Muhanga: Barashimira Perezida Kagame wabagejejeho “Hybride” bagakirigita ifaranga

  • AKIMANA JEAN DE DIEU
  • Mutarama 25, 2024
  • Hashize amezi 4
Image

Abahinzi bahinga ibigori muri Koperative y’Abahinzi-borozi ya Makera (IABM) ikorera mu gishanga cya Makera mu Murenge wa Nyamabuye na Cyeza barashimira Perezida wa Repubulika Paul Kagame wafashije abahinzi kubona Nkunganire ku mbuto bahinga bakavuga ko byabafashije gukirigita ifaranga bashinga n’Uruganda.

Mu kiganiro bahaye Imvaho Nshya bavuga ko mbere yo gufashwa kubona imbuto kuri nkunganire byatumaga bateza neza kubera guhinga imbuto babonye zose.

Imbuto y’ibigori ya Hybride bayunganira kuri 60% agatangwaa na Leta naho 40% igatangwa n’umuhinzi ubwe, ku buryo ikiro cy’ibigori ugie kukigurira watanga amafaranga y’u Rwanda 2350, ariko kuri Nkunganire batanga 1700 frw.

Ndayisabye Pascal avuga ko bashimira Leta y’u Rwanda yabafashije kubona imbuto ya “Hybride” bayihinze ikabungura cyane ikilo bakigurisha amafaranga y’u Rwanda 1200 bavuye kuri 350, kandi byamfashije kwiteza imbere ngura amasambu ndetse n’amatungo magufi n’amaremare.

Ati: “Turashimira Nyakubahwa Perezida wa Repubulika Paul Kagame kuko yaduhaye imbuto nziza ya “Hybride” kuko mbere twarahingaga tukeza tukagurisha ikilo kimwe cy’ibigori amafaranga 350 (350 frw) ariko dutangiye guhinga ibigori byiza ikilo kimwe tukigurisha 1200 (1200frw) ndetse twamaze no kwiteza imbere tugura amasambu n’amatungo magufi n’amaremare twohereza abana bacu mu mashuri meza”.

Imbuto ya Hybride yfashije abahinzi gukirigita ifaranga

Mujawayezu Therese avuga ko kuva yatangira guhinga ibigori bya Hybride atarasonzana umusaruro.

Yagize ati: “Kuva natangira guhinga ibi bigori sinigeze nsonza iwanjye kuko n’iyo mbonye bigiye kwanga nifashisha Koperative ikamfasha, n’iyo byanze baratuguriza tukazishyura twamaze gusarura kandi tuba twizeye ko tuzabona umusaruro ukwiye nubwo dushobora gukomwa mu nkokora n’amapfa n’ibiza”.

Munyaneza Laurien avuga ko mbere yo gufashwa kubona imbuto iguriwe kuri Nkunganire batashoboraga kubona umusaruro mwiza kuko bezaga ibilo nka 50 bikabatera igihombo.

Ati: “Mbere y’uko tuzanirwa imbuto nziza zo guhinga twarahingaga ntitubashe kweza tukabona umusaruro muke ku buryo wasangaga umuhinzi yejeje ibilo 50 gusa kandi yahinze ubutaka bugari”.

Mukandayisaba Francine avuga ko mbere yo guhabwa imbuto nziza nta jambo ry’umuhinzi kuko ntacyo yakuragamo.

Ati: “Mbere twarahingaga ugasanga umuhinzi nta jambo agira imbere y’abandi bakora ibindi kuko warezaga wagurisha waha umwana amafaranga y’Ishuri akajya kwiga hari igihe wasangaga usigara waka amadeni mu tubutiki kugira ngo abo mu rugo babashe kubaho”.

Perezida wa Koperative ya IABM, Mukankusi Alphonsine avuga ko bashimira Perezida wa Repububurika Paul Kagame wabonye ko dukwiye guhinga ibi bigori bya “Hybride” bikadufasha gutera imbere ndetse akabona ko bidahagije akatwunganira ku biciro byaba iby’imbuto ndetse n’ifumbire.

Akomeza avuga ko mu myaka 3 nibura bejeje toni zisaga 769.730 (769.730.000 kg) kandi bakagurisha amafaranga ashobora no kurenga 1000 ku kilo kimwe umuhinzi akabasha kubona amafaranga kandi tugasagurira n’uruganda rwacu tugakora akawunga twise Ishema rya Makera kandi dufite amasoko menshi tugemuraho imbuto n’ifu y’Ibigori (Akawunga).

Minisitiri w’Ubuhinzi n’Ubworozi, Dr Musafiri Ildephonse avuga ko Igihugu gishyize imbere gahunda yo gukomeza gushakisha imbuto nziza, bahereye ku bushakashatsi hagamijwe gushaka igisubizo kirambye mu kubonera abahinzi imbuto nziza zigezweho kandi zitanga umusaruro uhagije.

Akomeza yibutsa abahinzi ko mu gihe utahingiye ku gihe umusaruro utuba bityo bakwiye gukurikiza inama z’abajyanama mu by’ubuhinzi.

Mu minsi ishize ibiciro ku masoko byarazamutse hagatungwa  agatoki zimwe mu mbuto zihabwa abahinzi zidafite ubuziranenge bwo guhangana n’ubutaka zigiye guhingwamo kuko zatuburiwe ahandi bityo  zikaba zidashobora kwihanganira ubutaka zigiye guhingwamo.

Gusa hari n’ahandi bagaragaza ko bakwiye guhabwa imbuto zabafasha kujya basimburanya mu buhinge kuko uko uhinga imbuto 1 igeraho ikanga ubutaka ihingwaho.

  • AKIMANA JEAN DE DIEU
  • Mutarama 25, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE