Muhanga: Babangamiwe n’abasubira mu bwambuzi nyuma yo kurekurwa

  • AKIMANA JEAN DE DIEU
  • Mutarama 16, 2024
  • Hashize amezi 4
Image

Bamwe mu baturage batuye mu bice by’Umujyi wa Muhanga mu Karere ka Muhanga, babangamiwe n’insoresore zifatirwa mu bikorwa by’ubwambuzi nyuma y’igihe gito zikarekurwa zigahita zibisubiramo.

Hari bamwe mu bamaze gufatwa inshuro nyinshi ariko barekurwa nyuma y’igihe gito bakongera gufatirwa mu bikorwa byo kwambura abaturage.

Abavuganye n’Imvaho Nshya bemeza ko abafatirwa muri ibyo bikorwa no guhungabanya umutekano w’abaturage barekurwa, batuma bahorana igishyika bumva ko nta gihe bazumva batekanye mu gihe baba bazi ko n’abo babona bafashwe bahita barekurwa.

Bavuga ko bibabaza kubona uwabambuye yongera kuza kubishima hejuru ko ntacyo bakoze bajya kubafungisha.

Murema Desire avuga ko aherutse gusabana n’abandi atinda gutaha, agiye kugera mu rugo aho atuye bamwambura amafaranga na telefoni ariko ntabwo byateye 2 kuko nongeye kubabona barekuwe.

Yagize ati: “Bagenda bameze nk’ikipe umwe iyo akwambuye ukavuza induru barajijisha, kuko nanjye ejobundi nasabanye na bagenzi banjye ku kabari ntashye baranyambura ndanabamenya birangira bafashwe barongera bararekurwa.”

Semanyenzi Deogratias  na we avuga ko aherutse gutaha agiye kugera hafi y’aho bita kwa Raina ku mashuri abona abantu baturutse imbere ye baramwambura amenyamo umuntu umwe aza no kwemera ko yamwibye.

Yagize ati: “Mperutse gutaha banyamburira hafi yaho bita kwa Raina ku ishuri, barirukanka. Ariko baza kubona ari abantu bari ku rugendo kimwe nkawe kuko ubona imbere yawe bagenda wahindukira ugasanga n’inyuma hari abandi. Iyo bigenze gutyo ukuramo byose ukabaha gusa namenyemo umuntu anemera ko yanyibye baramufata, aragaruka kuko yemeye kunsubiza amafaranga na telefoni yanjye bari batwaye”.

Mukashyaka Jeannette avuga ko bibabaza kubona umuntu afatwa akekwaho kwambura abantu akongera kugaruka abona ko ntacyo bamukoraho.

Yagize ati: “Mperutse gutaha banshikuza isakoshi yarimo amafaranga ibihumbi 60 na telefoni, ngundagurana na bo bandusha imbaraga barayitwara. Ariko biradutangaza iyo tubonye bagarutse kuko ubundi ufatanywe igihanga agomba kubiryozwa ariko bagaruka bigamba ko ntacyo twakoze kandi tuba tubabona”.

Nkurunziza Thomas na we ati: “Akenshi hari n’abo tubona bafatanywe ibimenyetso by’ibyo bibye tukabona baragarutse nk’aho nta cyabaye, inzego bireba zijye zinadusobanurira impamvu agarutse.”

Umuvugizi wa Polisi y’u Rwanda mu Ntara y’Amajyepfo SP Emmanuel Habiyaremye, avuga ko hari abantu benshi batarasobanukirwa impamvu umuntu afatwa akongera akagaruka.

Yagize ati: “Ubundi niba ubonye ugukoreye icyaha afashwe ukwiye gukurikirana, gutanga ikirego. Kuko iyo utagitanze ngo ukurikirane ikibazo cyawe, bituma ashobora kurekurwa kuko ntabwo twakomeza kumufunga ,umuntu rimwe na rimwe atafatiwe mu cyuho kuko we ntitwamufatana ibyo yashikuje cyangwa yibye.”

Akomeza yibutsa uwambuwe akamenya uwamwambuye ko agomba kurega akanatanga abagabo mu gihe bahari cyangwa n’ibindi bimenyetso byashingirwaho hatangwa ubutabera.

SP Habiyaremye yibukije abahungabanya umutekano w’abantu n’ibyabo ko batazihanganirwa kuko inzego z’umutekano zirahari kugira ngo zicungire rubanda n’ibyabo umutekano.

Yaboneyeho gusaba abaturage kujya batungira agatoki inzego z’umutekano abantu bose bafite imyitwarire igaragaza ko nta kazi bafite ariko bashaka kubaho ruzungu, by’umwihariko bakamenyesha Polisi aho bakunze gutegera abagenzi bakahafatirwa.

Akomeza yibutsa abafite umugambi wo kubuza umudendezo abaturage ko bakwiye gukura amaboko mu mufuka bakirinda gushaka kurya batavunitse.

Polisi y’u Rwanda yaboneyeho kuvuga ko imaze iminsi mu bikorwa byo gufata insoresore zijandika mu bujura no kwambura abaturage.

Bamwe mu bafatirwa mu bikorwa by’ubwambuzi basanganwa intwaro gakondo
Bamwe mu bafatirwa mu bikorwa by’ubujura bararekurwa bagataha bigamba ku babafungishije
  • AKIMANA JEAN DE DIEU
  • Mutarama 16, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE