Muhanga: Abakuriye Dasso mu Mirenge basabye guhabwa moto

  • AKIMANA JEAN DE DIEU
  • Mutarama 12, 2024
  • Hashize amezi 5
Image

Bamwe mu bakuriye abakorera Urwego rwunganira Akarere mu gucunga Umutekano (DASSO) bakorera ku rwego rw’Umurenge, bavuga ko bibagora kugera ku baturage bahuye n’Ibibazo iyo bibabajwe, bagasaba ko bagurirwa moto ziborohereza urugendo.

Babivuga mu gihe mu Turere tumwe na tumwe abakuriye uru rwego batangiye guhabwa moto nshyashya ziborohereza kunoza akazi kabo ka buri munsi, bityo na bo bakaba bifuza ko ayo mahirwe yabageraho cyane ko bakorera mu bice by’icyaro aho binagora kubona ibinyabiziga byo gutega.

Abavuganye n’Imvaho Nshya bemeza ko babonye moto byabafasha kugera n’aho bitabashobokeraga kandi hari abaturage bakeneye ubufasha bwihuse.

Umwe muri bo yagize ati: “Rimwe na rimwe biratugora kugera ku muturage wagize ikibazo, yahohotewe cyangwa yagize ikibazo kuko usanga bitugora cyane. Nibadufashe tubone uko tuzajya dutabara abaturage.”

Undi na we avuga ko aherutse gutabazwa n’umuryango uba mu makimbirane, aho umugore n’umugabo barwanaga hafi yo kwicana, ariko kugerayo ngo bibanza kumugora.

Ati: “Kugira ngo ngereyo byansabye isaha nabuze uko ngerayo, ariko ngezeyo binsaba kubaganiriza baranyumva bemera kwisubiraho bampa icyizere ko bagiye kubana neza kandi hashize ukwezi abaturanyi bambwira ko byagiye mu buryo”.

Umuhuzabikorwa wa DASSO ku rwego rw’Akarere ka Muhanga Hossana Murigande, avuga ko Imirenge 5 kuri 12 igize Akarere ari yo ifite Sitasiyo za Polisi bivuze, ko imirenge 7 yose itabonera ku gihe serivisi za Polisi bigasaba abakorera urwego rwa DASSO kugerayo bihuta.

Na we ashimangira ko Akarere gakwiye gushakira moto abahuzabikorwa b’uru rwego ku Murenge kuko byakwihutisha ubutabazi batanga.

Umuyobozi w’Akarere ka Muhanga Kayitare Jacqueline, yijeje abakorera DASSO ko iki  igitekerezo batanze cyo akigeza ku rwego rw’Inama Njyanama kugira ngo kizarebweho babashe kugera ku baturage bose.

Yagize ati: “Igitekerezo cy’abagize urwego rwa DASSO ntabwo twakirenza amaso, ariko kigomba kubanza kuganirwaho n’inzego harimo n’urwego rukuru ari rwo Njyanama kugira ngo babashe koroherezwa bahabwe inyunganirangendo nkuko twahaye abanyamabanaga nshingwabikorwa.”  

Kugeza ubu bivugwa ko abahagarariye DASSO mu Mirenge ya tumwe mu Turere turimo n’aka Nyanza bamaze guhabwa moto zibafasha mu ngendo iyo bagiye guha serivisi abaturage.

  • AKIMANA JEAN DE DIEU
  • Mutarama 12, 2024
  • Hashize amezi 5
TANGA IGITEKEREZO
Anonymous says:
Mutarama 12, 2024 at 3:10 pm

Nibafashe abo bayobozi kuko bafitiye abaturage akamaro kd. Batabarira kugihe.

Hhhhhhhh says:
Mutarama 12, 2024 at 4:21 pm

Nibabafashe babashe kunoza inshingano

Ntirenganya Augustin says:
Mutarama 13, 2024 at 8:21 am

Ngewe nkumuturage wo mukarera ka nyagatare nshingiye kubwitange abagize urwego rwa DASSO nakazi bakora nimbaraga bagakorana rwose ndabona urwego rwongerewe imbaraga barushaho gukora akazi kabo neza doreko bagakora bagamije kugeza umuturange kwisonga rwose Izo moto barazikwiye ndetse bikaba muturere twose twigihugu bikaba uniform imwe(1) nkuko bakorera igihugu kimwe(1) aricyo URWANDA🇷🇼

Andika igitekerezo

AMATEGEKO AGENGA IYANDIKA RY'IGITEKEREZO CYAWE