Muhanga: Ibiraro byubatswe bigiye kunoza ubuhahirane

  • Imvaho Nshya
  • Ukwakira 28, 2023
  • Hashize amezi 7
Image

Bamwe mu baturage bakoresha ibiraro bya Rugarama I na Rugarama II barashimira ubuyobozi bwongeye kububakira ibi biraro byari byarangiritse biturutse ku biza, bikaba byuzuye bigiye koroshya ubuhahirane bw’abakorera mu mujyi bataha mu Tugali ka Gifumba na Remera.

Mu kiganiro bahaye Imvaho Nshya bavuga ko bishimira ibyakozwe kuko byari bitangiye kuba ikibazo cyo kuhaca kubera ko iki kiraro cyari gisigaye kigwamo abantu ndetse no kuhaca byaragoranaga.

Rutikanga Protais avuga ko bashimira ubuyobozi bwabonye ko iki kiraro gikwiye kubakwa kubera ko ubuhahirane bwari bugiye kuba ikibazo duca mu mazi.

Ati: “Turishira ko twatakiye ubuyobozi bukatwumva bakaduha iki kiraro kugira ngo ubuhahirane budahagarara kuko mbere twari twaratangiye guca mu mazi, imodoka zahacaga zahamaraga igihe kuko zahanaga umwanya kugira ngo zibisikane na moto ntabwo zabashaga kwambuka neza zisanzuye”.

Murenzi Papias ufite imyaka 45 yemeza ko bifuza ko uyu muhanda wose ukorwa ndetse  ukaba washyirwaho amatara yajya afasha abahanyura kutikanga abajura babategera mu gishanga bakabambura.

Yagize ati: “Ni byo badukoreye iteme ariko banakoze umuhanda wose bakaduha amatara byadufasha kuko nubwo dukorera mu mujyi dutaha kare kubera kwikanga abajura badutegera mu gishanga bakatwambura amafaranga twambukanye cyangwa n’amatelefoni yacu kubera umwijima wo muri iki gishanga”.

Mukanyandwi Domithille ufite imyaka 36 avuga ko bakeneye gushyirirwaho amatara kuko nubwo iki kiraro cyuzuye kikaba cyaratangiye gukoreshwa bizafasha abajyaga baca kure kubera ikiraro cyari cyarangiritse.

Ati: ” Iki kiraro kirubatswe gitangira gukoreshwa ariko twebwe dukorera mu mujyi twanatanga serivisi tukageza ya masaha yashyizweho ariko ntabwo twabishobora, keretse turaye mu mujyi kuko iki gishanga kigabanya umujyi na Gifumba kibamo ibisambo baduhe amatara wenda byagabanuuka ntibitunigire muri iki gishanga”.

Umuyobozi w’Akarere ka Muhanga, Kayitare Jacqueline avuga ko bishimira ko ibi biraro byabonewe ingengo y’imari bikubakwa ariko hari n’ibindi bigishakirwa ingengo y’imari biri mu yindi Mirenge.

Ati: “Turishimira ko twamaze kubona ibi biraro kuko byo byabonewe ingengo y’imari birubakwa ariko dufite n’ibindi twabonye ko bishobora kubakwa ariko turacyabishakira ingengo y’imari gusa hari Imirenge yo mu gice cya Ndiza harimo Mushishiro, Rongi na Kibangu igifite amateme n’ibiraro nabyo bikwiye kubakwa kandi tubikora dushingiye ku byifuzo by’abaturage bacu”.

Akomeza avuga ko ibyifuzo by’abaturage by’uko uyu muhanda utari muremure uva mu Mujyi wa Muhanga werekeza mu gice kigizwe n’Akagali ka Gifumba na Remera kitateganyirijwe ingengo y’imari yagenewe amatara ariko mu gihe  umuhanda  wa Kigali- Muhanga uzaba watangiye kubakwa amatara azavanwaho mu gice cy’aka karere yatekerezwaho akajyanwa mu bice  bigaragara ko hakenewe urumuri kurusha ahandi hagamijwe gukemura ibibazo by’umutekano muke waturuka ku rumuri ruke abaturage bakahamburirwa.

Ibi biraro bya Rugarama ya I n’iya II byuzuye bitwaye asaga miliyoni 472 bikaba byaratangiye kwifashishwa n’abatuye muri iki gice kirimo kwagukiramo umujyi, gusa abaturage bakemeza ko hari ibindi biraro byambuka bijya i Samuduha na Gifumba bikwiye kurebwaho.

AKIMANA JEAN DE DIEU

  • Imvaho Nshya
  • Ukwakira 28, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE