Muhanga: Bashengurwa n’ibikorwa remezo byo gukaraba intoki bitagikoreshwa

  • AKIMANA JEAN DE DIEU
  • Gashyantare 27, 2024
  • Hashize amezi 2
Image

Bamwe mu baturage bo mu Mujyi wa Muhanga bavuga ko bababazwa n’ibikorwa remezo byo gukaraba intoki biri ahantu hatandukanye ariko bikaba bitagikoreshwa, bakavuga ko kudohoka gukaraba intoki byatuma bandura indwara z’ibyorezo.

Babivuga mu gihe Minisiteri y’Ubuzima iheruka gutangaza iby’indwara y’amaso yandura cyane, ariko ishobora kwirindwa umuntu akaraba intoki kenshi akoresheje amazi meza n’isabune.

Uretse n’iyo ndwara kandi indwara nyinshi z’ibyorezo ndetse n’izikomoka ku mwanda zishobora kwirindwa binyuze mu gukaraba intoki kenshi.

Ubukarabiro bwashyizweho mu gihugu hose, ubwo u Rwanda rwifatanyaga n’Isi mu rugamba rwo guhangana n’icyorezo cya COVID-19.

Hari bamwe mu babona gahunda yo gukaraba intoki itari kugarukira gusa ku kuba iki cyorezo cyaregenje make, kuko ari umuco mwiza utagakwiye kurangirira kuri icyo cyorezo gusa.

Bamwe mu baturage babashije kuvugana na Imvaho Nshya bemeza ko ahahoze ubukarabiro mu gihe cya COVID-19 haba ahahurira abantu benshi ku masoko no ku nzu z’ubutegetsi usanga nta mazi abamo.

Karekezi Leonard avuga ko ubu bukarabiro butagikoreshwa bugikoreshwa kandi hari ibindi byorezo byakwandura.

Yagize ati: “Mu bihe by’icyorezo cya COVID-19 hari ingamba zo kwirinda abantu bagakaraba ariko nyuma y’aho ntabwo abantu bagikaraba ahubwo nkanjye ngira ubwoba bw’uko haramutse haje icyorezo runaka twacyanduzanya byihuse kubera ko izi ngamba zagakwiye kugaruka.”

Umulisa Janviere avuga ko akorera mu isoko rya Kijyambere rya Muhanga, ariko akaba ababazwa n’uko ubwo bukarabiro butakibonekamo amazi.

Yagize ati: “Njyewe nsanzwe nkorera ku isoko rya kijyambere rya Muhanga, ariko ahantu hose haba ubukarabiro ntabwo bukoreshwa ndetse no ku maduka habaga za Kandagira ukarabe ndetse abantu bakibutswa gukaraba ariko byarahagaze ubona abantu batabyitaho.”

Mugenzi Xavier avuga ko abayobozi badohotse, akemeza ko hakwiye izindi ntege ariko akongeraho ko ishami rya Muhanga rishinzwe isuku n’isukura rikwiye kujya ritanga amazi kuko ahenshi no kuba nta mazi ahari nabyo bitiza umurindi abadakaraba.

Umuyobozi Mukuru w’Ibitaro bya Kabgayi, Dr Jean Baptsiste Muvunyi avuga ko abantu bakwiye kugerageza n’ubwo igihugu kitari mu bihe bidasanzwe, ariko abantu bakwiye gukaraba kuko byafaha kwirinda indwara zikomoka ku mwanda, ariko tunibuka ko ibyorezo bishobora kwaduka bikatugeza kure.”

Umuyobozi w’Itsinda ry’Abasenateri  muri Komisiyo y’Imibereho Myiza y’Abaturage n’uburenganzira bwa Muntu Dr Cyprien Niyomugabo, avuga ko abantu bakwiye kongera kugira umuco wo gukaraba bakirinda ibyorezo bishobora kwaduka bikomotse ku mwanda.

Akomeza avuga ko abakorerabushake biteguye gufasha abantu gukaraba bityo rero ahantu hari ubukarabiro abantu bakwiye kuhakoresha neza.

Yagize ati: “Abantu bakwiye kwirinda kurushaho kuko usanga twarongeye kumva ko ibyorezo byaterwa n’umwanda bigihari ndetse twe kwirara kuko no mu nsengero usanga abantu bahoberana kandi hari abantu barwaye inkorora zikomeye; abantu bakwanduzanya biradusaba kurushaho kwirinda.”

Mu cyumweru gishize ni bwo itsinda ry’abasenateri ryasuye Ibitaro bya Kabgayi, bareba uko serivisi zitangwa ndetse bakomereza urugendo kuganira n’abakora mu buzima ku ngamba zikwiye  gufatwa mu kwirinda indwara z’ibyorezo.

Kuva ingamba zo kwirinda icyorezo cya COVID-19 zakoroshywa abantu barushijeho kwirara ntibongera gukaraba intoki nkuko byari bisanzwe, abenshi bakavuga ko hagize icyorezo cyaduka cyagarika imbaga gusa usanga naho abacuruzi bagiraga kandagira ukarabe ku maduka yabo barazibitse.

  • AKIMANA JEAN DE DIEU
  • Gashyantare 27, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE