Muhanga: Abafite ubumuga barinubira inzira yabagenewe yashyizwemo amakaro anyerera

  • Imvaho Nshya
  • Ugushyingo 2, 2023
  • Hashize amezi 7
Image

Abafite ubumuga bagenderera Gare ya Muhanga barasaba ko abubatse iyi Gare bagira ibyo bahindura ku nzira yabagenewe yubakisjijwe amakaro anyerera, adashobora kuborohereza kujya gushaka serivisi mu nzu zo hejuru.

Mu kiganiro bahaye Imvaho Nshya bemeza ko ubuyobozi bw’Akarere bukwiye guhagurukira inzu zose bigaragara ko atorohereza abafite ubumuga kuyageramo kubera imyubakire yayo.

Kamaliza Solange ufite imyaka 40 avuga ko uburyo iyi nyubako yubatse wagira ngo ntabwo batekerezaga ko abafite ubumuga bazayikoresha kuko haranyerera cyane.

Ati: “Iyi nyubako ya Gare bayubatse nabi kuko n’iyo ubirebye buri munsi bahora bahindagura amakaro ariko icyo si cyo gikomeye cyane, ahubwo inzira y’abafite ubumuga yubatswe nabi cyane kuko ntabwo yorohereza abo yagenewe yubakishije amakaro anyerera cyane yabashyira mu kaga ko kuhaburira ubuzima”.

Nyaminani Jean D’Amour ufite imyaka 39 avuga ko bidakwiye ko abafite inzu zubatswe na bene zo zidafite ibikenewe ahabwa ibyangombwa byo kuzikoreramo byabuze.

Ati: “Ntabwo ubuyobozi bukwiye kurebera abantu bubaka inzu ariko ntibazishyiremo ibikenewe ahubwo nkanibaza nti bakura he ibyangombwa byo kuyinjiramo ngo akoreshwe cyangwa ni uko iyi Gare yubatswe n’Akarere gafitemo imigabane”.

Muhirwa Thomas afite imyaka 36 avuga ko muri uyu mujyi hari n’izindi nzu bigaragara ko zitorohereza abafite ubumuga zikwiye guhagarikwa, bagasabwa kubakaho izi nzira zorohereza abafite ubumuga ariko nka Gare ikoreshwa n’abamtu benshi bakwiye kubihindura.

Yagize ati: “Si iyi Gare gusa kuko dufite n’izindi nzu bigaragara ko zitujuje ibisabwa zikwiye kwitabwaho zikaba zanahagarikwa kuko ziteye ikibazo ku bafite ubumuga batabona uko bazigeramo ndetse zirageretse hari nabajya gushakamo serivisi kubera kutigererayo bagatuma abandi bikwiye guhinduka”.

Umuhuzabikorwa w’Inama y’Igihugu y’Abantu bafite Ubumuga mu rwego rw’Akarere ka Muhanga, Hitayezu Edouard avuga ko iyi nzira idafasha abafite ubumuga bityo bahitamo guca ahandi kubera gutimya impanuka zabagwirira bahanyuze.

Asaba ko nta muntu ukwiye guhabwa ibyangombwa byo gukorera mu nzu itujuje ibisabwa n’Ikigo cy’Igihugu gishinzwe Imiturire mu Rwanda kuko hari aho bazubaka bameze nk’abikiza.

Umuyobozi w’Akarere ka Muhanga wungirijwe ushinzwe imibereho myiza y’Abaturage, Mugabo Gilbert avuga ko iki kibazo batari bakizi ariko bagiye gukorana n’abubatse iyi Gare ndetse n’abashinzwe imyubakire hakarebwa ibyahinduka.

Ati: “Ntabwo iki kibazo twari tukizi ariko tugiye kuganira n’abubatse iyi Gare kugira ngo niba koko iki kibazo gihari gishakirwe igisubizo kuko ntabwo twakwishimira ko abafite ubumuga babura aho banyura, kandi iyo nzira yarategenyijwe tuzareba ibishobora gukorwa hakaba nyabagendwa”.

Umuyobozi Mukuru wa Jali Real Estate Ltd yubatse iyi Gare, Nsengiyumva Benoit avuga ko ibi bibazo abagenderera Gare n’abayikoramo bagaragaza byose byamaze kubonwa kandi bigiye gushakirwa ibisubizo mu gihe gito bigakosorwa iriya nzira y’abafite ubumuga ikubakwa neza bifasha abafite ubumuga.

Ati: “Natwe twabonye ko iyi Gare yubatse nabi mu gice kijyanye n’inzira y’abafite ubumuga yatuma babasha kugera mu bice byose by’inzu, bityo rero twarabibonye kandi twamaze gutanga isoko ryo gukosora ibyubatswe nabi kugira ngo abahakoresha babashe kuhakoresha neza hatababangamiye”.

Iyi Gare ya Muhanga ikorerwamo n’ingeri nyinshi harimo benshi mu badozi bari basanzwe bakorera mu isoko ryari rishaje rya Muhanga bahimuriwe mu gihe hubakwaga isoko rya Kijyambere rya Muhanga.

Gare ya Muhanga ikaba yaratwaye asaga miliyari 1.5 z’amafaranga y’u Rwanda.

AKIMANA JEAN DE DIEU

  • Imvaho Nshya
  • Ugushyingo 2, 2023
  • Hashize amezi 7
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE