Muhanga: Yemereye urukiko kwiba uruganda rw’Abashinwa toni 70 za sima

  • Imvaho Nshya
  • Nzeri 26, 2023
  • Hashize amezi 8
Image

Kuri uyu wa Kabiri, Urukiko rw’Ibanze rwa Nyamabuye rwatangiye kuburanisha Kabega Harindintwali Ignace, Habagusenga Uzzia na Kabanza Richard bakekwaho kwiba toni zirenga 70 za sima mu ruganda rw’Abashinwa Anjia Prefabricated Construction Rwanda Company Ltd.

Kabega Harindintwali Ignace yemereye urwo rukiko ruherereye mu Kagari ka Gitarama, Umurenge wa Nyamabuye mu Karere ka Muhanga ko ari we wanogeje umugambi wo kwiba urwo ruganda akanawushyira mu bikorwa yifashishije ikoranabuhanga.

Byatumye tariki ya 23 Kanama 2023 anyereza imifuka 1400 ingana na toni 70, akoresheje uburiganya, bityo  we na Uzzia Habagusenga wamushakiye abakiliya akaba yarananyuzwagaho amafaranga yacurujwe bakaba bakurikiranyweho icyaha cyo kwihesha ikintu cy’undi mu buriganya.

Kabanza Richard bafungiwe idosiye imwe we akurikiranyweho icyo kudatanga amakuru ku cyaha kirimo gukorwa.

Perezida w’iburanisha yabajije abaregwa niba bemera icyaha, Kabega Harindintwali Ignace yemera ko yacuze umugambi asaba imbabazi, ndetse anavuga impamvu yamuteye gukora icyaha.

Yagize ati: “Njyewe nahoze nikorera baranyiba ndakena; ibyo nakoze byose nabikoreshejwe n’inzara, ubusanzwe ngira Kompanyi y’ikoranabuhanga yitwa IT Coordinator Terra Phram, nkaba ndi Umuyobozi Mukuru; nasabye amakuru ku ruganda mvugana n’Umushinwa ampa uwitwa Leonce ukora mu ruganda (Sales Manager) dukora ibyo byose ndetse tariki ya 23 Kanama 2023 namenyeshejwe ko tariki ya 24 Kanama 2023 barazizana, Uzzia Habagusenga anshakira umuguzi wo kuzigura baranavugana ziranatwarwa.”

Habagusenga Uzzia yabajiwe niba nta ruhare yagize mu gutegura umugambi wo kwihesha ikintu cy’undi avuga ko we nta cyaha yakoze, ahubwo ko yasabwe gushaka abaguzi ba sima amaze kwemererwa ko azahabwa amafaranga y’u Rwanda angana na miliyoni imwe y’ubukomisiyoneri.

Yagize ati: “Njyewe nahawe akazi ko gushaka uwagura sima za Kabega, nta kindi twigeze tubiganiraho kandi nk’umuntu uhuza abaguzi n’abagura nagombaga guhabwa ikiguzi cya miliyoni. Ibijyanye no kuba naragize uruhare mu kwihesha ikintu cy’undi ntabyo nigeze nkora kuko ntabwo nigeze njya kwaka sima mu ruganda”.

Perezida w’iburanisha yamubajije impamvu amafaranga yagurishijwe sima yacishwaga kuri konti ye, avuga ko nubwo amafaranga yacishwaga kuri konti ye yahitaga ayoherereza nyiri sima.

Ati: “Ni byo amafaranga yanyuraga kuri konti yanjye kuko sinari kumwe na Kabega ariko munarebye neza nahitaga nyamuha nanjye nkayivanaho.

Kabanza Richard ureganwa na bo yabajijwe impamvu atamenyesheje inzego amakuru y’ikorwa ry’iki cyaha, avuga ko yatse akazi Kabega wacuze uyu mugambi amubwira ko agiye kukamuha birangira amuhaye ako gucunga ububiko atigeze amenya ibyarimo.

Ubushinjacyaha bwasabiye Kabega Harindintwali Ignace igifungo cy’imyaka 3  no gutanga ihazabu ya miliyoni 5 z’amafaranga y’u Rwanda naho Uzzia asabirwa igifungo cy’imyaka 2 n’ihazabu y’ibihumbi 500 nyuma yo kugaragaza ibimenyetso bishimangira impamvu bakurikiranyweho icyaha cyo kwihesha icyundi mu buriganya.

Kabanza Richard we yasabiwe gufungwa imyaka ibiri n’ihazabu y’Ibihumbi 500 ku cyaha cyo kudatanga amakuru y’icyaha kirimo gukorwa, hashingiwe ku Itegeko Nº68/2018 ryo ku wa 30 Kanama 2018 riteganya ibyaha n’Ibihano muri rusange ari naryo ubushinjacyaha bwahereyeho bubasabira ibihano.

Kabega atewe inkeke n’impungure zo mu igororero

Me Rubasha Ignace wunganira Kabega Ignace yasabye urukiko kwakira ubusabe bw’uwo yunganira kuko nubwo yakoze icyaha akwiye gufashwa agasubikirwa igihano nk’uko yabisabye kuko agowe n’impungure ziribwa n’imfungwa n’abagororwa ndetse akaba afite uburwayi bwa Diyabete n’umuvuduko ariko kandi bakanibuka ko atigeze agora ubutabera akemera icyaha.

Me Tuyisenge Theophile na Me Niragire Rachel bunganira Uzzia Habagusenga, bavuga ko umukiliya wabo nta sima yakuye mu ruganda ahubwo yahawe akazi ko gushaka umuguzi wa sima ya Kabega ari na we wayikuriye mu ruganda kandi mu kirego cy’uruganda ntaho uwo mukiliya wabo agaragara.

Banavuga kandi ko Kabega yivuguruza ashinja abo bari kumwe mu rubanza, ubundi ugasanga arabashinjura ugendeye ku nyandikomvugo  yo ku itariki ya 11 Nzeri n’iyo ku ya  16 Nzeri 2023 zakorewe imbere y’ubugenzacyaha n’ubushinjacyaha.

Inyandiko yo ku  ya 11 Nzeri yemeza uko yateguye umugambi wenyine mu gihe iyo ku ya 16 Nzeri avuga ko yafatanyije na bagenzi be.

AKIMANA JEAN DE DIEU

  • Imvaho Nshya
  • Nzeri 26, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE