Moise Katumbi yijeje kugurira FARDC indege zigezweho no kurangiza M23

  • ZIGAMA THEONESTE
  • Ugushyingo 24, 2023
  • Hashize amezi 6
Image

Umukandida Perezida muri Repubulika Ihanira Demokarasi ya Congo(RDC) Moise Katumbi Chapwe, yijeje ingabo za Leta y’iki gihugu (FARDC) kuzigurira indege zigezweho no kurangiza umutwe wa M23.

Yabivuze ku wa Kane tariki ya 23 Ugushyingo 2023, ubwo yakomerezaga ibikorwa byo kwimamaza mu Mujyi wa Goma mu Ntara ya Kivu y’Amajyaruguru.

Mu migabo n’imigambi ye yagaragarije Abanyekongo ko naramuka agiriwe icyizere  azagurira igisirikare cya FARDC indege zigezweho z’intambara za F-16 bagaca ukubiri no gukoresha Sukoi 25. 

Katumbi yagaragaje ko ubu igihugu cyugarijwe n’umutekano muke by’umwihariko mu burasirazuba, aho ingabo za FARDC zihanganye n’umutwe wa M23, ashimangira ko ashaka kuwurangiza Congo ikagira umutekano usesuye.

Ku mugaragaro, yatangaje ko natorerwa kuyobora iki gihugu azagurira Igisirikare cyacyo indege kabuhariwe z’intambara.

Mu gace ka Kibumba kari mu bilometero 20 uvuye mu Mujyi wa Goma, hamaze igihe hari umutekano muke kubera imirwano imaze igihe ihanganishije, Ingabo za FARDC n’inyeshyamba z’umutwe wa M23.

Katumbi yakunze gutangaza ko mu gihe yaba atorewe kuyobora RDC byamutwara igihe kitarenze amezi atandatu akaba yashyize iherezo kuri uwo mutwe, nubwo atari cyo gisubizo cy’amahoro kuko kuri ubu mu Burasirazuba bwa RDC habarirwa imitwe yitwaje intwaro igera kuri 200. 

Yavuze ko indege z’intambara zo mu bwoko bwa Sukhoi-25, FARDC imaze igihe yifashisha mu kugaba ibitero kuri M23 azazibika mu nzu ndangamurange, akazisimbuza izindi kabuhariwe zo mu bwoko bwa F-16.

Ati: “Nzashyira mu nzu ndangamurage izi ndege z’intambara za Sukhoi-25, nzane iza F-16 mu rwego rwo gushyira iherezo kuri M23.”

Katumbi yongeyeraho ati: “Nta RDC, nta Kivu ya Ruguru, nta santimetero n’imwe tugomba gutakaza ku butaka bwacu, ndashaka kurangiza ikibazo cya M23.”

Uwo muherwe Katumbi wanabaye Guverineri w’Intara ya Katanga mu gihe kitari gito, yijeje Abanyekongo ko nibamutora azafata igihe akajya kuba mu Mujyi wa Goma, akabasha gukurikira ikibazo cy’umutekano muke mu Ntara ya Kivu y’Amajyaruguru.

Ibibazo by’umutekano muke mu Ntara ya Kivu y’Amajyaruguru byatumye abatuye muri Teritwari za Rutshuru na Masisi batemererwa gutora muri aya matora rusange.

Moise Katumbi yamaze guhabwa amajwi n’abakandida batatu nyuma yo kwikura mu matora barimo Matata Ponyo, Franck Diongo na Seth Kikuni, aba kandi basabye abayoboke babo kuzamutora kugira abe ari we uba Perezida wa RDC.

Moise ahatanye n’abandi bakandida barimo na Perezida Tshisekedi uri ku butegetsi na we  wifuza gutorerwa  manda ya kabiri.

Amatora muri iki gihugu ateganyijwe tariki ya 20 Ukuboza 2023.

  • ZIGAMA THEONESTE
  • Ugushyingo 24, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE