Mozambique: RDF yakoranye Umuganda n’abaturage inabavura malariya

  • ZIGAMA THEONESTE
  • Ukuboza 17, 2023
  • Hashize amezi 3
Image

Ingabo z’u Rwanda ziri mu mu butumwa bwo guhashya iterabwoba mu Ntara ya Cabo Delgado muri Mozambique, ku wa Gatandatu tariki ya 16 Ukuboza, zifatanyije n’abaturage gukora Umuganda rusange no kubaha ubuvuzi.

Ni Umuganda wabereye ku kiraro kiri mu Mujyi wa Mocimboa da Praia mu ntara ya Cabo Delgado ya Mozambique.

Nyuma y’umuganda rusange, Abasirikare b’u Rwanda n’aba Mozambique basuzumye abaturage babarirwa mu magana , indwara zitandukanye by’umwihariko malariya ikunze kwibasira aka gace.

Abarwayi barenga 250 ni bo  bavuwe malariya kuri uyu wa Gatandatu tariki ya 16 Ukuboza 2023.

Kuva ingabo z’u Rwanda zakoherezwa muri Cabo Delgado muri Nyakanga 2021, uretse guhashya ibikorwa by’umutwe w’iterabwoba wa Ansar Al Sunna banakoze ibishoboka byose ngo bongere bagarure ubuzima bw’aka gace n’ubwigihugu bwari bwarangiritse.

Bakoze ibikorwa byo kubungabunga ikiremwamuntu, mu bikorwa by’ubuvuzi ku babukeneye b’abasivili ku Bitaro bya Afungi.

Kuri ibyo Bitaro bahazanye inzobere z’abaganga mu ndwara z’abagore (gynaecology) n’indwara z’abana (paediatric).

Muri 2022, ni bwo inzego z’umutekano z’u Rwanda zabashije kugarura umutekano  mu gace Palma na Mocimboa da Praia aho zakoreraga ibikorwa byo kugarura umutekano, abaturage batangira gusubizwa mu byabo.

Ni nyuma yo gufasha igisirikare cya Mozambique kwirukana ibyihebe muri aka gace, hari hanakenewe ko habaho ibikorwa by’ubuvuzi byo kwita ku baturage bari bubukeneye.

Icyo gihe amatsinda atandukanye yagiye mu bice bitandukanye gutanga ubuvuzi ku babukeneye, aho ayo matinda y’abaganga n’abaforomo bakomeje kuvura kugeza magingo aya.

Iyi gahunda yo kuvura abaturage mu bikorwa nk’ibi by’Umuganda irakomeje aho Ingabo z’u Rwanda ziyifatanyijemo n’iza Mozambique.

  • ZIGAMA THEONESTE
  • Ukuboza 17, 2023
  • Hashize amezi 3
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE