Muhanga: Kizimyamwoto zarengeje igihe mu nzu z’ubucuruzi ziteje impungenge

  • Imvaho Nshya
  • Ugushyingo 11, 2023
  • Hashize amezi 6
Image

Bamwe mu bacuruzi n’ababagana bafite impungenge zikomoka ku kuba zimwe mu nzu zubatswe zitagira uburyo bwo kuzimya inkongi mu gihe zaba zibasiwe nayo bakanongeraho ko hari n’ahari za kizimyamwoto zarengeje igihe.

Aba bacuruzi n’ababagana bavuga ko bitewe n’ingano y’ibyo bacuruza bakwiye kujya birwanaho bagategura uburyo bwo kwitabara.

Munyaneza Celse avuga ko nyinshi mu nzu zo mu mujyi wa Muhanga zitagira ubwirinzi bwo kurwanya inkongi z’umuriro mu gihe zabaho.

Yagize ati: “Rwose dufite impungenge z’uko inyinshi mu nzu ziri mu mujyi wacu zitagira uburyo bwo kwirinda inkongi kandi zose zikorerwamo, bahabwa ibyangombwa n’ubuyobozi kuko ntushobora kuyinjiramo uko wiboneye”.

Umwe mu bacururiza mu mujyi wa Muhanga avuga ko yabajije uwo akodeshaho inzu akoreramo y’ubucuruzi niba yarayakiye ubwishingizi bw’inkongi z’umuriro, amubwira ko ntabwo yatse yiyemeza ko nabona inzu ifite ubu buryo azahita yimuka akaba ari yo ajya gukodesha.

Yagize ati: “Njyewe mperutse kubaza uwo nkodeshaho iyi nzu nkoreramo ubucuruzi ko yaba yarashyize inzu ye mu bwishingizi bw’inkongi ambwira ko ntabyo azi, mubaza niba hari uburyo bwo kurinda inkongi ambwira ko bamuha uburenganzira babimusabye ariko yabuze ubushobozi bwo kubishyiraho. Gusa njyewe nafashe umwanzuro w’uko nimbona ahandi nzahita mpindura aho gucururiza”.

Umuhoza Jeannette yatangarije Imvaho Nshya ko bigaragara ko hari ukoroshya kwabayemo kwakozwe n’abashinzwe gutanga impushya zo kwemerera abubatsi gukoresha inyubako zitujuje ibisabwa zikaba zishobora gushyira ubuzima bw’abazigana mu kaga.

Ati: “Ikigaragara ni uko mu itangwa ry’ibyangombwa habamo koroshya kuko inzu ubundi igomba kuba hari ibyo yujuje kugira ngo ihabwe uruhushya rwo kuyikoreramo, ariko nyinshi muri izi nzu ntabwo zujuje ibisabwa rwose zazashyira ubuzima bw’abazigenderera mu kaga”.

Bamwe mu bafite inzu mu mujyi wa Muhanga bavuga ko hsri ibyo basabwa gukora akenshi biba bigoye ugerereranyije n’ibyo bashora bubaka izo nzu bakavuga ko bagerageza kugenda babihindura.

Undi nawe avuga ko iyo bakorewe amagenzura bahabwa ibyangombwa, bityo bakaba baguze kizimyamwoto ariko zikarangira ntibabimenye ko byanabaye.

Umuyobozi w’Akarere ka Muhanga Wungirije Ushinzwe iterambere ry’Ubukungu, Bizimana Eric avuga ko inzu zose nshyashya zirimo kubakwa zidashobora kubona uruhushya rwo kuzikoreramo ibi byose bitagenzuwe kandi hari urutonde rwabyo.

Ati: “Izi nzu zose nshya zirimo kubakwa ntizishobora guhabwa uburenganzira bwo gukoreramo hatabanje kugenzurwa ibi byose birimo inzira z’abafite ubumuga, amazi azafatwa gute ndetse n’uburyo bwo kurinda inkongi zabaho hari ifishi igenderwaho bagenzura”.

Akomeza yemeza ko hagiye gukorwa ubugenzuzi no kuganiriza bamwe mu bafite inzu zubatswe kera, nabo bakibutswa ko inkongi z’umuriro zabagwirira.

Yongeyeho ko banabasaba kureba uko bakurikiza ibijyanye n’icyo igishushanyombonera cy’umujyi gisaba, ndetse ko ubuyobozi bugira inama abakodesha inzu kwibuka ko inkongi zidateguza bagatanga ubwishingizi ku bicuruzwa byabo, kandi bakagira bimwe mu byakwifashishwa mu gihe habayeho inkongi z’umuriro kuko zishobora guhitana ubuzima bw’abantu.

Yagize ati: “Muri Rusange harebwa ibintu byinshi iyo batanga ibyangombwa byo gukorera mu nzu, ariko iby’ibanze harimo uko byari biteganyijwe hubakwa inyubako n’ibikoresho byakoreshejwe, uburyo bwo kurinda inkongi z’umuriro kuri buri gice ndetse naho gusohokera mu gihe habayeho inkongi, uburyo bwo gusaka abinjiye mu nyubako ndetse na Camera zifasha mu kurinda umutekano, ubwishingizi bw’inyubako ndetse hanagenzurwa ubuziranenge bw’insinga zakoreshejwe hashyirwamo amashanyarazi n’ibindi bitandukanye”.

Umujyi wa Muhanga ni umwe mu mijyi yunganira Umujyi wa Kigali, bivuze ko ibintu byose bihakorerwa bigomba kuba bijyanye n’ibisabwa ku nzu kugira ngo yemererwe gukorerwamo.

AKIMANA JEAN DE DIEU

  • Imvaho Nshya
  • Ugushyingo 11, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE