Muhanga: Impungenge ni zose ku birombe byahagarikiwe impushya

  • AKIMANA JEAN DE DIEU
  • Ugushyingo 27, 2023
  • Hashize amezi 3
Image

Bamwe mu baturage baturiye ibirombe ndetse bakaba bari bafite akazi ko gucukura amabuye y’agaciro muri Kompanyi 4 zahagarikiwe impushya, barasaba inzego bireba gucungira hafi ibi birombe kuko bishobora kwigabizwa n’abacukura mu buryo butemewe n’amategeko bazwi nk’Abahebyi.

Mu kiganiro bagiranye na Imvaho Nshya, bavuga ko ubusanzwe ibyo birombe byajyaga byigabizwa n’Abahebyi hari Kompanyi zibicukuramo, none mu gihe bari barazihagaritse abo bahebyi bashobora guhita binjiramo.

Musabende Pelagie w’imyaka 29, avuga ko yari umukozi muri Kompanyi yitwa Mushishiro Mining Company ikora ubucukuzi bw’amabuye y’agaciro byabaye bihagaritswe b’agateganyo mu gihe bitaruzuza ibyangombwa bisabwa na Leta.

Avuga ko bafite impungenge z’uko babaye abashomeri kubera akazi kabo kahagaze, mu gihe n’ibirombe bakoragamo bigiye gucukurwa mu buryo bunyuranyije n’amategeko kuko umutekano wabyo ukemangwa mu gihe nta bantu barimo kubikoreramo muri iyi minsi.

Yagize ati: “Nari umukozi wa Kompanyi ya Mushishiro Mining Company Ltd ariko twebwe dufite impungenge z’uko ibi birombe byahagarikiwe impushya bizakomeza gucungirwa umutekano, cyane ko n’ubundi twahoraga dusa n’abahanganye n’Abahebyi baza gucukura bitemewe kandi natwe dutakaje akazi hari byinshi tugiye kubura twakuraga hariya mu kirombe”.

Abakoraga ubucukuzi mu birombe byahagaritswe bari mu bushomeri

Munyarukundo Sylvere w’imyaka 36, avuga ko aturiye ikirombe cyacukurwagamo na Kompanyi ya CEAVMS mu Murenge wa Kabacuzi, akaba yemeza ko bizagorana kuko n’ubusanzwe abacunga umutekano bahora barwana n’Abahebyi bacukura ku gahato.

Yagize ati: “Njyewe murabona ko nta rugendo ruhari ngana ku kirombe cya CEAVMS cyacukurwagamo amabuye y’agaciro; dufite impungenge kubera ko hano hakunze kuba insoresore ndetse n’abagabo bakunda gucukura mu buryo butemewe bashobora kucyigabiza bakaba bacukura kikabagwira bakahaburira ubuzima”.

Ntirushwa Medard w’imyaka 27, avuga ko yakoreraga Kompanyi ya Soremi Intego yacukuraga amabuye y’agaciro mu Murenge wa Nyarusange. Yemeza ko no mu minsi ishize hari Kompanyi yatewe n’abitwaje intwaro gakondo, banatema abantu.

Yagize ati: “Biratugoye kuko iki gisimu cyavanwagamo amabuye y’agaciro ndetse mu minsi ishize hari ikindi iki kombe cyatewe n’Abahebyi bigize ibihazi, banatema abantu kandi babikoze hari abacunga umutekano. Ubu rero dushobora kubona bakoze amatsinda bakabyigarurira bakaba babicukuramo bikabagwira murabizi ko bo kwirinda biba bitabareba bapfa kwishakira amabuye”.

Rukundo James w’imyaka 30 avuga ko abantu bakwiye kwitegura kuko binahagaritswe mu gihe kibi cy’imvura, bikaba bishobora gutera impanuka zakomoka ku bucukuzi bw’Abahebyi.

Umuyobozi w’Akarere ka Muhanga Kayitare Jacqueline, avuga ko bamaze kwandikira Ikigo gishinzwe Mine, Peteroli na Gazi mu Rwanda (RMB) kugira ngo ibi birombe bishakirwe abandi babikoreramo ari ko hanirindwa abajyamo bagacukura mu buryo butemewe.

Yagize ati: “Ni byo twamaze kwandikira ikigo kigenga ubucukuzi  kugira ngo kidufashe kubona abandi bashoramari bahakorera, kuko hatabonetse abahakorera abacukura mu buryo butemewe bashobora kujyayo bikaba byatera ibibazo byo kuburiramo ubuzima”.

Akarere ka Muhanga ni kamwe mu Turere tugira amabuye y’agaciro menshi acukurwa harimo Wolfram, Gasegereti, Lithium n’ayandi atandukanye agacukurwa mu Mirenge 11 kuri 12 yose.

Umurenge wa Shyogwe ni wo wonyine udacukurwamo amabuye y’agaciro, gusa na ho haboneka imicanga y’amavuta n’iyo binura mu mazi, gusa ugakorerwamo ubucukuzi bw’ibumba n’umucanga nka kariyeri.

  • AKIMANA JEAN DE DIEU
  • Ugushyingo 27, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE