Muhanga: Umwana w’imyaka 16 yarohamye muri Nyabarongo arabura

  • Imvaho Nshya
  • Nzeri 22, 2023
  • Hashize amezi 8
Image

Umwana witwa Ishimwe Herve uri mu kigero cy’imyaka 16 ari mu bana bane barohamye bagiye kurema isoko ry’ahitwa  ku Cyome, mu Murenge wa Gatumba mu Karere ka Ngororero, ariko we akaba yaburiwe irengero mu gihe bagenzi be barohowe.

Ayo makuru yemejwe n’abaturage baturiye aha bakavuga ko abo bana barohamye tariki ya 20 Nzeli 2023, batatu muri bo bakarokorwa n’umwana wahiraga ubwatsi ariko Ishimwe we bikarangira abuze.

Murenzi Appolinaire avuga ko aya makuru ari ukuri abana batatu bagiye koga batwarwa n’amazi,  umwe arabura ariko batatu bo bararohorwa.

Yagize ati: “Ni byo rwose abana bararohamye batwawe n’amazi ya Nyabarongo umwe arabura abandi barohorwa n’umusore wahiraga ubwatsi”.

Umunyamabanga Nshingwabikorwa w’Umurenge wa Rugendabali Gihana Tharcisse, avuga ko aba bana bane baremye isoko ryo ku Cyome bavuyeyo bajya koga muri Nyabarongo maze urugomero rurekura amazi aza ari menshi arabatwara.

Yagize ati: “Aba bana baremye isoko ryo ku Cyome tariki ya 20 Nzeri 2023 bavuyeyo bakora urugomo bajya kwidumbaguza mu ruzi rwa Nyabarongo ariko urugomero rw’amashanyarazi rurekura amazi menshi abasangamo ahita abatwara ariko ku bw’amahirwe hari unusore wahiraga arohora 3 naho undi umwe atwarwa n’amazi turamubura”.

Akomeza avuga ko guhera igihe batwarwaga n’amazi twahise dutangira gushaka uyu mwana ndetse dusaba Imirenge  dutaranye yadufasha kureba niba twamubona Nyabarongo yamurekuye tukamubona.

Yagize ati: “Kuva umwana yatwarwa n’amazi ya Nyabarongo twaramushatse turamubura n’ubu turacyamushaka kandi twanifashishije Imirenge yo mu Karere ka Ngororero ndetse na Muhanga kugira ngo turebe ko Nyabarongo yamurekura tukamubona”.

Asaba abaturiye umugezi wa Nyabarongo kumva ko amazi nta nkomere agira bakayitondera atabambura ubuzima.

Aba bana bakomoka mu Murenge wa Mushishiro ho mu Kagari ka Rukaragata mu Mudugudu wa Kamurekezi, ariko abana bakaba bararohamiye mu ruhande rw’Umurenge wa Rugendabari ho mu Kagali ka Nsanga mu Mudugudu wa Nyundo.

Abaturage barasabwa kwitondera uyu mugezi wa Nyabarongo kubera ko iyo urugomero rwa Nyabarongo rurekuye amazi anateza imyuzure  mu gishanga inyuramo.

AKIMANA JEAN DE DIEU

  • Imvaho Nshya
  • Nzeri 22, 2023
  • Hashize amezi 8
TANGA IGITEKEREZO
Joselyne Mucunguzi Izere says:
Nzeri 22, 2023 at 9:12 pm

Birababaje cyane!

Andika igitekerezo

AMATEGEKO AGENGA IYANDIKA RY'IGITEKEREZO CYAWE