Mu rukiko rwa ICJ, Namibia yihannye u Budage bushyigikiye Isiraheli

  • ZIGAMA THEONESTE
  • Mutarama 15, 2024
  • Hashize amezi 5
Image

Igihugu cya Namibia cyanze kwemere icyemezo u Budage bwafashe cyo kunganira Isiraheli,mu Rukiko Mpuzamahanga rushinzwe gutanga Ubutabera (ICJ), aho Leta Afurika y’Epfo yayireze ko irimo gukora Jenoside muri Gaza.

Perezida wa Namibia Hage Geingob, kuri uyu wa Mbere tariki ya 15 Mutarama 2024, yatangaje ko kuba u Budage bushyigikiye Isiraheli bigaragaza umugambi wabwo bwahoranye mu mateka wo gushyigikira Jenoside bwakoze muri Namibia mu mwaka wa 2021.

U Budage kandi yanabugarageje ko buzwi mu mateka ko bwakoze Jenoside mu bihugu bwakolonije kuva mu mwaka 104 kugeza 1908 aho ari bwo bwadukanye ubwicanyi bwiswe Jenoside bwa mbere mu kinyejana cya 20.

Akavuga ko iyo Jenoside yahitanye imbaga y’abaturage barenga 70 000 bo mu bwoko bw’Aba Herero n’aba Nama.

Perezida Geingob yavuze ko kuba u Budage bwariyemeje kwinjira mu masezerano y’Umuryango w’Abibumbye (Loni) yo kurwanya Jenoside, harimo na Jenoside bwakoreye muri Namibia, bityo gushyigikira Isiraheli mu bikorwa ikora muri Gaza kwaba ari ukwivuguruza.

Yavuze ko Guverinoma y’u Budage itarakemura neza ibyago yateje  mu mateka ya  Namibia.

U Budage buhakana ko Isiraheli irimo gukora Jenoside muri Gaza  ndetse ko ari impamvu zishingiye ku nyungu za politiki zituma ibihugu bimwe biyita uko.

Guverinoma y’u Budage yashimangiye ubushake bwayo bwo gushyigikira Isiraheli nyamara iyo Guverinoma ishinjwa gukora Jenoside yakorewe Abayahudi (Holocaust).

 Mu kugaragaza ko Isiraheli irengana bwagaragaje ko ibibazo by’amakimbirane byatumye yinjira mu ntambara byaturutse ku bitero byagabwe n’umutwe wa Hamas kuri Isiraheli mu Kwakira 2023.

Bugahamya ko Isiraheli irimo kwitabara,ihangana  n’ibikorwa bya Hamas ishaka  kuyisenyera igihugu.

Intambara ikomeje hagati ya Hamas na Isiraheli ikomeza gutuma abaturage batakaza ubuzima ku mpande zombi.

Minisiteri y’Ubuzima muri Gaza aho Hamas ikorera itangaza ko hamaze gupfa abaturage hafi ibihumbi 24 biganjemo abagore n’abana, bishwe mu bitero bya za bombe Isiraheli ikomeje kubasukaho kuva mu Kwakira umwaka ishize.

Ni intambara kandi yateje icyorezo cy’inzara ndetse n’indwara nyinshi mu baturage bakuwe mu byabo muri Gaza aho bakomeje kwiyongera nk’uko Umuryango w’Abibumbye n’Imiryango itabara imbabare ibivuga, abo bantu bagiye bahungira bakeneye ubufasha bwisumbuye.

Afurika y’Epfo yajyanye ikirego muri ICJ ishinja Isiraheli ibyaha bishingiye ku bitero ikomeje kugaba ku Banyapalestine b’abasivili ndetse igahamya ko ari mu mugambi wo kubarimbura ndetse no gusenya ibikorwa remezo byose mu Ntara ya Gaza.

Ni ibintu Isiraheli ihakana yivuye inyuma, aho ivuga ko nta shingiro bifite kuba hari abashobora kuyishinja Jenoside muri Gaza ikanahamya ko ibyo bikorwa na Hamas.

Urukiko rwa ICJ ruracyasesengura ngo rugate umwanzuro ku byo Afurika y’Epfo, ishinja Isiraheli muri Gaza niba koko ari ukuri cyangwa ari ibinyoma.

  • ZIGAMA THEONESTE
  • Mutarama 15, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE