Muhanga: Babangamiwe n’abacuruzi badakozwa gutanga fagitire za EBM

  • AKIMANA JEAN DE DIEU
  • Ukuboza 10, 2023
  • Hashize amezi 5
Image

Bamwe mu baguzi bagana abacururiza mu Mujyi wa Muhanga baravuga ko abenshi mu bacuruzi badakozwa ibyo gutanga inyemezabwishyu (fagitire) y’ikoranabuhanga (EBM) kandi babishyuye amafaranga bazi ko ariho n’imisoro bagomba gusubiza mu isanduku ya Leta.

Bavuga ko na bamwe mu bagerageza gutanga iyo nyemezabwishyu bashyiraho igiciro kiri hasi y’amafaranga bishyuye.

Abacuruzi bo bavuga ko kudatanga fagitire ndetse no gutanga izanditseho amafaranga atajyanye n’ayo umuguzi yishyuye biterwa n’uko baba baranguye mu nganda zitandukanye, hari abafite ibicuruzwa babonye mu buryo bwa magendu cyangwa bararanguye mu nganda zitandukanye.

Nzagibwami Enock ni umwe muri abo baguzi, uvuga ko benshi mu bacuruzi badatanga fagitire kandi ari bo bakagombye kuyitanga bibwirije.

Yagize ati: “Rwose muri uyu mujyi wacu dufite abacuruzi benshi badatanga fagitire ku buryo uyimwaka ukabona ntashaka kubikozwa”.

Kalisa Jean Jules avuga ko urebye uko abantu bitabira gutanga fagitire bibabaje kubona umuntu aguhahiye aho kumuha fagitire ijyanye n’ibyo ahashye ugasanga bagushyiriyeho amafaranga make kandi wishyuye menshi.

Yagize ati: “Njyewe iyo nguze ngomba kwaka fagitire y’ibyo nguze ariko usanga abacuruzi badakozwa ibijyanye no gutanga fagitire. Ni bake babikora kandi usanga na bo bayiguhaye bashyiraho amafaranga make kandi wishyuye menshi, wababaza bati turahomba menshi nituguha iyuzuye”.

Kankindi Priscille avuga ko aherutse gusohokana n’inshuti ze bakoresha amafaranga menshi ku buryo byarangiye bakoze fagitire ya EBM iriho kimwe cya kabiri cy’amafaranga bari bakoresheje mu kabari.

Yagize ati: “Mperutse gusohokana n’inshuti zanjye dukoresha amafaranga arenga ibihumbi 100 ariko mbasabye fagitire ya EBM bampa iriho icya kabiri cy’amafaranga twari twakoresheje, mbabajije bampa ibintu ntabashije kumva nanga guterana na bo amagambo ndataha”.

Umwe  mu bacuruzi yabwiye Imvaho Nshya ko impamvu batanga EBM ziriho amafaranga make bikomoka ku nganda n’abo baranguriraho na zo zibaha fagitire zihabanye n’ikiranguzo nyacyo.

Yagize ati: “Ntabwo nshobora gutanga Fagitire nanjye ntayakase nkuko natwe badukata kuko usanga aho turangurira natwe baduha fagitire iriho amafaranga make kandi twishyuye menshi, bigatuma natwe tubikora kuko ntabwo twakorera mu gihombo.”

Undi na we avuga ko bigoye kuko bipfira ku bacuruzi bakuru bajya kurangura hanze kandi umufuka w’ibiro 25 usanga bawuguhereye ibihumbi 22 by’amafaranga y’u Rwanda ku ruganda ariko na bo bakaguha fagitire y’ibihumbi 18.

Iyo bigenze gutyo, wa mufuka waranguye ibihumbi 22 bawugurisha hagati y’amafaranga y’u Rwanda 26,000 na 28,000 ariko na bo bajya gusohora fagitire bagakora iya 23,000.

Perezida w’Urugaga rw’Abikorera mu Karere ka Muhanga Kimonyo Juvenal, avuga ko nubwo hari abatanga EBM bakase amafaranga bidakwiye akibutsa ko bene ibi bikorwa biba bigamije kwiba umusoro bihanwa n’amategeko bityo abacuruzi bakwiye kijya birinda gukora ibyaha kuko byabashyira mu gihombo.

Umuyobozi ushinzwe imikoreshereze ya EBM mu Kigo cy’Imisoro n’Amahoro (RRA) Rwiririza Gashango, avuga ko gutanga fagitire ya EBM ku muntu ukuguriye cyangwa ukuranguriye ari itegeko.

Yasabye abarangura n’abaguzi bahabwa fagitire zitandukanye n’ibyo baranguye cyangwa baguze kujya batangira amakuru ku gihe, kugira ngo icyo cyuho mu kunyereza imisoro kigabanyuke kuko bidindiza iterambere ry’Igihugu.

Akomeza yibutsa abasora ko umusoro utanzwe neza uteza imbere Igihugu, ugatuma abaturage bahabwa ibikorwa remezo bitandukanye.

RRA ivuga ko hari abacuruzi 166 badakoresha neza EBM 1 ndetse abasaga 173 bakaba bafite EBM  batarabasha kuyihinduza ngo bafate igezweho, naho abacuruzi 24 bafite imashini zitanga inyemezabwishyu (POS) ariko ntabwo zikoreshwa mu gihe 14 muri bo barangurira ibicuruzwa kuri telefoni.

Gusa mu Karere ka Muhanga, muri uyu mwaka wa 2023, abasaga 10,072 bafite EBM ariko 3,149 ni bo bayikoresha neza naho abagera ku 6,923 bangana na 69% ntibakozwa ibyo gukoresha ubu buryo bugezweho bukoreshwa hatangwa fagitire y’ikoranabuhanga (EBM).

  • AKIMANA JEAN DE DIEU
  • Ukuboza 10, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE