yavuze ko umugambi w’Imana mu kurema abantu utari uwo kugira ngo bamwe bazabe basumba abandi bityo ntawukwiye kwemera ubusumbane n’akarengane ako ari ko kose.

Aya masengesho ngarukamwaka yitabiriwe n’abayobozi mu nzego zinyuranye, abayobozi b’amadini n’amatorero ndetse n’abatumirwa baturutse mu bice bitandukanye by’Isi.

Mu batumirwa baturutse hanze y’u Rwanda harimo abavuye muri Benin, Botswana, Ethiopia, Gabon, Kenya, Nigeria, Sudani y’Epfo, Tanzania, Uganda, Leta Zunze Ubumwe z’Amerika (USA) no muri Zimbabwe.

  • NTAWITONDA JEAN CLAUDE
  • Mutarama 14, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE