Muhanga: Impuruza ku nkongi zaturuka kuri butike zahinduwe ibikoni

  • Imvaho Nshya
  • Ugushyingo 7, 2023
  • Hashize amezi 7
Image

Bamwe mu bagana zimwe mu nzu z’ubucuruzi bavuga ko hatagize igikorwa zishobora kwibasirwa n’inkongi z’umuriro zikomoka ku macupa ya gazi n’imbabura zitekerwaho byashyizwe muri za butiki ziganwa na bamwe bajya guhaha bakavuga ko ubuzima.

Mu kiganiro na Imvaho Nshya bavuga ko batewe impungenge n’izo nzu bagasaba inzego bireba kubihagurukira mu maguru mashya bitaratwara ubuzima bwa bamwe mu bahagana n’abahacururiza.

Ndayisenga Jean de la Croix ni umuguzi wa buri munsi wemeza ko ahahira mu Ruvumera, mu Kagali ka Gahogo mu Murenge wa Nyamabuye yatangaje ko hari inzu usanga ari nto cyane bazanamo ibikoni bikoresha gazi bikaba byateza inkongi.

Yagize ati: “Uyu mujyi ugenda waguka ariko nawe reba hano mu Ruvumera dufite inzu zicururizwamo za butiki ariko ugasanga bateretsemo ka gazi batekeraho umureti, amandazi ndetse ugasanga banacuruzamo ibishyimbo batekeye aho ku mbabura kandi aho usanga hari abantu bahanywera inzoga bishobora kuzatera impanuka zahitana abantu”.

Uwababyeyi Bernadette ucururiza mu mujyi wa Muhanga yabwiye Imvaho Nshya ko gucuruza byinshi icyarimwe, ari ukugira ngo babone amafaranga y’ubukode n’umukozi.

Ati: “Nanjye ndi umucurizi ukorera muri uyu mujyi ariko benshi bakora ibi bagashyiramo ibindi bigaragara cyane mu bice bya Ruvumera, Nyabisundu na Gahogo, rwose tubikoreshwa nuko ibyo ducuruza bitazana amafaranga vuba bigatuma twifashisha gazi tugakoreramo n’ibindi ariko natwe nta kundi turabizi ko habaho impanuka kuko usanga hafunganye cyane mbese turinzwe n’Imana nubwo tubikora”.

Kamali Clement avuga ko basaba ubuyobozi guhagurukira aba bacuruzi bafite uruhushya rwo gukoreraho ugasanga bakora ibyo bishakiye bagashyiramo ibibinjiriza kandi aha hantu ni mu mwanda kuko usanga imibu iva ku mineke bacuruza iri kuri ibyo batekeye aho ngaho kandi byadutera indwara zikomoka ku mwanda.

Yagize ati: “Twebwe turasaba abayobozi bacu nabo bireba ko bahagurukira abantu bafashe izo nzu bakazihinduramo ibikoni bito byateza impanuka zikomoka ku muriro kuko ahantu hari resitora zizwi hari ibyo zisabwa. N’aba nibahitemo icyo bakora bo kuvangavanga  kuko winjira muri butiki ugiye kugira icyo ugura ugasanga batetse ishyimbo, imireti, amandazi n’ibindi kandi aho hari imineke ifiteho imibu mbese nubwo hataba inkongi hashobora no kubaho kuhandurira indwara zikomoka ku mwanda”.

Umuyobozi w’imwe mu nzu zituganya amafunguro utashatse ko hatangazwa amazina ye avuga ko ubuyobozi ari bwo bukwiye kwibutsa abafite butiki ko batemerewe gutekeramo kuko bishobora gutera impanuka zatwara ubuzima bw’ababagana kuko natwe ibikoni byacu biba kure yaho abakiliya bacu bicara abafata amafunguro ariko natwe badutera igihombo.

Perezida w’Urugaga rw’Abikorera mu Karere ka Muhanga, Kimonyo Juvenal avuga ko bidakwiye kandi bagiye gukora ubugenzuzi bakareba abakora bene ibi bintu byo gutandukira mu bucuruzi bwabo bakibutswa ko hari ibyo batemerewe ndetse batakwisubiraho bakabihanirwa.

Yagize ati: “Buri mucuruzi akwiye gucuruza ibijyana n’ibyo yasabiye ibyangombwa ntawukwiye kubirengaho tugiye kubiganiraho kandi dukore ubugenzuzi kandi abo tuzasanga babikora tuzabibutsa inshingano bafite kugira ngo bisubireho byakwanga bagacibwa amande nubwo atari byo tugendereye kuko bakomeje gukora gutya bateza impanuka kandi biranashoboka ko habaho n’indwara z’ibyorezo zakwaduka kuko ahari resitora isabwa gushyiramo amakaro n’ibindi byose bijyanye n’isuku iyo bidakozwe neza byateza umwanda”.

Umuyobozi w’Akarere ka Muhanga, Kayitare Jacqueline avuga ko hari itsinda rihuriweho n’inzego z’abikorera, Ubuyobozi bw’ Akarere n’ Imirenge ndetse n’ inzego z’ubuzima ( Ibitaro n’Ibigo Nderabuzima), Ikigo cy’Isuku n’Isukura (WASAC) n’Ikigo cy’Ingufu mu Rwanda (REG) hasuzumwa ibibazo bigaragara ahatangirwa serivisi hose ahagaragaye amakosa bagirwa inama bakabikosora, kandi iyo batabikoze bafatirwa ibyemezo bishobora gutuma bafungirwa naho abandi bagasabwa gukosora ibitagaragara neza byateza akaga abaturage bahajya bagiye gusaba serivisi.

Hakwiye ubugenzuzi buhoraho kuko bidacungiwe hafi byateza akaga ku bahakorera n’abakiliya babirya.

AKIMANA JEAN DE DIEU

  • Imvaho Nshya
  • Ugushyingo 7, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE