Muhanga: Imihanda yasondetswe yatangiye gusubirwamo

  • AKIMANA JEAN DE DIEU
  • Mutarama 12, 2024
  • Hashize amezi 2
Image

Hashize igihe abaturage batuye mu Mirenge ya Shyogwe na Nyamabuye bavuga ko imihanda irimo kubakwa na Sosiyete y’Abashinwa ya China Road and Bridge Corporation Ltd (CRBC) yatsindiye isoko yayisondetse none ikaba yatangiye kuyirimagura ngo yongere yubakwe neza bundi bushya.

Ku itariki ya 7 Mutarama 2024 ni bwo imashini ya Caterpillar yo mu bwoko bwo kuringaniza (Niveleuse) y’iyi Kompani zatangiye kurimbura umuhanda wa Kaburimbo yiswe “Bicouche” zisenya umuhanda Cyakabiri uca ku kibuga cy’indege zitagira abapilote (Drones) ugana mu Mudugudu wa Karama mu Kagali ka Ruli hakiyongeraho n’imihanda irimo kubakwa mu Mudugudu wa Nyarucyamo III mu Kagari ka Gahogo yose igizwe n’ibilometero bisaga 5,5.

Mu kiganiro n’Umuyobozi w’Akarere ka Muhanga Kayitare Jacqueline yavuze ko hakozwe igenzura basanga uyu muhanda warakozwe mu buryo butanoze, bityo basaba iyi Kompanyi  yakosora ibitaragenze neza.

Yagize ati: “Nyuma y’uko hakozwe ubugenzuzi twasanze hari ibitaragenze neza mu ikorwa ry’uyu muhanda, bityo dusaba abarimo kuwukora gukosora ibitameze neza bakabinoza kugira ngo birusheho kuba byiza”.

Akomeza avuga ko impamvu z’isubirwamo ry’uyu muhanda urimo gukorwa ryakomotse ku kuba hari bamwe mu bakozi bagenzuraga ikorwa ry’uyu muhanda bari bafite ubumenyi buke.

Ati: “Mu igenzura ryakozwe n’inzego zitandukanye twasanze bamwe mu bubatse uyu muhanda batari babifitiye ubumenyi harimo abacungaga imirimo yo kubaka ndetse no muri Kompanyi yatsindiye isoko bityo twasabye kompanyi ko yashaka abandi bakozi bafite ubumenyi kugira ngo babikore neza kurushaho kandi turizeza abaturage bacu ko muri Kanama 2024 uzaba wararangiye”.

Yongeraho ko abaturage badakwiye kugira impungenge kuko iyi mihanda irimo gukurikiranirwa hafi ngo yubakwe neza izabashe koroshya ubuhahirane kandi ibe ikomeye kandi ahantu hose hagaragara ikibazo hagomba gukosorwa.

Bamwe mu baturage bavuga ko bishimiye ko uyu muhanda usubiwemo kuko utoroshyaga ubuhahirane ndetse hari n’abari bafite imodoka zatangiye kujegera.

Nkiko Jean Marie Vianney avuga ko uwari ufite imodoka ishaje atarakiyinyuzamo kubera kugenda usimbuka imigunguzi.

Yagize ati: “Bamwe mu baturanyi bacu bari basigaye batega moto kubera ko imodoka zabo zishaje zahoraga mu magaraji zikorwa kubera ko zabaga zononekaye”.

Mukabalisa Azziza avuga ko nta mugore utwite wisukiraga gutega moto kubera kugenda igucekagura bitewe n’ibinogo ndetse binarekamo amazi.

Ati: “Uyu muhanda wari waratumye bamwe bazibukira gutega moto kubera ko ntabwo waba utwite ngo uyitege kuko igenda igucugusa nk’ibishyimbo bagosora kandi igitangaje ntaho nigeze mbona umuhanda wa kaburimbo wubatswe ugira ibinogo birekamo amazi atari ukuvuga ko wangiritse mu gihe runaka”.

Biteganyijwe ko iyi mihanda yavugwaga ko igeze ku kigero cya 90% yongeye gusubirwamo izuzura itwaye asaga miliyari 6 ndetse ikaba ifite uburebure busaga Kilometero 5,5 ikaba irimo kubakwa mu Tugali twa Ruli mu Murenge wa Shyogwe na Gahogo yo mu Murenge wa Nyamabuye.

  • AKIMANA JEAN DE DIEU
  • Mutarama 12, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE