Mu myaka 7 amaze mu bwarimu afite umutungo urenga miliyoni 30 Frw

  • Imvaho Nshya
  • Ukwakira 9, 2023
  • Hashize amezi 8
Image

Umwarimu witwa Habimana Aimable wigisha mu Rwunge rw’Amashuri rwa Rilima mu Karere ka Bugesera, yishimira intambwe amaze kugeraho abikesha inguzanyo yahawe n’Umwalimu SACCO kuri ubu akaba amaze kwiteza imbere aho afite imitungo ibarirwa mu gaciro ka miliyoni 30 z’amafaranga y’u Rwanda.

Habimana agira inama abandi barimu gukoresha neza umushahara no gutinyuka bagakoresha inguzanyo z’Umwalimu SACCO kuko zihendutse kandi kuzishyura bikaba bitagoranye nk’uko zaba zisabwe mu bindi bigo by’imari.

Iwe mu rugo ni mu Mudugudu wa Karumuna, mu Kagari ka Kanzenze mu Murenge wa Ntarama, mu Karere ka Bugesera.

Mu kiganiro n’Imvaho Nshya, yavuze ko ubwo yarangizaga kwiga amashuri ya Kaminuza mu yahoze ari Koleji Nderabarezi (KIE) agahita yinjira mu mwuga w’uburezi, yabonye akazi mu Rwunge rw’Amashuri rwa Rilima atangIra kwizigama mu Mwalimu SACCO muri 2016.

Yatangiye azigama amafaranga y’u Rwanda 10,000 cyangwa 20,000 muri icyo gihe, ariko ubu akaba ashobora kuzigama miliyoni ebyiri.

Ni umwarimu uvuga ko yatinyutse akagana Umwalimu SACCO yaka inguzanyo y’amafaranga y’u Rwanda 400,000 maze ashingira umugore we ubucuruzi buciriritse mu 2016.

Amaze kwishyura inguzanyo ya mbere, yavuze ko mu mwaka wa 2017 yahawe inguzanyo ya miliyoni n’ibihumbi 200 maze we n’umugore bagura ubucuruzi bwabo, gusa ngo kuri ubu bageze ku rwego rwo kuguza miliyoni eshanu.

Urugendo rwe rwo kuba mwalimu rutaratangira yavuze ko yabanje kuba umushomeri muri 2015 ubwo yarangizaga Kaminuza yibera iwabo mu rugo gusa ngo aho amaze kugana Umwalimu SACCO akaka inguzanyo ageze ku rwego rwo kuranguza abacuruzi bagenzi be n’irindi terambere.

Habimana Aimable arashishikariza bagenzi be kugana Umwalimu SACCO bagakoresha inguzanyo bahabwa neza

Yagize ati: “Ndangiza kaminuza nabaye umushomeri nicara mu rugo gusa nagize amahirwe mbona akazi ku GS Rilima muri 2016, mpita ntangira gukoresha no kwaka inguzanyo mu Umwalimu SACCO. Twatangiye dukora ubucuruzi buciriritse ariko ni umugore wanjye wabukoraga nanjye nkajya kwigisha, inguzanyo twarasozaga kuyishyura tugafata indi mu Mwalimu SACCO tukagura ubucuruzi bwacu. Ubu tugeze ku rwego rwo guhabwa inguzanyo ya miliyoni 5 kuko tugeze ku rwego rwo kuranguza.”

Habimana yavuze ko gukoresha neza inguzanyo no kwizigamira byatumye atera imbere ndetse akaba agaragaza ibyo amaze kugeraho.

Yagize ati: “Ntabwo nshobora kubarura neza ibyo nkesha Umwalimu SACCO byose ariko ibyo nibuka ni uko dufite iduka rirengeje agaciro ka miliyoni 10, tukagira inzu ducururizamo na yo irengeje miliyoni 10 ndetse n’inzu tubamo ntiyaburamo miliyoni 10. Urumva ko tuvuze ibyo gusa bifite agaciro kari hagati ya miliyoni 30 na 40.”

Uretse Habimana, Mwumvaneza Eugene wo mu Murenge wa Mahama mu Karere ka Kirehe na we yavuze ko yatangiye kwizigama muri Koperative Umwalimu SACCO akoresha uburyo bwa Nzigamira Nige muri 2022 afata inguzanyo yo kubaka ndetse akaba hari izindi nyungu abona.

Yagize ati: “Umwalimu SACCO watumye nubaka inzu ifite agaciro ka miliyoni 6 nkajya ngenda nishyura nkongera nkaguza. Ubu maze kubaka inzu ya miliyoni 20, mfite alimentation, mfite n’ikindi kibanza naguze miliyoni eshatu, mfite amafaranga nizigamye kandi arenga miliyoni kuri iyo konti kandi buri kwezi baranyungukira.”

Mwumvaneza na Habimana bavuze ko abadakoresha Umwarimu SACCO basigaye mu iterambere bakaba basaba abarimu guhumuka amaso bakabyaza umusaruro amahirwe igihugu cyabahaye.

Mwumvaneza yagize ati: “Bagenzi banjye mbashishikarije kwinjira mu Umwalimu SACCO, abafitemo konti bakagerageza amahirwe yo kwizigamira no kwaka inguzanyo kuko ari amahirwe adafite bose mu kubyaza amahirwe igihugu kiduha nk’abarimu barerera u Rwanda.”

Umuyobizi w’Ishami ry’Imari mu Umwalimu SACCO Musabyimungu Gad, yavuze ko abanyamuryango benshi bahawe inguzanyo yabateje imbere bityo bakaba basaba n’abandi bakitinya gutinyuka bagakoresha inguzanyo mu mishanga ibabyarira inyungu.

Yagize ati: “Twishimira intambwe abahawe inguzanyo bateye mu kwiteza imbere n’imiryango yabo. Abenshi batanga ubuhamya bakesha inguzanyo z’Umwalimu SACCO bakoresha neza ndetse no gukomeza kwizigamira uko imishinga yabo igenda ibyara inyungu. Turashishikariza n’abandi gutinyuka bagakora imishinga ibyara inyungu bakegera Umwarimu SACCO bakagurizwa bakiteza imbere ndetse bagakomeza n’umuco wo kwizigamira.”

Kuva tariki ya 02 Ukwakira 2023 kugeza 06 Ukwakira 2023 habaye icyumweru cyahariwe umukiliya mu Umwarimu SACCO ku nsanganyamatsiko igira iti, “Dukorerehamwe tunoze serivisi.”

Abarimu b’indashyikirwa bahize abandi ku gukoresha neza inguzanyo ku rwego rw’Intara n’Umujyi wa Kigali buri wese yahawe moto ifite agaciro k’amafaranga y’u Rwanda 1,887,310.

Ababaye indashyikirwa muri buri Karere bahawe mudasobwa ifite agaciro ka 460,000 by’amafaranga y’u Rwanda n’igikombe ku bigo by’amashuri byahize ibindi mu Turere kimwe gifite agaciro k’amafaranga 150,000.

NSHIMIYIMANA FAUSTIN

  • Imvaho Nshya
  • Ukwakira 9, 2023
  • Hashize amezi 8
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE