Muhanga: Bafite impungenge ku nzu za Leta zishaje zaba indiri y’ibisambo

  • Imvaho Nshya
  • Ugushyingo 3, 2023
  • Hashize amezi 7
Image

Abaturage batuye mu bice bitandukanye byo mu Karere ka Muhanga haba mu mujyi no mu bice by’icyaro barasaba Akarere ko inzu zishaje za Leta zavugururwa cyangwa zigasenywa kuko zaba indiri y’ibisambo.

Aba baturage batangarije Imvaho Nshya ko izi nzu zigenda zirushaho kwangirika ndetse zikaba zishobora gukoreshwa n’abajura batandukanye bahihisha bagamije kwambura abaturage bakunze kujya mu kazi nijoro cyangwa mugitondo.

Mukakarangwa Eularie avuga ko mu mujyi wa Muhanga hari inzu za Leta zikwiye gutunganywa cyangwa zigashyirwa ku isoko kuko ubona ziteje umwanda mu mujyi wa Muhanga.

Yagize ati: “Muri uyu mujyi hari nzu rwose bigaragara ko atakijyanye n’uyu mujyi ariko hari n’izindi zigaragara ko akwiye gusenywa cyangwa zikavugururwa akaba zatangirwamo serivisi kuko tubona ziteje umwanda mu mujyi ugaragara ko urimo gutera imbere”.

Turikunkiko Stephano ni umuturage atuye mu Murenge wa Mushishiro avuga ko aho ku Murenge hari inzu bigaragara ko zangiritse ndetse zimaze igihe zidasanwa bikaba bishobora kuba indiri y’abambura abaturage.

Yagize ati: “Inzu za Leta ntaho zitari muri aka karere ariko zamaze kwangirika bikomeye kandi twagiye dutanga ibitekerezo ko izo nzu zatunganywa zigakorerwamo ibindi kuko mu gihe zidakorerwamo zishobora kuba indiri y’ibisambo byatera abaturage cyangwa bikabambura”.

Muhirwa Jerome atuye hafi y’Umurenge wa Nyamabuye avuga ko iyi mitungo ya Leta ikwiye  gufatirwa umwanzuro uhamye kubera ko izo nzu bigaragara ko  zatangiye kwangirika, inzego zizifite mu nshingano zikwiye kwemeza icyo zakoreshwa kuko ziteye inkeke ku mutekano wacu.

Ati: “Leta ikwiye gufata umwanzuro w’icyakoreshwa izi nzu kuko biragaragara ko zamaze kwangirika kandi bikomeje gutya nta garuriro zazaba zifite, kandi twebwe tuzituriye tubona nta mutekano dufite kuko tuhanyura twikandagira nubwo ari ku muhanda”.

Umuyobozi w’Akarere ka Muhanga, Kayitare Jacqueline avuga ko izo nzu zamaze kubarurwa raporo igashyikirizwa inzego bireba, hategerejwe umwanzuro.

Ati: “Ni byo izi nzu zarabaruwe ndetse hanatangwa raporo mu Kigo cy’Igihugu cy’Imiturire ndetse na Minisiteri y’Ibidukikije ifite ubutaka mu nshingano kugira ngo barebe igikwiye gukorwa, izi nzu n’ubutaka harebwe niba hari ibyagurishwa cyangwa bisenywe hasigare ibibanza bibe byahabwa abantu babikoreshe”.

Yongeraho ko abaturage badakwiye kugira impungenge kuko raporo y’izo nzu izwi kandi umutekano wabo bafitiye impungenge urinzwe izo nzu zitazaba intandaro zo kubahungabanyiriza umutekano.

Mu karere ka Muhanga hari inzu nyinshi ziri mu bice bitandukanye zangiritse.

AKIMANA JEAN DE DIEU

  • Imvaho Nshya
  • Ugushyingo 3, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE