Muhanga: Hikanzwe amarozi mu mukino AS Muhanga yakiriyemo Vision FC

  • AKIMANA JEAN DE DIEU
  • Ukuboza 17, 2023
  • Hashize amezi 2
Image

Umukino wa Shampiyona y’Icyiciro cya Kabiri wagombaga guhuza ikipe ya AS Muhanga n’ikipe ya Vision FC ku munsi  wa Karindwi wakerereweho isaha n’iminota 54 ndetse unahagarikwa hakinwe iminota 67 gusa, kubera kwikanga amarozi.

Uyu mukino wagombaga gutangira saa cyenda zuzuye ariko watangiye ahagana saa kumi n’iminota 50 kubera kutumvikana aho iyi kipe ya Vision FC yageze ku kibuga cya Sitade ya Muhanga yatinze ntiyajya mu rwambariro mu gihe Komiseri yabasabaga kujya mu rwambariro bakanga kujyamo bavuga ko barogewemo.

Ahagana saa kumi zuzuye, abasifuzi bavuye mu rwambariro baragenda nyuma baragaruka basaba ikipe ko zigaruka saa 16:07′.

Ikipe ya Vision FC yagarutse ku kibuga ahagana saa 16:18  komiseri yavuye mu rwambariro avugana n’umutoza wa AS Muhanga Mbarushimana Abdou, avugana n’uwungirije Umukuru w’Abasifuzi  Ambroise, birangira umukino usubitswe kuko ikipe ya AS Muhanga yanze gukina ivuga ko uyu mukino warangira bwije.

Ikipe ya AS Muhanga ahagana saa 15:45′ yatangiye imyitozo abasifuzi baragenda bagaruka ku kibuga ahagana saa 16:27′ bemeranya ko bagomba gukina.

Umukino watangiye ahagana saa 16:54′ bigaragara ko ikipe zose zisatirana izamu ku rindi, ariko ku munota wa 27′ hatsinzwe igitego cya mbere cyatsinzwe na Iyakaremye Christian, naho ku munota wa 28′ ku mupira bateye umuzamu arawurekura  uwitwa Christian  aboneza mu rucundura biba ibitego 2:0.

Igice cya 2 cyatangiye saa 17:50′ barakina ku munota wa 51′ uwitwa Niyonkuru Jean Pierre yahawe umupira atsinda igitego cya 3 bacenze abakina inyuma ba Vision FC batari bahagaze neza.

Nyuma y’aho ku munota wa 16 w’igice cya 2 Vision  FC yabonye igitego cyatsinzwe na Mutebi Rachid.

Umutoza w’Ikipe ya AS Muhanga Abdou Mbarushimana, avuga ko ikipe ya Vision FC yageze ku kibuga ahagana 14:58′ banga kujya mu rwambariro ku mpamvu yavugaga ko zitazwi, ari na byo byadindije umukino.

Ati: “Twagombye kuba twakinnye kare ariko batuvangiye tunatangira imyitozo.”

Ku ruhande rwa Vision FC bavuga ko bazi neza ko urwambariro bari bateguriwe rwari rwahumanyijwe ndetse rutagira ubwiherero, bakongeraho ko urufunguzo babanje kurwimwa n’abacunga iyi Sitade.

Abakurikiranye uyu mukino bavuga ko ibyagaragaye ku  mukino wahuje AS Muhanga na Vision FC bidakwiye kuko kuvuga ko warozwe nta gihamya gifatika ihari ari ukwihunza inshingano.

Umukino wahagaritswe hakinwe iminota iminota 67 ku bice byombi ikipe ya AS Muhanga ifite ibitego 3 kuri 1 cya Vision FC kubera ko batabashaga kureba umupira ahagana saa 18:14′.

Bivugwa ko iminota isigaye ikinwa kuri iki Cyumweru tariki ya 17 Ukuboza 2023 ku isaha ya saa cyenda zuzuye (15:00′).

  • AKIMANA JEAN DE DIEU
  • Ukuboza 17, 2023
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE