Muhanga: Ibibazo ni uruhuri ku bagituye mu cyanya cy’inganda

  • Imvaho Nshya
  • Ugushyingo 2, 2023
  • Hashize amezi 7
Image

Bamwe mu baturage batuye ndetse n’abaturiye icyanya cy’inganda cya Muhanga barasaba inzego bireba ko zabafasha kwimurwa bakavanwa mu matongo yasizwe n’abamaze kwimurwa, bakongeraho ko urusaku rw’imashini ndetse n’imyuzure ituruka ku mazi ava mu nganda bishobora kubambura ubuzima.

Mu kiganiro bahaye Imvaho Nshya bavuga ko bafite impungenge ku buzima bwabo harimo urusaku ruterwa n’imashini z’uruganda rwa Anjia rukora sima ndetse n’ibisambo bishobora kwihisha mu matongo y’abamaze kwimurwa.

Mpozembizi Alexis avuga ko amazi aturuka mu muhanda muhangano bahashyize ndetse n’urusaku rw’imashini zisakuza bishobora gutera ibibazo ku baturage basigayemo.

Yagize Ati” Nkuko mubibona hashize amezi 7 tubariwe bikaba byaraduteje igihombo kubera ko aha hantu amazi ahuzura iyo imvura iguye ntawabasha kuhanyura kubera  amazi ava mu muhanda abatera mu rugo, ndasaba ko batwimura kuko hano hari urusaku rw’imashini zo mu ruganda rwa Anjia rukora sima zidatuma turyama”.

Uwizeyimana Assoumpta avuga ko umutekano w’abaturage batuye mu cyanya cy’Inganda ubangamiwe kuko hari ibisambo byihisha mu matongo basigiwe nabo bari baturanye bamaze kwimuka.

Ati:”Twebwe abatuye mu cyanya cy’Inganda cya Muhanga dufite umutekano muke ukomoka ku matongo twasigayemo bitewe nuko abo twari duturanye bo babonye ingurane baragenda kandi ikintu kibabaje ni uko nta kintu twemerewe gukora ku nzu zacu ndetse no guhinga ntitubyemerewe badusabye guhinga ibintu bitarenza amezi 3 yonyine nibatwimure kuko aha tuhaba tutishimye”.

Nyirabukara Immacule yatangarije Imvaho Nshya ko bamaze kwimura umuhungu we wanabariwe nyuma agasigara afite impungenge ku buzima bwe kandi akemeza ko bigoye kuhaba ufite umuvuduko w’amaraso kubera urusaku rwo mu ruganda rwa Sima.

Yagize ati: “Njyewe murabona ahantu nasigaye kubera ko umuhungu wanjye wabariwe nyuma yanjye yabonye ingurane ye arigendera kandi murabona iki gikuta cyasigaye gishobora kungwira amazi aturuka mu nganda zirimo kubakwa azatujyana noneho hiyongeraho urusaku ruva mu ruganda rwa Sima, nta muntu ugisinzira hano bagire bahadukure kuko hanateye abantu bambura abantu bakihisha muri ibi bizu”.

Manirakiza Aaron avuga ko hashize igihe babariwe ariko batigeze bamenya aho byahereye akavuga ko ubuyobozi bw’Akarere nta gihe batabubwiye ko babangamiwe ariko ntibugire icyo bubikoraho.

Ati: “Twebwe twarabariwe ariko ntabwo tuzi aho byahereye kuko ntitwongeye kubona ubuyobozi budusura ngo bunatubwire aho bigeze, tubangamiwe n’amazi n’urusaku rw’inganda rwose bagire batwimure kuko abana bacu n’abandi bafite indwara zidakira nk’imivuduko harabahuta”.

Umuyobozi Mukuru ushinzwe Iterambere ry’Inganda muri Minisiteri y’Ubucuruzi n’Inganda Fred Mugabe, yabwiye Imvaho Nshya ko icyanya cy’Inganda cya Muhanga hagombaga kwimurwa abaturage bari batuye kuri Hegitari 68 bagombaga guhabwa ingurane ku miryango yabo zingana na 8.361.676.853 z’amafaranga y’u Rwanda ariko abamaze guhabwa ingurane bamaze kubona amafaranga angana na 2.294.940.334 bari batuye kuri Hegitari 17, kugeza ubu hasigaye ingurane zingana n’amafaranga y’u Rwanda 6.066.776.519.

Yongeyeho ko baba bihanganye kuko ingengo y’imari yo kubimutra itaraboneka.

Ati: “Ku baturage batarahabwa ingurane zabo na bo bazagenda bazihabwa buhoro buhoro bitewe n’uko uyu mushinga uhenze, uko amafaranga y’ingengo y’imari agenda aboneka hazagenda himurwa abo bigaragara ko begereye inganda zashyira ubuzima bwabo mu kaga. Mube mukomeje kwihangana mu gihe ibibazo byanyu bigishakirwa umuti uhamye”.

Icyanya cy’Inganda cy’Akarere ka Muhanga kiri ku buso ba Hegitari 68  kikaba kimaze kugeramo inganda zigera kuri 2 zikora harimo uruganda rwa Anjia Prefablicated construction Rwanda Co Ltd rukora sima ndetse n’uruganda rwa Seven Hills Ltd rukora amasafuriya muri Alluminium.

 AKIMANA JEAN DE DIEU

  • Imvaho Nshya
  • Ugushyingo 2, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE