Mu mwaka umwe imanza 5000 zarangijwe binyuze mu bwumvikane

  • ZIGAMA THEONESTE
  • Mutarama 9, 2024
  • Hashize amezi 5
Image

Imibare itangwa n’Inzego z’ubucamanza mu Rwanda, igaragaza ko imanza ibihumbi 5000 mu mwaka umwe zarangijwe binyuze mu bwumvikane.

Kuva ubu buryo bwashyirwaho, iyo mibare igaragaza ko guhera muri Kanama 2023, imanza zirenga 400 zarangijwe binyuze mu gahunda yo kumvikanisha uruhande rw’uregwa n’ubushinjacyaha ndetse kandi izirenga 1 500 zarangijwe ubu buryo bugitangira gushyirwaho, mu ntangiriro z’umwaka wa 2023 no mu mpere z’uwawubanjirije wa 2022.

Kurangiza imanza binyuze mu bwumvikane bw’uregwa n’ubushinjacyaha ni gahunda yatangijwe mu kwezi k’Ukwakira kwa 2022, aho impande zombi zumvikana ikiguzi  cyatangwa aho kugira ngo habeho kujya mu rubanza, cyane cyane iyo uregwa yemeye ibyaha aregwa kugira ngo ahabwe igihano cyoroheje cyangwa ibindi bishoboka byatuma agabanyirizwa igihano.

Kugeza ubu, ubwo buryo burakoreshwa kandi bwateguwe imyaka itanu kugira ngo butangira gushyirwa mu bikorwa.

Ni uburyo bw’ubuhuza bukoreshwa mu nkiko eshanu zo mu Rwanda za  Gasabo, Nyarugenge (Kigali), Gicumbi na Musanze (Amajyaruguru) na Muhanga (Amajyepfo).

Mu gihembwe cya nyuma  cy’umwaka wa 2023, habarurwaga imanza zarangijwe binyuze mu bwumvikane zageraga kuri 960 zabaruwe mu Kwakira, 1 166 zabaruwe mu Gushyingo na 795 zarangijwe mu Kuboza.

Mutabazi Harrison, Umuvugizi w’Inkiko mu Rwanda, yabwiye The New Times ko ubu buryo butanga icyizere cyiza ku hazaza h’ubutabera.

Ahamya ko kurangiza imanza binyuze mu bwumvikane bitanga amahirwe menshi mu gutanga ubutabera aho bituma ukurikiranyweho icyaha atanga amakuru y’ingenzi afasha mu gukumira ibyaha no kongera amahirwe menshi yo gutanga ubutabera, kugabanya umubare w’imanza mu nkiko no kugabanya ubucucike  bw’abari mu magororero.

Yagize ati: “Abantu barimo kubona ubutabera bwihuse. Hari abantu bamwe imanza zabo zarangijwe binyuze mu bwumvikane nyamara byari kumara umwaka urenga zitegereje kuburanishwa.”

Kurangiza imanza mu bwumvikane ni uburyo bushya bwashyizweho mu rwego rwo kongera amahirwe yo gufungurwa by’agateganyo ku bari mu igororero.

Ni mu gihe kandi inzego z’ubucamanza zihamya ko gukoresha uburyo bwo gukemura amakimbirane binyuze mu nzira z’ubuhuza  ari n’umuco wahozeho mu bihe byo hambere mu Rwanda.

Muri Mutarama 2023, Guverinoma y’u Rwanda yatangije uburyo bushya, harimo gukemura ibibazo binyuze mu bwimvikane ndetse no gukemura ibibazo hisunzwe inzira ziteganywa n’amategeko.

Iyo ni Politiki yatanze umusaruro ndetse inazana impinduka nziza mu rwego rw’ubutabera.

Uburyo butanga ubutabera binyuze mu nzira z’amategeko ni uburyo buhuza abantu ndetse bugatuma habaho guhanga udushya ndetse no gukemura ibibazo binyuze mu nzira z’amateko mpanabyaha.

Iyi politiki kandi yimakaza uburyo bwo kugabanya gufunga abakurikiranyweho ibyaha bigakorwa kubera ko bigaragara ko hageragejwe ubundi buryo bakabona ko nta bundi  bwakoreshwa uretse gufunga umuntu.

Ni Politiki kandi yashyizweho mu rwego rwo kuzirikana ingaruka gufunga bigira ku bantu ku giti cyabo, harimo no kuba intandaro y’isenyuka ry’imiryango y’abafunzwe.

  • ZIGAMA THEONESTE
  • Mutarama 9, 2024
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE