Muhanga: Nzabonimana yaguraga isabune akayitwara mu mufuka ngo umugore atayogaho

  • AKIMANA JEAN DE DIEU
  • Ugushyingo 27, 2023
  • Hashize amezi 6
Image

Urugo rwabo rwari hafi yo gusenyuka kubera amakimbirane ya Nzabonimana Vincent adaha ubuhumekero abo mu rugo rwe, kuri ubu akaba yicuza igihe yataye kuko byasubije umuryango we n’abana bamwe ntibabashe kwiga.

Uyu mugabo avuga ko yagiraga amahane, agataha yasinze buri gihe, yaba yaguze isabune akayigendana mu mufuka ngo umugore atayogaho, byagera ku mabanga y’urugo akabikora ku gahato, ariko aho ahumukiye yabicitseho ndetse abona n’ingaruka zikomeye byagize ku muryango we.

Umuryango wa Nzabonimana Vincent na Nyirakanani Valentine utuye mu mu Mudugudu wa Rwabageni, Akagari ka Nyamirama, Umurenge wa Muhanga mu Karere ka Muhanga, ukaba warahindutse abarimu beza b’abakiri mu makimbirane babashishikariza kuyavamo.

Bibuka ibihe bitoroshye by’amakimbirane banyuzemo, aho  amakimbirane umugabo yari afitanye n’umugore we yatumaga uguze isabune ayitwara mu mufuka kugira ngo uwo bashakanye atayikoraho.

Ubwo bari bavuye mu muganda ahanatangirijwe iminsi 16 yo kurwanya ihoheterwa, bahamirije Imvaho Nshya ko ntacyiza amakimbirane yabagejejeho usibye kubaho mu bukene n’amatiku.

Nzabonimana Vincent avuga ko bimwe mu byatumaga amakimbirane yiyongera ari uko hari ibyemezo byinshi yafataga ugasanga batabyumvikanyeho, bityo amakimbirane agatangira gutyo hakabaho n’intoganya za hato na hato.

Yagize ati: “Nageraga mu rugo nasinze nkirukana buri wese mpasanze, ndetse n’ibintu nkabimena ariko umushinga wa RWAMREK waratwigishije turahinduka ndetse umugore wanjye ntiyabyumva gusa no gutera akabariro nabikoraga ku gahato kandi twarahindutse tubanye neza.”

Akomeza agira ati: “Ikindi nongeraho ni uko amakimbirane twagiranye yatumye abana bacu batiga neza, ariko ubu twabaye bashya kandi dusigaye twigisha imiryango ibanye nabi tukayifasha kubana mu mahoro no kwirinda amakimbirane kuko asenya urugo kuko n’urwacu rwari rugiye.

Umugore we Nyirakanani Valentine, yabwiye abari bari mu Muganda usoza ukwezi k’Ugushyingo ko amakimbirane ajya yatangiye buhoro buhoro kjugeza ubwo yabaye nk’icyorezo kuyahagarika bisaba imbaraga z’umurengera.

Yagize ati: “Nari mbayeho nabi nkabura amavuta yo kwisiga ndetse umugabo iyo yinjiraga najyaga kumukingurira nkahita nihisha, kandi yari yarampariye abana ku birebana n’imyambaro n’ibikoresho by’ishuri. Kugeza n’aho umugabo yaguraga isabune yagendanaga mu mufuka ariko akanahaha gusa tukabirya mu makimbirane. Twayamazemo hafi imyaka 3 yose tubanye gutya narihanganye”.

Uyu mubyeyi akomeza avuga ko umugabo we atigeraga na rimwe ashaka ko hari aho umugore we yajya, na we kubera ko yabaga azi ibibazo bagitanye yajya kumwaka amafaranga yo guhaha akarenzaho kugira ngo abone ayo kujyana mu itsinda wenda ngo azabagoboke igihe umugabo azaba yashobewe.

Abatandukanye bitabiriye ibirori byo gutangiza iminsi 16 yo kurwanya ihohoterwa

Uyu munsi avuga ko we n’umugabo we babanye neza, kandi ibyo byatumye batangira no kwiteza imbere kuko bashyira hamwe bakungurana n’ibitekerezo ku buryo n’imyanzuro y’ibyo bagomba gukora bayifatira hamwe.

Nyirakinani ati: “Ubu amahoro arahinda rwose.”

Nyirandengera Benie Gerturde, Umuhimuzabikorwa w’Ibikorwa by’Umuryango DUHAMIC ADRI mu Karere ka Muhanga, avuga ko imiryango ibanye mu makimbirane yibuza amahirwe yo kugera ku iterambere.

Yanavuze kandi ko hari abo biviramo kwicana, agasaba buri wese gutanga amakuru ku miryango ibana mu makimbirane kugira ngo yigishwe inerekwe inzira nziza yo gukemura ibibazo bafitanye.

Nshimiyimana Octave, Perezida w’Inama Njyanama y’Akarere ka Muhanga, avuga ko muri iyi minsi 16 yo kurwanya ihohorerwa hazatangawa ubutumwa butandukanye kugira ngo imiryango ibanye nabi yerekwe inzira nziza yo kubana neza no kurera abana babo neza.

Yagize ati: “Ikindi ni uko iyi miryango tuyizi n’aho ituye, tuzagerageza kuyegera tuyiganirize.”

Kugera ubu muri uyu mwaka w’Ingengo y’Imari wa  2023-2024 hari abari bari munsi y’Imyaka 18 bagera kuri 50 bamaze kubyara inda zitateguwe ndetse hamaze kubarurwa imiryango 595 ibanye nabi mu Karere ka Muhanga, ari nay o igiye kuganirizwa kugira ngo ibane neza.

Imibare yo muri 2022 y’Umuryango RWAMREC ugamije guteza imbere uburinganire n’ubwuzuzanye, igaragaza ko mu Rwanda 46% by’abagore na 18% by’abagabo bakorerwa ihohoterwa n’abo bashakanye.

  • AKIMANA JEAN DE DIEU
  • Ugushyingo 27, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE