Muhanga: Barubaka ubwanikiro 60 mu kurinda umusaruro kwangirika

  • AKIMANA JEAN DE DIEU
  • Werurwe 1, 2024
  • Hashize amezi 2
Image

Abaturage batuye mu Mirenge ya Shyogwe, Cyeza, na Muhanga mu Karere ka Muhanga, bashimishijwe no kuba barimo kubakirwa ubwanikiro buzabafasha gufata neza umusaruro w’ibigori w’igihembwe cy’Ihinga cya 2024 A.

Abaturage bavuga ko kubakirwa ubwanikiro bigiye kubarinda ibihombo bituruka ku kwangirika kubera kudafatwa neza mu gihe cy’isarura.

Gashema Elisaphan ashimira Leta yabatije ubutaka buzubakwaho Sitade Mpuzamahanaga i Shogwe mu Kagari ka Mubuga akemeza ko umusaruro bejeje urenze ubushobozi bwo kwibonera ubwanikiro.

Yagize ati: “Turashimira Akarere kaduhaye ubu butaka buzubakwaho sitade mpuzamahanga kandi baduhaye n’amafumbire none twejeje umusaruro mwinshi banadufasha kubaka ubwanikiro bwo kudufasha gufata neza umusaruro wacu kugira ngo utangirika ukadupfira ubusa.”

Mujawimana Priscille, umuhinzi wa Koperative ya IABM/Makera ikorera mu gishanga cya Makera kiri hagati y’Umurenge wa Nyamabuye na Cyeza, avuga ko ubwanikiro barimo kubakirwa buzabafasha gufata neza umusaruro wabo bakawugurisha bakiteza imbere.

Yagize ati: “Twabonye umusaruro mwinshi ku buryo ubwanikiro twari dufite ntabwo twese twabwifashisha ngo bishoboke twahoraga twumva ko umusaruro wacu ushobora kudupfira ubusa cyangwa tukajya kwanika mu rugo ariko ubu twizeye ko tuzagurisha tukiteza imbere kuko ni cyo duhingira.”

Umuyobozi w’Akarere ka Muhanga Kayitare Jacqueline, avuga ko bishimira umusaruro w’ibigiro byabonetse mu gihembwe cy’ihinga cya 2024 A.

Bityo nyuma yo kubona ko umusaruro ushobora kuzapfa ubusa hashyizweho ingamba zo kubaka ubwanikiro bw’igihe gito bwo kwifashishwa.

Yagize ati: “Turishimira ko umusaruro w’Igihingwa cy’ibigori cyahinzwe mu gihembwe cy’Ihinga cya 2024 A, twabonye ko tudafashije abaturage bacu umusaruro wabo ushobora kubapfira ubusa dufasha abaturage kubaha ibiti kugira ngo bubake ubwanikiro bwakoreshwa by’igihe gito kugira ngo batazasonza kandi barejeje.”

Akomeza avuga ko mu Karere kose barimo kubaka ubwanikiro bw’igihe gito 60 buza busanga ubundi  bwanikiro bukomeye 42 busanzwe bukoreshwa.

Nanone kandi hari n’ubundi bwanikiro 19 bigaragara ko bukeneye gusanwa, ndetse ngo barimo kubikoraho kugira ngo na bwo bukoreshwe muri iki gihe umusaruro w’ibigori wiyongereye ku buryo bufatika.

Nubwo harimo kubakwa ubu bwanikiro, nta ngano y’umusaruro igaragazwa ko ri yo izabonekamo ariko nibura ku bwanikiro 60 hamaze kubakwa 40 hasigaye kubakwa 20, bivuze ko bwose burangiye abahinga ibigori bazaba bafite ubwanikiro 121.

  • AKIMANA JEAN DE DIEU
  • Werurwe 1, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE