Muhanga: Asaga miliyoni 800 azifashishwa mu gutunganya icyuzi cya Rugeramigozi

  • AKIMANA JEAN DE DIEU
  • Werurwe 2, 2024
  • Hashize amezi 2
Image

Hashize igihe abatuye mu mujyi wa Muhanga bavuga ko batabona amazi uko bikwiye, ariko  hagiye gushakwa igisubizo kihuse kizatwara asaga miliyoni 800 hakurwa isayo mu cyuzi cy’igikorano cya Rugeramigozi ngo hongerwe amazi asanzwe ahafatirwa.

Bamwe mu baturage bagiye baganira n’Imvaho Nshya mu bihe bitandukanye bavuga ko bashobora kumara icyumweru bataragerwaho n’amazi asanzwe asaranganywa na WASAC ku batuye mu bice by’uwo mujyi.

Munyaneza Sylvere utuye mu Murenge wa Shyogwe mu Kagali ka Ruli mu Mudugudu wa Kabeza avuga ko bishoboka ko bashobora kumara icyumweru amazi ajemo rimwe nabwo ntamare n’isaha.

Yagize ati: “Nkatwe hano iwacu dushobora kumara icyumweru cyose tutabonye amazi cyangwa akaza rimwe, twayobotse ibishanga ahubwo dushobora kuzarwara indwara zikomoka ku mwanda kubera ko nta mazi tubona twirwanaho mu makano yo mu bishanga.”

Habimana Gaspard utuye mu Murenge wa Nyamabuye mu Kagali ka Remera mu Mudugudu wa Gasharu avuga ko bayobotse amavomero yo mu bishanga kandi bagombye gukoresha bafitiye ifatabuguzi.

Ati: “Erega twamaze kumenyera kuvoma mu gishanga kandi dufite amavomo mu ngo yajemo umusaka kandi dufite ifatabuguzi ry’amazi meza yatunganyijwe, nubwo hari n’igihe aza yanduye”.

Mukamana Eugenie atuye mu Murenge wa Nyamabuye mu Kagali ka Gitarama mu Mudugudu wa Kagitarama avuga ko batabona amazi uko byari bisanzwe, yamaze kuba ikibazo gikomeye ku batuye muri uyu Mudugudu yarabuze ahubwo dushobora kuzarwara indwara zikomoka ku mwanda.

Yagize ati: “Ikibazo cy’amazi cyamaze gufata indi ntera kuko yabaye idolari ni ryo twumva rikomeye kubonwa n’abacishije bugufi, nk’ubu tumaze icyumweru kirenga akaza iminota mike itarenga 20 agahita agenda dufite ubwoba ko twakandura indwara ariko kandi ayo baduha aza anuka harimo ibintu bireremba hejuru, hakwiye kurebwa naho amazi avanwa niba hatameze nabi”.

Umuyobozi w’Akarere ka Muhanga, Kayitare Jacqueline avuga ko amazi akorwa n’uruganda rwa Gihuma ari make ugereranyije n’ubushobozi bw’uru ruganda rwubatswe mu 1987 kuko abaturage bari bahatuye biyongereye cyane.

Meya w’Akarere ka Muhanga Kayitare Jacqueline avuga ko ingano y’amazi itakijyane n’abaturage bayakenera

Yagize ati: “Uruganda rwa Gihuma ntabwo rukora amazi ahagije kuko rukora ari hagati ya Metero kibe 2000 na 4000 ku munsi. Ariko iki kibazo cy’amazi kinakomoka ku ngano y’uruganda kuko rwubatswe uyu mujyi utangana gutya kandi udatuwe gutya, bivuze ko ubwinshi bw’abaturage n’amazi bakenera bitajyanye”.

Akomeza avuga ko uruganda rwa Gihuma rutagihagije uyu mujyi ariko hategerejwe umushinga wa Kagaga uzubakwa ku mugenzi wa Bakokwe, hagati y’Imirenge ya Cyeza na Kabacuzi uzatanga nibura Metero kibe ibihumbi 10 kandi uyu mushinga uzatangira vuba kuko inyigo zirimo kugera ku musozo.

Yongeyeho ko inzego zirimo Akarere ka Muhanga, ikigo cy’Isuku n’Isukura (WASAC), Ikigo cy’Igihugu gishinzwe amazi mu Rwanda (RWB), Minisiteri y’Ubuhinzin’Ubworozi (MINAGRI) bafashe umwanzuro wo gushaka ubushobozi bwo gusukura icyuzi cya Rugeramigozi.

Meya Kayitare avuga ko muri uku kwezi kwa Werurwe 2024, imirimo izatangira gukorwa hagakora igice kimwe kizatwara asaga miliyoni 400 naho ikindi gice kizaba cyasigaye kikazakorwa mu gihe cy’Impeshyi bivuze ko uyu mushinga wo gukura isayo muri iki cyuzi uzatwara agera kuri miliyoni 800 z’amafaranga y’u Rwanda.

Avuga ko Akarere, WASAC, RWB Na MINAGRI bashakishije ubushobozi buri wese akazatanga miliyoni 200 zo kwifashishwa hakurwa isayo muri icyo cyuzi kiremano.

Umushinga wo kubaka Isoko ya Kagaga izatangira mu kwezi kwa 11 umwaka wa 2024 bikaba biri mu nyigo ya nyuma ariko Akarere ka Muhanga kugeza ubu kari kuri 84,8 % mu kugeza amazi meza ku baturage.

  • AKIMANA JEAN DE DIEU
  • Werurwe 2, 2024
  • Hashize amezi 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE