Mu 2024 inyandiko za Gacaca zizaba zibitswe mu ikoranabuhanga

  • NTAWITONDA JEAN CLAUDE
  • Gicurasi 20, 2022
  • Hashize imyaka 2
Image

Minisitiri w’Ubumwe bw’Abanyarwanda n’Inshingano Mboneragihugu Dr. Bizimana Jean Damascène yatangaje ko umushinga wo kubika inyandiko za Gacaca mu buryo bw’ikoranabuhanga uzarangirana n’umwaka wa 2024, bityo ubyemerewe akaba yabasha kuzibona.

Yagize ati: “Gacaca ifite ukuri kwinshi kw’amateka yagaragaje, ibimenyetso bya Jenoside birimo, izo nyandiko zirimo kubikwa mu ikoranabuhanga, umushinga ugomba kurangirana n’umwaka wa 2024, izizaba zabashije kubikwa zizaba zishobora kugerwaho n’abantu babyemerewe”.

Minisitiri Dr. Bizimana yabigarutseho mu kiganiro yahaye urubyiruko rwo mu Turere tugize Umujyi wa Kigali n’Akarere ka Bugesera, uyu munsi ku wa 20 Gicurasi 2022, mu gikorwa cyo kwibuka bagenzi barwo bazize Jenoside yakorewe Abatutsi mu 1994. Abari mu mahanga bakaba bagikurikiye bifashishije ikoranabuhanga.

Iki gikorwa cyabereye no hirya no hino mu Gihugu binyuze mu Ihuriro ry’Urubyiruko ryiswe Igihango cy’Urungano, ku nsanganyamatsiko igira iti: “Urubyiruko twahisemo kuba umwe -Igihango cyacu”. 

Minisitiri Dr. Bizimana akaba yamaze impungenge urubyiruko rufite inyota yo kumenya amateka y’u Rwanda aho rwasabye ko rwarushaho kuyigishwa haba mu mashuri, mu Itorero cyangwa gusura ahabitse amateka kugira ngo rurusheho kuyamenya.

Umwe mu rubyiruko witwa Nshimiyimana Jean Pierre wo mu Karere ka Nyarugenge yagize ati: “Twifuzaga ko amateka yaranze Igihugu cyacu Minisiteri y’Uburezi yayashyiramo imbaraga cyane, akenshi usanga twiga andi mateka kandi hari abana batoya bakeneye kuyamenya”.

Minisitiri Dr. Bizimana yavuze ko uretse inyandiko za Gacaca zirimo gushyirwa mu ikoranabuhanga, n’amasomo y’amateka arimo kongerwamo ibikenewe, anagaragaza ko gusura inzibutso na byo byafasha urubyiruko kuyamenya.

Ati: “Inzibutso zifite amateka ariko kandi zinabitse abacu, abacu ntitugomba kujya tubibuka muri iyi minsi 100 gusa tugomba kubazirikana umunsi ku munsi, gusura inzibutso zegereye amashuri aho mwiga mukamenya amateka y’aho hantu byashoboka mugasura n’iziri kure, mubigire igikorwa gihoraho hari abakozi baba bari ku nzibutso nyinshi babakira bakayabasobanurira”.  

Yakomeje agira ati: “Ikijyanye no kwigisha amateka urubyiruko murakigaragaza kenshi, Minisiteri y’Uburezi irabikurikirana ndetse n’Ikigo cy’Igihugu gishinzwe Uburezi, amasomo y’amateka arimo kongerwamo ibikenewe, kugira ngo kumenya amateka y’Igihugu kandi yuzuye nyayo bishoboke”.

Yavuze ko Abanyarwanda bafite inyota n’inshingano yo kumenya  amateka y’Igihugu. 

Ati: “Iyo tunarebye mu Itegeko Nshinga rya Repubulika y’u Rwanda ryo muri 2003 ryavuguruwe muri 2015, Abanyarwanda bitoreye, mu irangashingiro ryaryo havuga ko twebwe Abanyarwanda twibuka Jenoside yakorewe Abatutsi igahitana abana b’u Rwanda barenga miliyoni, twibuka n’amateka mabi yaranze Igihugu cyacu”.

Minisitiri Dr. Bizimana yakomeje avuga ko ibi bigaragaza ko Abanyarwanda bumva akamaro ko kuzirikana amateka.

Ati: “Amateka mabi yasenye Igihugu yaduteye ingaruka zihora zidukurikirana mu buzima bwacu bwose, imwe mu nzira zo kudufasha kubana n’aya mateka ni ukuyamenya, kugira ngo tuyavanemo isomo ryo  kumenya ko  mu gihe cyashize hari abantu bakuru bigishije nabi urubyiruko, barwigisha kwica, barahemutse. Ni ngombwa rero kumenya uko byagenze kugira ngo bidufashe kurinda ibyo tumaze kubaka, ibyo Igihugu kimaze kubaka ariko no kwirinda kubisubiramo”.

Minisitiri Dr. Bizimana yakomeje avuga ko amateka Igihugu cyanyuzemo afite uburemere bukomeye, yabisobanuye yifashishije imibare.

Ati: “… ni urugero rumwe mfashe, mbereke uburyo abantu bakuru bahemukiye u Rwanda, bahemukiye abana, bahemukiye n’Isi. Dufashe Inkiko Gacaca gusa; abahamwe n’icyaha ni 1,678,672; mutekereze abantu hafi miliyoni 2 bahamwe n’icyaha cya Jenoside. Izo mbaraga zakoze icyo gikorwa kibi cyo kwica mutekereze aho igihugu cyari kuba kigeze iyo bazikoresha bubaka amashuri, bubaka amavuriro, bakora imihanda”.

Yakomeje avuga ko muri bariya bahamwe n’icyaha, harimo icyiciro cya mbere cy’abateguye Jenoside bakanayiyobora barimo abari  mu myanya y’ubuyobozi bw’Igihugu bagera ku 24,730.

Icyiciro cya kabiri kirimo abakoze ubwicanyi bahamwe n’icyaha mu Nkiko Gacaca ni 433,471. Ikindi ni icy’abangije imitungo ni 1,220,471. 

Minisitiri w’Ubumwe bw’Abanyarwanda n’ Inshingano Mboneragihugu Dr. Bizimana Jean Damascène yabwiye urubyiruko ko muri iki gikorwa cyo kwibuka bakuramo umukoro wo guharanira kurinda Igihugu.

  • NTAWITONDA JEAN CLAUDE
  • Gicurasi 20, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE