Muhanga: Barishimira ko bishyuwe amafaranga akomoka ku bwishingizi bw’ibirayi byarumbye

  • Imvaho Nshya
  • Ukwakira 7, 2023
  • Hashize amezi 8
Image

Abahinzi ba Koperative y’Abahinzi borozi ya Ndiza (COIABINDI) iravuga ko yishimiye ubuvugizi yakorewe ikishyurwa na Sosiyete ya SONARWA amafaranga ibuhumbi 350 akomoka ku bwishingizi bw’Ibihingwa batanze bakaba bari bamaze amezi asaga 8 bategereje kwishyurwa.

Mu kiganiro Perezida wa Koperative ya COIABINDI, Mwambari Anastase yatangarije Imvaho Nshya ko ashima ubuvugizi bakorewe kugira ngo sosiyete yabahaye ubwishingizi ibishyure anavuga ko bari bamaze amezi 8 batarabasha guhabwa amafaranga babariwe.

Yagize ati: “Turashimira igitangazamakuru cyabashije kugaragaza akababaro kacu kuko ubu twamaze kubona amafaranga y’u Rwanda 350.000 kuri konti yacu, byadushimishije kuko bamwe mu banyamuryango bari baratangiye kudufata nabi ko ari twebwe dutuma batabaha amafaranga kuko hari hashize igihe kirekire tutishyurwa, ariko birarangiye turishyuwe”.

Umuhinzi wa Koperative ya COIABINDI, Niyomugaba Innocent avuga ko muri ayo mezi 8 byakuruye umwuka mubi hagati y’ubuyobozi bwabo n’abo banyamuryango kuko twagize ngo barayabonye barayirira.

kuko burya umuhinzi atanga ubwishingizi kugira ngo buzamugoboke igihe atabashije kubona umusaruro yateganyaga kubera izuba cyangwa ibiza byatwaye ibihingwa ntiweze.

Ati: “Gutinda guhabwa amafaranga y’ingurane twagombaga guhabwa kubera ko twarumbije ibirayi byateye umwuka mubi mu banyamuryango kuko twakekaga ko bashobora kuba barayabonye bakayirira, ariko buriya dutanga ubwishingizi kugira ngo buzatugoboke mu gihe tuzaba tutabashije kweza ibyo twahinze byangijwe n’izuba cyangwa habayeho ibiza ibyahinzwe bigapfa tugahomba”.

Turikunkiko Venant we yatangarije Imvaho Nshya ko nyuma yo guhabwa amafaranga yabo bishimye kandi byatumye bagarurira icyizere Sosiyete z’ubwishingizi.

Yagize Ati: “Birababaje kubona tujya kwaka amadeni kandi hari amafaranga yagombye kudutabara kubera ubwishingizi twatanze muri sosiyete baratinze kuyaduha, ibi rero byagabanyije icyizere twari dufitiye iyi gahunda yo gutangira ubwishingizi ibihingwa n’amatungo kubera gutinda guhabwa aya mafaranga twabariwe”.

Yankurije Scolastique avuga ko bifuza ko mu gihe babariwe bitazajya bitegereza ko hahingwa ibindi bihingwa kuko usanga ibyo bahinze batabifatira ubwishingizi kandi Sosiyete itarabasha kwishyura n’ibya mbere.

Ati: “Ubundi twifuza ko mu gihe twatanze ubwishingizi bukwiye kutwishyura mbere yuko duhinga ibindi bihingwa kugira ngo twifashishije amafaranga twishyuwe, tunayifashishe dushaka umuhinzi, imbuto ndetse n’ifumbire kuko iyo tutayabonye biratugora kongera gufata ubundi bwishingizi bw’ibihingwa tugiye guhinga”.

Yongeyeho ko bifuza ko mu gihe babashije gutanga ubwishingizi bw’ibihingwa byabo sosiyete nayo ikwiye kwihutira kubishyura kugira ngo na bo babashe kubona amafumbire y’ibindi bihingwa baba bagiye gukurikizaho.

Umuyobozi muri Minisiteri y’ubuhinzi n’ubworozi ushinzwe Gahunda ya Leta y’Ubwishingi bw’ibihingwa n’amatungo (Tekama urishingiwe Muhinzi mworozi), Museruka Joseph avuga ko abari muri Tekana bakwiye kujya bareba neza niba banditse neza amazina nyayo ya Koperative zabo ndetse bakanakurikirana kurushaho ngo bamenye niba koko babariwe kandi bagomba kwishyurwa.

Akomeza avuga ko iminsi 14 bamaze kukubarira iba ihagije ukamenya niba ugomba guhabwa amafaranga cyangwa utagomba kwishyurwa, bityo waba utabyumva kimwe n’abaguhaye ubwishingizi bikagaragazwa mu nyandiko kandi bigasuzumwa n’inzego zibifitiye ububasha.

Yibutsa ko iyo bakoze igenzura bagasanga zimwe muri Koperative zitanga ubwishingizi ndetse n’amatsinda mato y’abahinzi ugasanga bagiye bandikisha amazina adahura nayo bafite cyangwa ugasanga na telefoni yakoresheje yandikisha itakibaho kandi uwanditswe ni we ukwiye no gukurikirana neza aho bigeze n’ikibura kugira ngo bishyurwe.

Gahunda ya Leta y’ubwishingizi izwi nka “Tekana urishingiwe Muhinzi mworozi” ikorera mu gihugu cyose ikaba yishingira abahinzi borozi bishyura 60% naho 40% ya Nkunganire igatangwa na Leta hakishingirwa ibihingwa birimo ibigori, ubutubuzi bw’imbuto z’ibigori, umuceri, ibirayi, urusenda, imiteja, imyumbati, ibishyimbo, bishingirirwa n’ibishyimbo bigufi na Soya.

Ibihinga byishyurwa ni ibyahuye n’imyuzure , umuyaga, imvura nyinshi, izuba ryinshi, urubura cyangwa amahindu, isuri n’inkangu, Indwara n’ibyonnyi byarwanyijwe ntibikire n’inkongi z’umuriro.

AKIMANA JEAN DE DIEU

  • Imvaho Nshya
  • Ukwakira 7, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE