Muhanga: Perezida wa The Winners yatanze ingwate ya miliyoni 250 ngo afungurwe

  • AKIMANA JEAN DE DIEU
  • Ukuboza 21, 2023
  • Hashize amezi 5
Image

Urubanza rw’abakurikiranyweho guhindura imyirondoro y’abahinduye amatariki y’amavuko y’abana hagamijwe ko bajya mu ishuri ry’umupira w’amaguru rya Bayern Munich baburanye ku ifunga n’ifungurwa ejo hashize, Perezida wa Winners Nshimiyimana David yashatse gutanga ingwate ya miliyoni 250 ngo afungurwe, ariko ubushinjacyaha bubasabira gukomeza gufungwa iminsi 30.

Ni urubanza rwatangiye kuburabishwa ku ifungwa n’ifungurwa aho umutoza w’abato Mukandamage Antoinette na Mberarivuze Pierre wari umukozi ushinzwe Irangamimerere mu Murenge wa Kibirizi mu Karere ka Nyamagabe baburanye bemera icyaha.

Nshimiyimana David n’abandi bane barimo Munyampundu Denys, Hakizimana Octave, Nshimiyimana Daniel, Munyampundu Jean aba bose baburana bahakana ibyaha bakurikiranyweho, bagasaba kurekurwa bakaburana bari hanze bakavuga ko ibyakozwe nta ruhare babigizemo.

Ku ruhande rwa Perezida wa The Winners Nshimiyimana David, yasabye urukiko kumurekura akaburana ari hanze ndetse yemeza ko yatanga ingwate irimo imitimungo itimukanwa ndetse n’amafaranga ari kuri konti ye byose bifite agaciro ka miliyoni zisaga 250 z’Amafaranga y’u Rwanda agakurikiranwa ari hanze, akanemeza ko atakwica iperereza riteganywa gukorwa n’ubushinjacyaha.

Me Joseph Twagirayezu Mico avuga ko bitewe nuko umukiliya we yatanze ingwate akwiye kurekurwa akaburana ari hanze. atazica iperereza rigaragazwa n’ubushinjacyaha bushaka gukora mu Turere twakorewemo icyaha ndetse n’Urwego rucunga umupira w’amaguru mu Rwanda.

Akemeza ko ingwate yatanzwe yaba ikimenyetso cyiza cyuko atazacika ubutabera kuko hari n’abandi bemeye kumwishingira kugira ngo arekurwe.

Undi witwa Habineza Vincent de Paul wafatiwe i Nyamagabe muri iyi dosiye agaragaza ko hari amafaranga yakiriye inshuro 14 zihwanye n’amafaranga y’u Rwanda ibihumbi 520.

Nubwo yemera gutanga iyo ngwate, Ubushinjacyaha bwamusabiye gufungwa iminsi 30.

Ubushinjacyaha busabira aba bose uko ari 7 bafashwe gukomeza gufungwa iminsi 30 kugira ngo rubashe gukomeza gukora iperereza ku byaha bubakurikiranyeho bose ndetse bukamenyesha ko bushaka gukora iperereza mu Karere ka Muhanga no mu Karere ka Nyamagabe ndetse no muri Ishyirahamwe ry’Umupira w’Amaguru mu Rwanda (FERWAFA).

Bwemeza ko babakurikiranyweho ibyaha bigaragaza inzandiko zitavugisha ukuri zakoreshejwe mu byangombwa ubwo hatoranywaga abagombaga kwinjira mu ishuri ry’Umupira w’amaguru rya Bayern Munich.

Abo bana batatu harimo uwitwa Hakizimana Denys yahinduriwe imyirondoro ahabwa ko yavutse ku itariki ya 30 Kanama 2012 mu gihe itariki nyayo yerekana ko yavutse tariki ya 22 Kanama 2007 naho Nkurunziza Jean Baptiste bamuhaye imyirondoro yuko yavutse tariki ya 25 Ugushyingo 2012 kandi yaravutse tariki ya 22 Kanama 2007, undi mwana kandi yitwa Niyonkuru Eric yavutse 2006 ariko bamuhaye ko yavutse tariki ya 25 Ukwakira 2011.

Uru rubanza ruzasomwa tariki ya 27 Ukuboza 2023 saa munani.

  • AKIMANA JEAN DE DIEU
  • Ukuboza 21, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE