Muhanga: Abagabo 2 bafungiwe kwiba inka bakazibagira mu rugo

  • AKIMANA JEAN DE DIEU
  • Mutarama 21, 2024
  • Hashize amezi 4
Image

Abagabo babiri bo mu Kagari ka Gifumba, Umurenge wa Nyamabuye, Akarere ka Muhanga, batawe muri yombi bakekwaho kwiba inka bakazibagira mu rugo rw’umwe muri bo.

Abaturage bo mu Kagari ka Gifumba bavuga ko abo bagabo bombi bafatiwe mu cyuho ku wa Gatatu tariki 17 Mutarama 2024 hagatiya saa kumi n’imwe na saa kumi n’ebyiri n’igice z’igitondo.

Abaturage batuye mu Kagali ka Gifumba ho mu Murenge wa Nyamabuye baravuga ko haherutse gufatwa abagabo babiri bakekwaho muri aba batawe muri yombi.

Babwiye Imvaho Nshya ko uwitwa Niyonsaba Landuard w’imyaka 56 utuye mu Mudugudu wa Samuduha, Akagari ka Gifumba, ni umwe muri abo bagabo, akaba yarafashwe nyuma y’uko hari hashize iminsi akekwaho kwiba inka akazibagira iwe.

Nyuma yo kubaga inka yibye ngo yajyaga kugura izindi nkeya mu ibagiro ubundi akazigurisha.

Undi ni  uwitwa Simparingabo Emmanuel w’imyaka 42 utuye mu Mudugudu wa Kamazuru mu Kagari ka Gahogo, akaba yarafashwe nyuma yo gukekwaho kuba mu bantu bibye inka y’uwitwa Kanziga Epiphanie mu ijoro ryo ku wa 16 Mutarama 2024.

Na we yari amaze iminsi akekwaho ubujura bw’inka akaba anaturanye n’uwibwe, ndetse ubwo Kanziga yatabazaga we ntiyahabonetse, akaba ari nab wo byaketswe ko ashobora kuba yaraye akjyana inka yari yibwe.

Umunyamabanga Nshungwabikorwa w’Umurenge wa Nyamabuye, Nshimiyimana Jean Claude, yemeje ayo makuru ndetse anashimangira ko kwa Niyonsaba Landuard hasanzwe ibihamya bigaragaza ko ahabagira inka ariko akayobya uburari ko yazikuye mu ibagiro ryo mu Masizi riherereye mu Murenge wa Shyogwe.

Yagize ati: “Tukimara kumenya amakuru twagiye iwe mu rugo hamwe n’inzego zitandukanye. Twageze mu gikari tuhasanga impu z’inka zabazwe n’amagufa yazo n’aho yabagiraga, harimo uruhu rw’inka rushyashya bigaragara ko rwabazwe ku munsi wari wabanje, ndetse na we ubwe yemera ko azibaga akazivanga n’izo arangura ku ibagiro ryo mu Misizi.”

Akomeza avuga ko abaturage bakwiye kjjya batanga amakuru kuko bigaragara ko ibyo yakoraga hari ababibonaga ntibabivuge.

Yasabye abaturage ko mu gihe bibwe bakwiye kwihutira gutanga amakuru kugira ngo abajura bakurikiranwe mu maguro mashya kuko haba hakiri icyizere ko inka zishobora kugaruzwa zitarabagwa.

Abaturage kandi barasabwa kumenya amakuru y’abo baturanye kuko akenshi usanga bakunze gucumbikira abantu bafite ingeso zinyuranye zirimo n’ubujura ariko ntibimenyekane kuko ababacumbikiye batabyitaho.

Mu mpera z’umwaka ushize, mu Karere ka Muhanga hagiye havugwa ubujura bw’amatungo maremare n’amagufi, ariko hari izagiye zigaruzwa n’amarondo mu Mirenge ya Cyeza na Nyamabuye.

Kwa Landouard hasanzwe uruhu rw’inka bigaragara ko yari akimara kuyibaga
  • AKIMANA JEAN DE DIEU
  • Mutarama 21, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE