Muhanga: Bihagarika hagati y’inzu z’ubucuruzi kubera kubura ubwiherero

  • Imvaho Nshya
  • Ugushyingo 9, 2023
  • Hashize amezi 6
Image

Abaturage bakorera mu mujyi wa Muhanga baravuga ko inzego bireba zikwiye guhagurukira inzu zitandukanye zitagira ubwiherero, bigatuma abazigana n’abazikoreramo bakora ingendo bajya gushaka aho bihagarika hagati y’inzu z’ubucuruzi.

Abo baturage bemeza ko zimwe mu nzu z’ubucuruzi yubatswe kera mu myaka hagati ya 1980- 2000 bityo ubwiherero zubakwanywe bwagiye bwuzura, bigatuma hari naho bagira ibyumba byo gukorerwamo hakibagirana iyi serivisi kugera naho abantu ubwabo bihagarika hagati y’inzu z’ubucuruzi.

Karemera Didace ni umuturage utuye mu Mudugudu wa Nyarucyamu II mu Kagali ka Gahogo avuga ko zimwe mu nzu z’ubucuruzi zitagira ubwiherero akemeza ko bibangamira abahagana ku buryo bizanatuma babatakaza.

Yagize ati: “Nyinshi mu nzu z’ubucuruzi ntizigira ubwiherero kandi zizwi ariko birabangamye cyane kuko usanga abahagana bashobora kwifuza iyi serivisi ntiyayibona ibi rero bishobora gutuma batakaza ababagana kuko bamusaba ubwiherero akababwira ko nta buhari ugashaka aho wihagarika rimwe na rimwe tuhanywera inzoga tukihagarika ku bikuta”.

Mukakamali Speciose avuga ko nyinshi mu nzu zikorerwamo na za Butiki ndetse n’amangazini menshi udashobora gusabamo iyi serivisi kuko nta bwiherero bagira naho buri usanga bukoreshwa n’abantu benshi harangwa umwanda hari n’inzira zica hagati y’inzu habaye  ubwiherero.

Ati: “Muri izi nzu zikorerwamo na butiki ndetse n’amaduka menshi ntabwo zigira izi serivisi z’ibanze na bo bibasaba kujya kuzisaba ahandi kuko nta bwiherero izo nzu zigira kandi usanga naho usanga budafite isuku bigatuma tujya kwihagarika mu nzira zisanzwe zinyuramo abantu rwose”.

Umumotari ukorera mu mujyi wa Muhanga Niyigeza Papias, avuga ko bigoye abantu bakorera mu mujyi kuko usanga ubwiherero rusange buri muri gare gusa ubundi bukaba ku isoko rya Muhanga akemeza ko ushatse iyo serivisi yifashisha gare avuye mu iduka akoreramo kandi iyo nzu ikwiye kugira ubwiherero.

Yagize ati: “Twebwe abakorera hano mu mujyi usanga kuhabona ubwiherero rusange bidusaba kugana kuri gare cyangwa ku bwiherero rusange ariko aho buri, usanga rwose ari kure y’izi nzu nyinshi za hano mu mujyi bazikoreramo bajya ahandi kubushakayo”.

Niyonsenga Jean Marie Vianney yibaza impamvu ba nyiri izo nzu badasabwa gushyiramo ibikenewe byose kuko inyinshi mu nzu zubatswe kera zidafite ibyakenerwa n’uwo ari we wese kandi si inzu ziciriritse gusa hari inzu zigeretse zitagira ubwiherero abazikoreramo bibasaba kubushakira ahandi.

Ati: “Perezida w’Urugaga rw’Abikorera mu Karere ka Muhanga, Kimonyo Juvenal avuga ko ubundi inzu ikorerwamo igomba kuba yujuje ibisabwa kandi igahabwa icyangombwa n’urwego rubifitiye uburenganzira.

Umuntu rero ukorera mu nzu itabyujuje aba nawe yihemukira dukwiye kujya dukorera ahantu umuntu yakugana akagusangana serivisi z’ibanze zamufasha”.

Umuyobozi w’Akarere ka Muhanga Kayitare Jacqueline, yatangarije Imvaho Nshya ko iki kibazo batari bakizi bagiye kugikurikirana, agakebura ababa bafite inzu zitujuje ibisabwa.

Yagize ati: “Ntabwo nemeranya nabo bavuga ko dufite ikibazo cy’ubwiherero mu nzu z’ubucuruzi ariko turemeranya ko izi nzu zubatswe kera kandi zishaje dusaba ba nyirazo kureba niba ibyo abahahira muri izi nzu bavuga ari byo, natwe tugiye kubikurikirana tubihe umurongo”.

Akomeza asaba abacuruzi ko gukorera mu nzu zujuje ibikenerwa byose kugira ngo uzabagana azabashe kubona ibyo yifuza n’iyo serivisi nayikenera ayihabwe ariko bikomeje gutya nabakugurira bagucikaho kubera ko ukorera ahantu hatabafasha.

Umujyi wa Muhanga ugaragaramo inzu bigaragara ko zishaje binagaragara ko zikwiye gusenywa hakubakwa inzu zijyanye n’igihe nkuko igishushanyombonera kibiteganya n’ibibazo by’ubwiherero byaba bibonewe igisubizo.

Imbere y’imiryango biba bigaragara ko ari isuku ariko impande y’inyubako aba ari umunuko gusa

AKIMANA JEAN DE DIEU

  • Imvaho Nshya
  • Ugushyingo 9, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE