Miss Naomie n’umugabo we bahishuye igitsina cy’umwana bitegura kwibaruka

Nishimwe Naomie ubitse ikamba rya Nyampinga w’u Rwanda 2020 n’umugabo we Michael Tesfay batangarije abakunzi babo igitsina cy’umwana bitegura kwibaruka bavuga ko ari umuhungu. Ni ibyatangajwe na Miss Naomie ubwe kuri uyu wa Gatanu 16 Ukwakira 2026, abinyujije mu butumwa yaherekeresheje amafoto ye ari kumwe n’umugabo we yasangije abamukurikira kuri Instagram.

Ni amafoto bagaragayemo bafashe ku nda bigaragara ko Miss Naomie akuriwe kandi vuba bazakira imfura yabo uwo mwana bamubwira ko ari igitangaza Imana ibahaye. Yanditse ati: “Ni umuhungu! Ku muhungu wacu w’agaciro, igitangaza cyacu gito, igisubizo cy’amasengesho yacu. Waremwe mu buryo bw’igitangaza n’Imana. Ndetse na mbere y’uko ngufata mu maboko yanjye, Imana irakuzi, iragukunda kandi ifite umugambi mwiza ku buzima bwawe.”

Akomeza asaba Imana kurinda umwana we, agaragaza ko nubwo ataramuterura ngo amushyire mu gituza, amwifuriza ubuzima bwiza kandi amushyize mu maboko y’Imana. Ati: “Imana ikomeze kukurinda mwana wanjye Tesfy.”

Ubushakashatsi bwakozwe n’inzobere ku bijyanye n’imiterere y’umubiri n’imibereho y’abagore batwite bwayobowe na Juliana Fernandes Filgueiras Meireles bugakorerwa ku bagore 1,423 batwite n’ababyaye muri Brazil, bwagaragaje ko amafoto umugore yifotoza atwite amufasha kwishimira impinduka z’umubiri we, kwigirira icyizere ndetse bikabarinda kwibasirwa n’indwara y’agahinda gakabije ikunze kwibasira abagore batwite mu rugendo rwo gutwita na nyuma yaho.

Miss Nishimwe Naomie na Michael Tesfay bagiye kwibaruka nyuma y’imyaka 2 bashakanye dore ko bashyingiranywe tariki 29 Ukuboza 2024.