Muhanga: Ku myaka 35  afungiwe gusambanya umwana w’imyaka 3

  • Imvaho Nshya
  • Ukwakira 9, 2023
  • Hashize amezi 8

Umugabo witwa Ngendahimana Jean de Dieu w’imyaka 35 mu Mudugudu wa Ruvumera, Akagari ka Gahogo mu Murenge wa Nyamabuye, Akarere ka Muhanga, yatawe muri yombi n’Urwego rw’Igihugu rw’Ubugenzacyaha (RIB) akurikiranyweho gusambanya umwana w’umukobwa w’imyaka itatu.

Bikekwa ko icyo cyaha cyabereye ahitwa mu Rugarama mu Kagari ka Remera muri uyu Murenge, akaba yaratawe muri yombi  mu mpera z’icyumweru gishize biturutse ku makuru yatanzwe n’umubyeyi w’uwo mwana.

Umunyamabanga Nshingwabikorwa w’Umurenge wa Nyamabuye Nshimiyimana Jean Claude, yavuze ko bakimara kumenya aya makuru bihutiye gushakisha uyu ukekwaho iki cyaha ndetse anashyikirizwa Inzego z’ubutabera.

Yagize ati: “Twamenye ayo makuru twihutira kumushakisha arafatwa ashyikirizwa Inzego zishinzwe kugenza ibyaha kugira ngo akurikiranweho iki cyaha acyekwaho”.

Akomeza yibutsa ababyeyi gukomeza gukurikirana abana babo no kubarinda ihohoterwa aho ryaturuka hose.

Uyu mugabo ukekwaho icyo cyaha asanzwe ari mucoma muri kamwe mu tubari tubarizwa i Muhanga, bikaba bivugwa ko yigeze kubana n’umugore ariko bagatandukana.

Umugore we ngo byarangiye agiye kuba muri Uganda. Kimwe mu byatunguranye ni uko umugore wamureze ngo bari basanzwe bafitanye ubushuti budasanzwe.

Umwe mu baturage bavuganye n’Imvaho Nshya yagize ati: “Rwose byaradutunguye kuko bajyaga bagaragara bari kumwe ndetse bakanasangira inzoga mu kabari”.

Gusa hari n’abandi bavuga ko binashoboka ko uyu mugabo hari ibyo atumvikanyeho n’uyu mubyeyi w’uyu mwana bishobora gutuma habaho kumugambanira.

Kugeza ubu Imvaho Nshya itangaje amakuru Urwego rw’Igihugu rw’Ubugenzacyaha rwari rutarasubiza ubusabe bugamije kumenya ibisobanuro biruseho ku byaha uyu mugabo akurikiranyweho.

Abasanzwe birirwana nawe mu kazi bavuga ko nta mico mibi bamuziho ndetse yababaniraga neza bakongeraho ko aramutse abikoze yaba afite uburwayi bwatuma asambanya umwana.

Itegeko Nº68/2018 ryo ku wa 30/08/2018 riteganya ibyaha n’ibihano muri rusange ryasohotse mu Igazeti ya Leta nomero idasanzwe yo ku wa 27/09/2018, rifite ingingo 335.

Iyi ngingo ivuga ko umuntu wese ukorera ku mwana ushyira igitsina mu gitsina, mu kibuno cyangwa mu kanwa k’umwana; ushyira urugingo urwo ari rwo rwose rw’umubiri w’umuntu mu gitsina, cyangwa mu kibuno cy’umwana; ukora ikindi gikorwa cyose ku mubiri w’umwana hagamijwe ishimishamubiri aba akoze icyaha.

Iyo abihamijwe n’urukiko, ahanishwa igifungo kitari munsi y’imyaka makumyabiri (20) ariko kitarenze imyaka makumyabiri n’itanu (25).

Iyo gusambanya umwana byakorewe ku mwana uri munsi y’imyaka cumi n’ine (14), igihano kiba igifungo cya burundu kidashobora kugabanywa kubera impamvu nyoroshyacyaha.

Iyo gusambanya umwana ufite cyangwa urengeje imyaka cumi n’ine (14) byamuteye indwara idakira cyangwa ubumuga, igihano kiba igifungo cya burundu.

Iyo gusambanya umwana byakurikiwe no kubana nk’umugabo n’umugore, igihano kiba igifungo cya burundu kidashobora kugabanywa kubera impamvu nyoroshyacyaha.

AKIMANA JEAN DE DIEU

  • Imvaho Nshya
  • Ukwakira 9, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE