Muhanga: Sosiyete z’ubwishingizi bw’ibihingwa n’amatungo zirashinjwa gutinda kwishyura

  • Imvaho Nshya
  • Nzeri 24, 2023
  • Hashize amezi 8
Image

Bamwe mu bahinzi n’aborozi bo mu Karere ka Muhanga bavuga ko hashize ibihembwe bigera kuri bibiri bategereje amafaranga yo kubagoboka, kubera ko barumbije ndetse n’amatungo yabo yapfuye baratanze ubwishingizi bw’imitungo yabo.

Mu kiganiro n’Imvaho Nshya bahamya ko bidakwiye kuko Kompanyi zitanga ubwishingizi zimaze hafi amezi 8 zitabaha amafaranga babariwe yo kubashumbusha, kuko batejeje neza kandi hari n’amatungo yabo yapfuye.

Rurangwa Theodomir avuga ko bibabaje kubona Kompanyi y’Ubwishingizi ikangurira abahinzi n’aborozi gutanga ubwishingizi itungo ryapfa bagatinda kumwishyura.

Yagize ati: “Njyewe mba nibaza ukuntu tuganira n’izi Kompanyi zitanga ubwishingizi zitwizeza kudutabara ku gihe, mu gihe twahuye n’ibindi bibazo bituruka ku mfu z’amatungo ndetse n’ibihingwa byatangiwe ubwishingizi ariko ukaba ushobora kumara umwaka utarabona n’utwo duke bemera kuguha”.

Karimunda Eugene yunzemo ati: “Iyo badusaba ko dutanga ubwishingizi batubwira ko buzadutabara niduhura n’ibiza cyangwa ntitubashe kubona umusaruro ukwiye ariko iyo duhuye n’ibibazo ubwishingizi dutanga usanga sosiyete zabuduhaye zitihutisha ibikorwa byo kutwishyura.

Biratinda nkubu hari amafaranga yo mu gihembwe cy’ihinga 2022A tutigeze tubona urumva ko umwaka ugiye gushira dutegereje ahubwo se duhinze tukarumbya imyaka itatu yikurikiranya twakwishyurwa gute kimwe n’abatanga ubwishingizi bw’amatungo nabo ntibabona amafaranga ku gihe rwose badutabare”.

Umuyobozi wa Koperative y’Abahinzi borozi ba Ndiza (COIABNDI) Mwambari Anastase, avuga ko bahinze ibigori mu mwaka ushize none bamaze amezi arenga 10 batarahabwa ingurane.

Yagize ati: “Tumaze amezi arenga 10 tutarabona amafaranga yacu y’inyishyu ku bwishingizi bw’ibihingwa byacu twatanze tukarumbya ibindi bikangizwa n’ibiza, ariko tukibaza ngo harya kuki batunaniza, batubwira ko bibanza kujya i Kigali kandi ni bo bagena agaciro k’ibyo bazatwishyura ntabwo babitubwira mbese bameze nk’abatugenera amafaranga bazaduha”.

Umuyobozi w’Akarere ka Muhanga wungirije ushinzwe Iterambere ry’Ubukungu, Bizimana Eric avuga ko iki kibazo bakibonye ariko bagiye gukurikirana.

Ati: “Ni byo iki kibazo twarakibonye kandi abahinzi n’aborozi batweretse ko batanga ubwishingizi ku bihingwa ndetse n’amatungo bagira ikibazo amatungo agapfa cyangwa ibihingwa byabo byakwangizwa n’ibiza bakabura umusaruro, kompanyi zibaha ubwishingizi zitinda kubaha ubwishyu tugiye kubikurikirana kugira ngo bishyurwe kandi binatume abandi babona ibyiza byo gutanga ubwishingizi ku bihingwa n’amatungo byabo”.

Yongeyeho ko umuturage adakwiye gutegereza igihe kirekire ku buryo yajya guhinga ibindi bihingwa adafite imbuto cyangwa ngo azikopeshe ifumbire kandi ubwishingizi bwagombye kuba  bwaramushumbushije mbere akabyigurira.

Umuyobozi w’Ishami rishinzwe ry’Ubwishingizi bw’ibihingwa n’amatungo muri SONARWA, Rwakazina Olivier avuga ko impamvu zituma abaturage batabona amafaranga babariwe bituruka ku kuba abahinzi bagomba kwishyurwa biturutse ku mapfa cyangwa ibiza byatwaye imyaka yabo kandi ibyishyurwa byose bikorerwa ku biro bikuru.

Akomeza yemeza ko hari abahinzi cyangwa amakoperative ashobora gutanga imyirondoro yabo nabi bigatuma hafatwa igihe cyo kubikosora, hari n’igihe kwishyurwa bitinze bikomoka mu nzira amafaranga anyuzwamo kuko buri wese usaba ubwishingizi yishyurirwa mu Murenge Sacco kandi nayo ibanza kwaka amafaranga akava muri Banki z’ubucuruzi bityo rero ikosa ryakorerwa muri Sacco batariryozwa.

Yongeraho ko umuhinzi cyangwa koperative yabariwe ntiyishimire ibyakozwe yandikira sosiyete yamuhaye ubwishingizi akamenyesha Minisiteri y’Ubuhinzi n’Ubworozi MINAGRI kugira ngo bamurenganure.

Ubwishinzi bw’amatungo butangwamo na Nkunganire ingana na 40% naho nyiritungo atanga 60% bw’ubwishingizi haba ku nka, ingurube n’inkoko.

Kugeza ubu Sosiyete zitanga ubwishingizi ku bihingwa n’amatungo harimo SONARWA, Radiant, Prime na Banki ya Kigali.

AKIMANA JEAN DE DIEU

  • Imvaho Nshya
  • Nzeri 24, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE