Muhanga: Abafite uburwayi bwo mu mutwe barinubira guhabwa akato

  • Imvaho Nshya
  • Ukwakira 30, 2023
  • Hashize amezi 4
Image

Bamwe mu bafite uburwayi bwo mu mutwe mu Karere ka Muhanga,  bavuga ko bakunze gukorerwa ihezwa iyo bagaragaje ibimenyetso by’indwara zo mu mutwe, mu gihe umurwayi wakurikije inama z’abaganga akanywa imiti yahawe neza agira ubuzima bwiza.

Mu kiganiro bahaye Imvaho Nshya bemeza ko umuntu ugaragaje ibimenyetso by’uburwayi bwo mu mutwe ahabwa akato n’umuryango we bagasaba ko ahubwo yakwitabwaho akavuzwa agakomeza gufashwa gufata imiti kandi akayikoresha neza.

Umuyobozi wa Koperative Ihumure-Gikondo y’abantu bafite uburwayi bwo mu mutwe, Celine Mukakarira, avuga ko hakigaragara ihohoterwa rikorerwa abagaragaje ibimenyetso by’indwara zo mu mutwe.

Ati: “Haracyagaragara ihohoterwa rikorerwa abagaragaje ko bafite ibimenyetso by’indwara zo mu mutwe kuko ntabwo bongera kumwumva nk’ufite uburenganzira kandi yegerewe akavuzwa agafata imiti ye neza yongera kugira uruhare muniterambere rye n’umuryango, kuruta kumubika mu gikari kuko hari aho usanga batamwitaho kandi hari icyo yakorera mu rugo cyangwa akavurwa agakira.”

Hajebakiga Thomas ukomoka mu Ntara y’Amajyaruguru mu Karere ka Rulindo, avuga ko imyumvire y’ababana n’ufite ubumuga bwo mu mutwe ahita atakaza agaciro kandi afashijwe kuvuzwa akabona imiti yakira hari benshi bari hanze aha bakora kandi banywa imiti.

Yagize ati: “Hakwiye gukangurirwa guhindura imitekerereze ku mibereho y’abafite ubumuga bwo mu mutwe kuko usanga barabaye ibicuwa nyuma yo kugaragaza ko afite ibimenyetso bw’izi ndwara ariko anafashijwe kuvuzwa akabona imiti yayinywa akaba yakira cyangwa se akajya ahora ayinywa kuko hari benshi hano bayinya kandi babayeho neza barakora bagatanga umusaruro ku miryango yabo n’Igihugu muri rusange”.

Mugiraneza Patricie avuga ko amaze imyaka 12 afite ubumuga bwo mu mutwe ariko muri iyi myaka yafashijwe n’umuryango we agafata neza imiti ubuzima bugakomeza.

Yagize ati: “Njyewe nk’uko umbona maze imyaka 12 nkoresha imiti kuko ndwaye indwara zo mu mutwe zaturutse ku bibazo nagize ariko umuryango wanjye wambaye hafi niyo nibagirwaga kuyifata baranyibutsaga kandi bamfashe neza nta kato bampa ndetse bampa umwanya wo kunyumva maze ubuzima bugakomeza.”

Umuyobozi w’Umuryango Nyarwanda wita ku bantu bafite ubumuga bwo mu mutwe witwa NOUSPR-Ubumuntu, akaba anawuyoboye muri Afurika no mu Muryango w’Ibihugu bikoresha ururimi rw’Icyogereza (Commonwealth), Mutesi Rose, avuga ko umuntu urwaye indwara zo mu mutwe akwiye gufashwa agakomeza kubaho neza kandi akitabwaho akavuzwa kuko iyo abonye imiti akayinywa neza nta yindi nkurikizi agira.

Yagize ati: “Kugeza ubu iyo hagize ugaragaza ibimenyetso by’indwara zo mu mutwe usanga ahabwa akato ariko twebwe twifuza ko yavuzwa akabona imiti kuko dufite abafata neza imiti kandi bagakomeza gutanga umusanzu mu iterambere ry’Igihugu aho kugirwa igicibwa n’umuryango no kumuhisha mu kirambi”.

Yongeraho ko umuti wa mbere wahabwa uwagaragaje ikibazo cy’indwara zo mu mutwe atari ukumuhisha mu kirambi ahubwo bakirinda kumukorera ihohoterwa ribambura uburenganzira ku mitungo yabo kuko umuti mwiza ni ukumwereka ko umuri hafi ukamufasha kunywa imiti neza.

Umuryango NOUSPR -Ubumuntu utangaza ko Abanyarwanda basaga ibihumbi 3700 bafite ubumuga bwo mu mutwe kandi bafata neza imiti neza nubwo bigaragara ko uyu mubare ukiri muto cyane hagendewe ku bibazo u Rwanda rwanyuzemo.

Minisiteri y’Ubuzima iherutse gutangaza ko abasaga 24% bafite ibibazo byo mu mutwe, bishobora no kugenda byiyongera bitewe n’ibibazo byugarije umuryango harimo ibikomoka ku mutungo, gatanya hagati y’abashakanye, kwishyuzwa inguzanyo gutakaza akazi ndetse n’ibindi bitandukanye biremereye imiryango.

AKIMANA JEAN DE DIEU

  • Imvaho Nshya
  • Ukwakira 30, 2023
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE