Muhanga: Barasaba ubuyobozi guhagurukira abagurisha kole inzererezi zirirwa zihumeka 

  • AKIMANA JEAN DE DIEU
  • Mutarama 8, 2024
  • Hashize amezi 5
Image

Bamwe mu bakorera mu mujyi wa Muhanga n’abawugendamo barasaba inzego bireba harimo n’Akarere ko bakwiye guhagurukira ikibazo cy’inzererezi zirirwa zisabiriza ari nako zikurura kole isanzwe ikoreshwa mu nkweto mu maboko y’imipira bambaye.

Ibi babigarutseho mu kiganiro bahaye Imvaho Nshya basaba ko hahagurukirwa abadozi b’inkweto ndetse naho zicururizwa kuko ariho aba bana bazigura.

Uwimana Theresie avuga ko umubare w’abana b’inzererezi ukomeje kwiyongera bigaragara kandi kuko abo bana birirwa banywa kole ku kigero cyo hejuru.

Akomeza yemeza ko bidakwiye ko abantu bakuru bakomeza kurebera abana b’Igihugu bakomeza kwimenamo ibi biyobyabwenge.

Yagize ati: “Twebwe tuba muri uyu mujyi tubona abana benshi b’inzererezi banywa kole ikoreshwa mu nkweto bo bita kujya muri “swingi” kandi bayinywa ari benshi turasaba abantu bakuru ko bidakwiye kubona umwana anywa ibi bintu ugahita, ukarebera gusa birabangiza ejo habo heza hazabe amateka”.

Niyizigama Landuard avuga ko benshi mu bana bagaragara mu bice by’uyu mujyi usanga bagura kole ahantu hashobora kumenyekana bagasaba inzego z’ubuyobozi gushaka ababigurisha abo bana.

Yagize ati: “Izi kole aba bana banywa ubakurikiranye neza bahakwereka kandi ababifatirwamo bakwiye kubiryozwa kuko barimo kuroga Igihugu cyacu cy’ejo hazaza. Twebwe biratubabaza inzego bireba nizihaguruke zikurikirane ababigiralo uruhare”.

Kayirangwa Isabelle yatangarije Imvaho Nshya ko usanga abagurisha aba bana kole batayiha abana babo bityo uzafatwa azabiryozwa n’inzego zabahana zihanukiriye.

Ati: “Twebwe biradutangaza kuko uyu muntu ugurisha aba bana kole ntashobora kuyiha abana be, twebwe turasaba ko abantu bazafatirwa muri ibi bikorwa babiryozwa twese tukabimenya”.

Umuyobozi w’Ishami rishinzwe kurwanya ikoreshwa ry’Ibiyibyabwenge mu Kigo cy’Igihugu cy’Ubuzima mu Rwanda (RBC) Ndacyayisenga Dynamo avuga ko bidakwiye kubona umwana muto agurishwa imiti Ndacyayisenga Ndacyayisenga Dynamo avuga ko bidakwiye kubona umwana muto agurishwa imiti n’ibindi bigize urusobe rw’ibinyabutabire binyobwa bishobora kwangiza imikorere karemano y’umubiri we  kandi byangiza imitekerereze y’ejo hazaza kuri aba bana.

Akomeza avuga ko Umwana uhawe inzoga akiri muto hari ibyo adashobora kugeraho bitewe n’uko mu mikurire ye hari ibice bimufasha gufata mu mutwe bitakaza ubushobozi ndetse hakaba n’igice kigenzura amarangamutima ye gikura nyuma y’ibindi cyangirika umuntu agakura ari umurakare.

Ubuyobozi b’Akarere buhamagawe  ngo bugire icyo butangaza kuri icyo kibazo ntibwitabye ndetse bwanandikiwe ubutumwa bugufi kuri telefoni no ku ikoranabuhanga tubura udusubiza ibi bibazo.

Itegeko Nimero N°71/2018 ryo ku wa 31/08/2018 ryerekeye kurengera umwana mu ngingo yaryo ya 27 ivuga ko guha umwana inzoga cyangwa itabi cyangwa kubimugurisha u muntu wese uha umwana inzoga cyangwa itabi aba akoze icyaha. Iyo abihamijwe n’urukiko,ahanishwa igihano cy’imirimo y’inyungu rusange mu gihe kitarenze ukwezi kumwe (1). Iyo habaye isubiracyaha, igihano kiba igifungo
kitari munsi y’ukwezi kumwe (1) ariko kitarenze amezi atatu (3) n’ihazabu
y’amafaranga y’u Rwanda atari munsi y’ibihumbi ijana (100.000 FRW) ariko atarenze ibihumbi magana abiri (200.000 FRW).

Umuntu ugurisha umwana inzoga cyangwa itabi, ubimushoramo cyangwa umushishikariza kubinywa cyangwa kujya mu tubari aba akoze icyaha. Iyo abihamijwe n’urukiko, ahanishwa igihano cy’igifungo kitari munsi y’amezi atatu (3) ariko kitageze ku mezi atandatu (6) n’ihazabu y’amafaranga y’u Rwanda atari munsi y’ibihumbi ijana (100.000 FRW) ariko atarenze ibihumbi magana abiri (200.000
FRW).

  • AKIMANA JEAN DE DIEU
  • Mutarama 8, 2024
  • Hashize amezi 5
TANGA IGITEKEREZO
Karangwa Alexis says:
Mutarama 9, 2024 at 7:27 am

Ibyobintu nibyo kndi birakabije bakwiye kubihagurukira kko iyo bamaze kubinywa bagenda biyahura mumuhanda basaba igiceri bakaba bateza impanuka kubatwara ibinyabiziga

Andika igitekerezo

AMATEGEKO AGENGA IYANDIKA RY'IGITEKEREZO CYAWE