Muhanga: Abaturage bifuza ko ivuriro ry’ingoboka rya Gifumba ryatangira gukora

  • AKIMANA JEAN DE DIEU
  • Mutarama 24, 2024
  • Hashize amezi 4
Image

Bamwe mu baturage batuye mu Kagali ka Gifumba i Samuduha, mu Murenge wa Nyamabuye baravuga ko bakora ibirometero bisaga 5 bajya gushaka serivisi z’ubuvuzi ku kigo Nderabuzima cya Kabgayi cyangwa i Mata mu Murenge wa Muhanga   kandi ivuriro ry ‘ingobaka bagizemo uruhare ribegereye rikaba rigiye kumeramo ibyatsi.

Basaba ko iryo vuriro ry ‘ingobaka bagizemo uruhare ryahabwa ubushobozi bwo gufasha abarwayi basaba serivisi z’ubuvuzi kubagabanyirizwa urugendo.

Mu Kiganiro bahaye Imvaho Nshya bavuga ko bibagora gukora ingendo ndende bajya gusaba ubuvuzi ndetse n’ikiguzi cy’urugendo kikabahenda kuko usanga kitajya munsi y’Ibihumbi 5 kugenda no kugaruka.

Mukangenzi Emeritha avuga ko hashize imyaka 4 hubakwa iryo vuriro riciriritse bari bizeye ko babonye aho bazajya bivuriza hafi birangira ridakora.

Yagize ati: “Ni byo duturiye hano ariko batangira kubaka natwe twatanze intege zacu kugira ngo iri vuriro riduhe serivisi vuba ariko imyaka 4 irashize tutabasha kuzibona byakomeje kudusaba kujya kwivuza kure.”

Kamanzi Straton avuga ko niba yibuka neza aha hantu hatangiye kubakwa mu mwaka wa 2020 ndetse batanga imiganda ariko turacyategereje ko rikora kandi nta gikoresho kiranajyamo.

Ati: “Niba nibuka neza mu mwaka wa 2020 ni bwo hano hatangiye kubakwa tugira ngo rigiye kudufasha kugabanya ingendo tujya i Kabgayi cyangwa i Mata ariko imyaka irihirika bakatubwira ko rizakora mu gihe cya vuba none twarahebye ndetse nta n’igikoresho kirashyirwamo ngo tunabyizere”.

Rugwiza John avuga ko urugendo rwababanye rurerure hivuza abarembye kuko kujya ku kigonderabuzima cya Mata cyangwa i Kabgayi bisaba gutega moto cyangwa ugakora urugendo rw’Ibilometero 7 kugenda no kugaruka.

Yagize Ati” Urugendo rutujyana kwivuza i Kabgayi n’aho bita i Mata rukomeje kutubana rurerure kuko nibura dukora urugendo rw’ibilometero 7 kujya i Kabgayi cyangwa ukajya i Mata mbese biragaragara ko bingana.”

Umunyamabanga Nshingwabikorwa w’Umurenge wa Nyamabuye, Nshimiyimana Jean Claude avuga ko habura rwiyemezamirimo warifata akarikoresha agafasha abaturage kubona aho bivuriza bakareka gukora ingendo za kure bashaka ubuvuzi.

Akomeza avuga ko ibyo abaturage bavuga byumvikana kuko baritanze kugira ngo hubakwe batanga imiganda, natwe twifuza ko habonetse uwahakorera yafasha abaturage bacu.

Hatanzwe isoko kugira ngo hashakishwe uwarikoreramo kandi twizeye ko bizakunda vuba.

Minisitiri w’Ubuzima, Dr Sabin Nsanzimana mu Nama y’Igihugu y’Umushyikirano yavuze ko kugeza ubu  amavuriro y’ingoboka (Poste de Sante) agera ku  9% adakora neza, akongeraho ko gahunda ihari ari uko aya mavuriro ahabwa ba rwiyemezamirimo kugira ngo abashe gukoreshwa neza.

Minisiteri y’Ubuzima kandi itangaza ko mu Rwanda hose hamaze kubakwa amavuriro y’ingoboka agera ku bihumbi 1 200 yunganira ibigo Nderabuzima n’ibitaro by’Uturere.

  • AKIMANA JEAN DE DIEU
  • Mutarama 24, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE