Muhanga: Hari urubyiruko rudakozwa ibyo kugura agakingirizo muri Farumasi

  • AKIMANA JEAN DE DIEU
  • Ukuboza 4, 2023
  • Hashize amezi 6
Image

Rumwe mu rubyiruko rwo mu Mujyi wa Muhanga mu Karere ka Muhanga, ruravuga ko rutajya kugura agakingirizo muri Farumasi kubera kugira isoni z’uko babonwa mu gihe bagiye kukagura abenshi bakabifata nko kwiyahura mu gihe bishoye mu mibonano mpuzabitsina.

Ibi babigarutseho mu kiganiro bagiranye n’Imvaho Nshya, aho bavuga ko nubwo bagira isoni zishobora kuzatuma bandura agakoko gatera SIDA.

Rukundo Elam avuga ko atarajya kugura agakingirizo ariko atazi uko yagenda avuga kuko bitera isoni iyo bagiye kukagura bigatuma bashobora kwishora mu mibonano mpuzabitsina idakingiye.

Yagize ati: “Njyewe sindajya kugura agakingirizo ariko ndamutse ngiye kukagura sinzi uko nagenda mvuga. Ariko hari bamwe muri bagenzi banjye bagira isoni iyo bagiye kutugura muri Farumasi bagahitamo kugatumiza cyangwa bakishora mu mibonano mpuzabitsina idakingiye umuntu akaba yakwandura kubera ubujiji bwo kutifatira icyemezo cyo kwirinda”.

Hakizimana yavuze ko yigeze kujya kugura agakingirizo ariko agezeyo abura uko akaka, akajya atunga urutoki aho ziri kuko yari afite isoni nyinshi z’uko abantu bamubona namara kukagura.

Yagize ati: “Njyewe nagiye kugura agakingirizo ngezeyo nsangayo abantu nzi nkajya ntunga agatoki aho bazishyize natinye kuzivuga mu mazina. Ariko natekerezaga uko basigara batekereza nimara kuhaba nahise mfata umwanzuro w’uko ntasubira kukagura cyangwa nkagatima undi muntu.”

Uwineza Marie Claire avuga ko yigeze kujya gusura umuhungu amusaba ko bakorana imibonano mpuzabitsina ariko asanga nta gakingirizo afit,e ahitamo kumusaba ko yajya kuzigura amubwira ko atabona uko akaka atuma umwana.

Na we yemeza ako urubyiruko rwishora mu busambanyi budakingiye bushobora kubambura ahazaza nyuma yo kwandura virusi itera SIDA.

Umuyobozi w’Akarere ka Muhanga wungirije ushinzwe imibereho y’Abaturage Mugabo Gilbert, avuga ko batangiye ubukangurambaga bw’amezi 6 bugamije kwegera ibyiciro byose by’urubyiruko kugira ngo bagezweho ubutumwa.

Yagize ati: “Ntabwo twarebera gusa urubyiruko rukwiye kwirinda imico yatuma rwandura agakoko gatera SIDA kandi twanateguye ubukangurzmbaga bw’amezi 6 kugira ngo tubashe kwegera ibyiciro bitandukanye, haba abakuru n’abato, kugira ngo bagezweho ubutumwa bubakangurira kwirinda kwandura no gukwirakwiza mu bandi indwara”.

Akomeza avuga ko muri iki gikorwa Akarere kazakorana n’imiryango itari iya Leta (NGOs) ikunze gukora cyane mu bijyanye n’ubuzima, bahereye ku bafite ibyago byinshi byo twandura kurusha abandi virusi itera SIDA ndetse n’izindi ndwara zandurira mu mibonano mpuzabitsina.

Mu gutangiza ubu bukangurambaga hakinwe imikino y’umupira w’Amaguru aho ikipe y’abakorerabushake bo mu Karere ka Muhanga yatsinze ikipe yari igizwe n’abakozi b’Akarere ibitego 2-1, mu gihe imikino yabanje abakozi b’Akarere ka Muhanga yatsinze ikipe y’Abapolisi bakorera mu Karere ka Muhanga,  mu gihe Abamotari bari batsinzwe n’abakorarabushake kuri penaliti 4-3.

Uru rubyiruko rusabwa kuyoboka ibigo bitangirwamo inama z’ubuzima harimo ibigo nderabuzima ndetse n’ibigo by’urubyiruko, bikabapima ku bushake ndetse bagahabwa inama z’uko bakwitwara bakirinda ubwandu bwa virusi itera SIDA.

  • AKIMANA JEAN DE DIEU
  • Ukuboza 4, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE