Muhanga: Urubyiruko rwasabwe gushyira imbere ubumwe bw’Abanyarwanda

  • NTAWITONDA JEAN CLAUDE
  • Mata 8, 2022
  • Hashize imyaka 2
Image

Ubuyobozi b’Intara y’Amajyepfo bwifatanyije n’abaturage b’Umurenge wa Nyarusange mu Karere ka Muhanga kwibuka ku nshuro ya 28 abazize Jenoside yakorewe Abatutsi mu 1994, by’umwihariko urubyiruko rusabwa kugira uruhare mu bumwe bw’Abanyarwanda.

Ni umuhango watangijwe no kunamira no gushyira indabyo aharuhukiye imibiri y’abazize Jenoside yakorewe Abatutsi.

Guverineri w’Intara y’Amajyepfo yagize ati: “Urubyiruko murasabwa kugira uruhare rugaragara mu kubaka u Rwanda twifuza kandi rushyira imbere ubumwe bw’Abanyarwanda, kugira ngo twese hamwe dutere imbere”.

Mu kiganiro ku nsanganyamatsiko “Kwibuka twahisemo kuba umwe”, sheikh Kajeguhakwa Ismaïl, yerekanye iby’ingenzi byashenye ubumwe bw’Abanyarwanda, kugera kuri Jenoside yakorewe Abatutsi mu 1994, n’uburyo u Rwanda rwiyubatse nyuma ya Jenoside.

Yavuze ko icyashenye ubumwe bw’Abanyarwanda ku isonga ari ubukoloni bwaciyemo ibice Abanyarwanda nyamara Abanyarwanda barahoze bunze ubumwe, agaragaza uburyo byagiye bikura babyinjiza mu Banyarwanda kugeza muri 1994, ubwo Abatutsi bahizwe bukware bakicwa urubozo muri Jenoside.

Sheikh Kajeguhakwa yakomeje kandi akangurira urubyiruko by’umwihariko gusigasira ubumwe bw’Abanyarwanda hagamijwe icyateza imbere Umunyarwanda wese nta vangura.

Guverineri w’Intara y’Amajyepfo Kayitesi Alice, yashimiye abarokotse Jenoside yakorewe Abatutsi, ku butwari bagaragaje n’uruhare rwabo muri gahunda z’ubwiyunge no gutanga imbabazi, ubu imanza nke akaba ari zo zisigaje kurangizwa, kandi inyinshi zikaba zararangijwe kubera imbabazi z’abarokotse.

Umuyobozi w’Akarere ka Muhanga Kayitare Jacqueline yagaragaje ibirimo gukorwa bigamije kurushaho kwimakaza ubumwe n’ubwiyunge (Foto Akarere ka Muhanga)

Guverineri yashimye kandi Ubuyobozi bw’Igihugu bwatumye twongera kwibuka nyuma y’ibihe bigoye by’icyorezo cya COVID-19 anashima abaturage uruhare bagize mu kuyirwanya, harimo no kwikingiza, anasaba abatarikingiza kubikora kugira ngo dukomeze ubuzima busanzwe.

Ahumuriza Abarokotse Guverineri Kayitesi yabwiye Abarokotse Jenoside yakorewe Abatutsi ko bafite Igihugu na Leta ishyize imbere ubumwe n’uburenganzira bwa buri wese, aboneraho gusaba buri wese guharanira ko Jenoside itazongera kubaho ukundi, bashyira imbere ubumwe.

Guverineri yasabye abari aho kwiyemeza ko Jenoside itazongera kuba ukundi, huubakwa ubumwe nk’uko insanganyamatsiko ibivuga, abasaba kwitabira ibikorwa byose byateguwe, kwirinda ibihuha n’ibindi bikorwa byose bihembera amacakubiri cyangwa ingengabitekerezo ya Jenoside.

Mu gusoza yasabye urubyiruko nk’imbaraga z’Iguhugu kwigira ku mateka yaranze Igihugu, bakabungabunga ubumwe bw’Abanyarwanda kandi bagakomeza kugira uruhare rufatika mu bikorwa byo kubaka Igihugu.

Meya w’Akarere ka Muhanga Kayitare Jacqueline mu ijambo yagejeje ku bitabiriye kwibuka ku nshuro ya 28 Jenoside yakorewe Abatutsi mu 1994, yagarutse ku mateka ya Jenoside yakorewe Abatutsi i Muhanga, n’i Nyarusange by’umwihariko.

Yanagaragaje ibirimo gukorwa n’Akarere mu rwego rwo kuba hafi abayirokotse n’ibigamije kurushaho kwimakaza ubumwe n’ubwiyunge.

  • NTAWITONDA JEAN CLAUDE
  • Mata 8, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE