Muhanga: Ubumenyi buke butuma ba Mudugudu bakora raporo zuje amarangamutima

  • Imvaho Nshya
  • Ukwakira 30, 2023
  • Hashize amezi 7
Image

Bamwe mu bakuru b’Imidugudu bavuga ko ubumenyi buke bwatumaga batabasha gukora neza raporo z’abakekwaho ibyaha birimo n’ihohoterwa rishingiye ku gitsina n’irikorerwa abana.

Ibi babigarutseho ubwo hasozwaga ubukangurambaga bwateguwe n’Urwego rw’Igihugu rw’Ubugenzacyaha (RIB) mu kwibutsa uruhare rw’abayobozi bw’Inzego z’ibanze ku gukumira ihohoterwa rishingiye ku gitsina n’irikorerwa abana, hagamijwe kubibutsa inshingano zabo mu gukora raporo zirimo amarangamutima yo gukingira ikibaba abakoze ibyaha birimo n’ihohoterwa.

Munyankindi Thomas avuga ko amahugurwa bahawe yaberetse ko hari igihe bakora amakosa aturuka ku bumenyi buke bwo gutanga raporo z’abakora ibyaha.

Yagize ati: “Amahugurwa twahawe yatweretse ko hari ibyo twajyaga dukora nabi kubera ubumenyi buke ndetse ugasanga turavangavanga abazagenza icyaha ku wagikoze kubera raporo zidaciye mu mucyo twabakoreraga kubera bwa bumenyi buke”.

Musanabera Philidaus avuga ko bigoye gukorera raporo umuntu mubana mu Mudugudu akenshi usanga yakoze icyaha mufitanye isano akemeza ko amasano n’ubucuti byatumaga raporo zitangwa zigenda zitavuga neza ibyabaye.

Yagize ati: “Ni byo twahuguwe kandi tubonye ubumenyi buzadufasha ariko biba binagoye ko wakorera umuntu raporo igaragaza ko yakoze icyaha akenshi usanga tunaturanye, dusangira kandi tunafitanye amasano ariko twigishijwe ko tugomba kwirinda amarangamutima tugakorera abaturage bacu batugiriye icyizere cyo kujya tubakiza impagarara no kujya inama”.

Murengezi Simon avuga ko amahugurwa bahawe yajya ahoraho kuko bigishijwe uko bajya batanga raporo z’ibyaha by’ihohoterwa bikorerwa mu muryango ndetse bigishijwe uko bakwiye kwirinda kuganzwa n’amarangamutima bagakorera abaturage babagiriye icyizere.

Yagize ati: “Turifuza ko aya mahugurwa yajya ahoraho kuko twajyaga twirwanaho mu gutanga raporo z’ibyaha bikorerwa iwacu mu Mudugudu ariko tunibukijwe ko twakwirinda amarangamutima ku bakoze ibyaha tugafasha abakorewe ihohoterwa cyangwa ibindi byaha byose byangiza ituze ry’abaturage tubana mu mudugudu”.

Umunyamabanga Nshingwabikorwa w’Umurenge wa Mushishiro, Mukayibanda Prisca avuga ko aba bayobozi b’Inzego z’ibanze mu mudugudu bakwiye amahugurwa ahoraho kuko ubumenyi buke bushobora gutuma bakora amakosa ariko iyo ufite ubumenyi bukuyobora gukora neza inshingano wahawe.

Umukozi wa RIB mu ishami rishinzwe gukumira no kurwanya ibyaha, Mwenedata Philbert avuga ko Umukuru w’Umudugudu afite inshingano zo gukorera abaturage kandi bakirinda ibyatuma bayobya abagenzacyaha mu gihe barimo kugenza icyaha ku muntu wakoze icyaha.

Akomeza yibutsa ko raporo ikozwe nabi ituma ubutabera bwagombaga gutangwa budatangwa neza kuko umugenzacyaha aba yabeshye uko icyaha cyakozwe ariko raporo yakozwe neza ituma ubutabera butangwa neza.

Muri ubu bukangurambaga abayobozi bo mu Nzego z’ibanze bahuguwe uko batanga raporo k’uwakorewe icyaha ndetse banahuguwe ku bijyanye n’ibyaha by’ihohoterwa bikorerwa abana nuko byakwirindwa.

AKIMANA JEAN DE DIEU

  • Imvaho Nshya
  • Ukwakira 30, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE