Muhanga: Abatishoboye barishimira ko bubakiwe inzu

  • Imvaho Nshya
  • Ugushyingo 15, 2023
  • Hashize amezi 4
Image

Abatuye mu Murenge wa Kibangu batagiraga amacumbi yo kubamo barashimira ishuri ryigisha ubumenyingiro ryitiriwe Saint Sylvain TSS uruhare rigira mu gufasha abatishoboye batagira amacumbi bakabubakira.

Mugwaneza Pascaline afite imyaka 41 akaba yaratujwe i Musambagiro yabwiye Imvaho Nshya ko mbere yo kubakirwa n’iri shuri yahoraga ahangayitse kubera kutagira aho kuba n’abana be 3 rimwe na rimwe akabura ubukode bwo gutanga akemeza ko amafaranga yatangaga akaba amufasha gutunga abana be.

Ati: “Mbere y’uko mfashwa n’iri shuri nahoraga mpangayitse cyane cyane kubera ko nahoraga mu madeni adashira nkabura ubukode  bwo kwishyura inzu mbamo n’abana banjye batatu, ariko kuva banyubakira iyi nzu y’amafaranga natangaga nsigaye nyatungamo abana banjye nkanizigama mu itsinda ku buryo n’iyo igihe cyo gutanga ubwisungane mu kwivuza kigeze ndagenda nkayafata nkishyura ku bwizigame bwanjye nkanabasha kugurira abanyeshuri ibikoresho by’ishuri no kwivuza”.

Mukanyamibwa Jeanine w’imyaka 50 atuye mu Mudugudu wa Cyuzu, Akagari ka Gitega ashimira ishuri ryamufashije kubona icumbi nyuma y’imyaka 8 atagira inzu yo kubamo bakamuha inzu y’ibyumba 3 n’icyumba cy’uruganiriro, dore ko yari amaze imyaka 8 yose akodesha inzu yo kubamo we n’abana be 4 akavuga ko n’amafaranga yishyuraga bihumbi 3 asigaye ayizigama.

Ati: “Ndashimira ishuri ryadufashije kugira aho tuba kuko imyaka 8 yose nta nzu ngira banyubakiye inzu ifite ibyumba 3, icyumba cy’uruganiriro ndetse n’ubwiherero bwujuje ibisabwa kandi amafaranga natangaga ku bukode nsigaye nyizigama kugira ngo ejo nzitabare ngize ibindi bibazo”.

Umuyobozi w’Ishuri ryitiriwe Mutagatifu Sylvain rya Kibangu, Rukundo Norbert avuga ko biciye muri COFORWA igenga iri shuri, babashije kugurira abaturage 4 ibibanza no kubyubaka no kubaha ibikenerwa byose harimo ubwiherero no kubaha amazi n’amashanyarazi aho bikunda abana bakimenyereza umwuga ku byo bigira mu ishuri.

Akomeza avuga ko bazakomeza gufasha abaturage baho bakorera kugira ngo na bo bibone muri iri shuri kuko abenshi ni abana babo baherwa uburezi muri iri shuri kandi tuzakomeza gufasha abafite ibibazo by’ubuzima.

Umunyamabanga Nshingwabikorwa w’Umurenge wa Kibangu, Mukamutari Valerie avuga ko ashimira iri shuri kuko rifasha abaturage mu ngeri nyinshi harimo kurwanya isuri no kububakira inzu bakava mu bibazo bibangamira imibereho myiza y’abaturage.

Ati: “Iri shuri dufatanya mu bikorwa byinshi dutegura nk’ubuyobozi bw’Inzego z’ibanze mu muganda, ariko ryo rikanagira umwanya w’umwihariko nk’ishuri rifite ishami ry’ubwubatsi abanyeshuri bakajya kwimenyereza ibyo biga bubakira abatishoboye kandi baradufasha cyane”.

Mu mwaka wa 2021 mu Kagali ka Gitega habarurwa imiryango 21 itagira amacumbi ariko kugeza ubu harimo kubakirwa imiryango 7 itaragiraga amacumbi ku bufatanye n’abafatanyabikorwa barimo na COFORWA icunga iri shuri ryitiriwe Mutagatifu Sylvain rinafasha mu bikorwa byo kurwanya isuri.

AKIMANA JEAN DE DIEU

  • Imvaho Nshya
  • Ugushyingo 15, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE