Muhanga: Babangamiwe no gusaba serivisi mu ruganiriro rwa Mudugudu

  • AKIMANA JEAN DE DIEU
  • Ukuboza 7, 2023
  • Hashize amezi 6
Image

Bamwe mu baturage bo mu Karere ka Muhanga bifuza kubona abayobozi b’Umudugudu babo babona ibiro bakiriramo ibibazo byabo, kuko iyo babagannye bakakirirwa mu ruganiriro rw’ingo zabo bumva batisanzuye bigatuma hari n’amakuru n’ibirego badapfa gutanga.  

Bamwe mu bavuganye n’Imvaho Nshya, barasaba Akarere kugira icyo gakora kugira ngo na ba Mudugudu bajye babona aho bakirira abaturage babagana kuko kubakirira mu ngo zabo rimwe na rimwe usanga bitagaragara neza.

Aba baturage b’i Muhanga bagaragaje izo mpungenge mu gihe, abenshi mu bayobozi b’Umudugudu mu Gihugu badafite ibiro byagenewe kwakirirwamo ibibazo by’abaturage ndetse no kubaha serivisi.

Usanga ahanini hari ba Mudugudu begereye ku Biro by’Akagari ari ho basaba abaturage kubasanga mu gihe bakeneye serivisi zihariye, na ho ibindi bibazo bigakemurirwa mu Nteko z’Abaturage, ariko na none umuturage ubasanze mu rugo baramwakira kuko nta bindi biro bizwi aba ashobora kubasangaho.

Aba baturage babwiye Imvaho Nshya ko mu cyerekezo igihugu cyihaye bidakwiye ko umuturage ajya gusaba serivisi mu ruganiriro rwa Mudugudu.

Nzayisenga Charles atuye mu Mudugudu wa Kamazuru, Akagari ka Gahogo, Umurenge wa Nyamabuye, avuga ko kutagira Ibiro by’Umudugudu bibabangamira kuko nk’umugore waraye arwanye n’umugabo adakwiye kujya kubiregera Mudugudu iwe ahubwo yakamusanze ahantu hisanzuye akamugezaho ikibazo cye.

Yagize ati: ” Kutagira ibiro byakorerwamo n’Umukuru w’Umudugudu biratubangamira kuko usanga umugore waraye arwanye n’umugabo we cyangwa n’umugabo agashaka gutanga ikirego kubivugira kwa Mudugudu mu rugo nta mutekano uba ufite utanga ikibazo cyawe.”

Mugenzi Callixte atuye mu Mudugudu wa Buriza Akagari ka Mbare mu Murenge wa Shyogwe, avuga ko aherutse kujya gusaba serivisi agasanga abagize urugo rwa Mudugudu bari ku meza.

Yemeza ko bidakwiye kujya kwakira serivisi mu rugo rw’Umukuru w’Umudugudu kuko bigoye cyane.

Yagize ati: “Njyewe mperutse kujya gusaba serivisi kwa Mudugudu ngezeyo nsanga bari ku meza bafata amafunguro mbanza gutegereza, ariko nabonye ko mubangamiye kandi ibyo naringiye kumusaba byari ibanga ariko byatumye n’abo mu rugo rwe babyumva. Rwose kwaka serivisi mu rugo rw’umuntu biragoye.”

Umuhoza Genevieve avuga ko kutagira ibiro by’Umudugudu bituma bamwe badatanga amakuru kubera ko baba batizeye umutekano wabo, mu gihe batanze amakuru ku hashobora gukorerwa ibyaha.

Yagize ati: “Kutagira ibiro by’Umudugudu bituma hari bamwe bifata mu gutanga amakuru kuko ushobora gutanga amakuru abo kwa Mudugudu ufite ibiro mu rugo bakayumva ugasanga umutekano wawe urahungabanye. Akenshi duhitamo kwicecekera ngo umutekano wacu udahungabana”.

Umukuru w’Umudugudu wahawe izina rya “Pascal” yabwiye Imvaho Nshya ko na bo batanyuzwe no gutangira serivisi mu rugo, bityo baramutse bafite ibiro bashyiraho amasaha yo kwakira abaturage bagasaba serivisi mu bwisanzure.

Umukuru w’Umudugudu wahawe izina rya “JP” avuga ko ubuyobozi bukwiye kubaha ibibanza, abaturage bagatanga Umuganda bakiyubakira ibiro by’Umudugudu, kugira ngo nibura urugo rwa Mudugudu na rwo rugabanyukemo abantu banyuranamo baje gusaba serivisi kunmanywa na nijoro.

Umuyobozi w’Akarere ka Muhanga Kayitare Jacqueline avuga ko hashize imyaka ibiri hanozwa uburyo bwo gutanga serivisi n’aho zitangirwa ku Tugari.

Yavuze ko mbere yo gutekereza kubaka ibiro by’Imidugudu batangiye kunoza aho gukorera ku rwego rw’Umurenge no ku Kagari, aho hamwe hubatswe ibiro bishyashya mu Tugari tutagiraga ibiro.

Yaboneyeho gukomoza ku kuba  harimo kubakwa n’Ibiro bishya by’Umurenge wa Nyamabuye, bityo uko ubushobozi buzarushaho kuboneka bazagenda bakora n’ibiro by’izindi nzego.

kubaka Ibiro by’ Umurenge wa Nyamabuye ndetse twanubatse Ibiro by’ Umurenge wa Nyarusange.

Minisiteri y’Ubutegetsi bw’Igihugu (MINALOC) yo ivuga ko Umukuru w’Umudugudu afite inshingano z’ubukangurambaga gusa, ndetse ngo ntatanga serivisi, abaturage bakaba bashishikarizwa kujya batangira ibibazo byabo mu Nteko Rusange z’Abaturage ziterana buri cyumweru.

MINALOC ivuga ko nta mpamvu yo kujya mu rugo rw’Umukuru w’Umudugudu, bagomba gutegereza Inteko cyangwa bakajya ku Kagari, kuko ni ko gafite ishingano yo gukemura ibibazo ndetse kanafite izo nshingano muri make.

Akarere ka Muhanga gafite Imirenge 12 igizwe n’Utugari 63, natwo dufite Imidugudu 331.  Abaturage bo bifuza ko habaho ubufatanye na bo bakagira uruhare mu kubakira ba Mudugudu ibiro byo gukoreramo.

  • AKIMANA JEAN DE DIEU
  • Ukuboza 7, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE