Minisitiri w’Intebe yagaragaje uko gushora mu buhinzi byatanze umusaruro

  • NTAWITONDA JEAN CLAUDE
  • Werurwe 17, 2022
  • Hashize imyaka 2
Image

Minisitiri w’Intebe Dr. Edouard Ngirente ari kumwe na bamwe mu bagize Guverinoma, ejo hashize yagiranye ikiganiro n’abanyamakuru agaragaza uburyo urwego rw’ubuhinzi Leta yarushoyemo imari bigatanga umusanzu ukomeye mu kuramira ubukungu bw’igihugu mu bihe bya COVID-19.

Yavuze ko muri rusange ubucuruzi bw’Isi bwagabanyutseho hafi 8.2% mu 2020, ni ukuvuga ko uko ubucuruzi bwagizwehio ingaruka bitasize u Rwanda.

Yagize ati: “Ubuhinzi bwongewemo nkunganire, bituma abahinzi bashobora koroherwa n’ibisabwa ngo umusaruro wiyongere. Ikindi kandi hagiye hubakwa ubushobozi mu bijyanye no kwita ku musaruro. Hongerewe nkunganire ku ifumbire, Leta yashyizemo amafaranga ngo umuhinzi abashe kugira imbaraga zituma abona iyo fumbire ngo ahinge yorore”.

Dr. Ngirente yifashishije urugero yavuze ko nk’ifumbire ya NPK kuri ubu igura amafaranga y’u Rwanda 882 ku kilo, mu gihe yakabaye igura 1358 iyo Leta itongera nkunganire yayo.

Ikindi yagaritseho ni ingamba  zagiye zishyirwaho zigamije guhangana n’ibibazo by’ikirere na byo byagiye bibangamira umusaruro w’ubuhinzi.

 Ati: “Wajya mu Ntara y’Uburasirazuba habaye amapfa, izuba ryaravuye ryinshi ryumisha ibihingwa ndetse n’amatungo abura n’ubwatsi. Iriya ntara ubusanzwe itunga igihugu mu bijyanye n’ibinyampeke, byatumye dufata imyanzuro yihuta, hashyizweho kuvomera imyaka nibura kuri Hegitari 7000 hanashyirwaho uburyo budasanzwe bwo kuhira ku buryo bukurikiranye cyane, n’ubwo umusaruro waje kugwa ku bice nibura 6% umusaruro wavuye kuri Toni  ibihumbi 378  twasaruye umwaka ushize bikagera hafi kuri Toni ibihumbi 357”.

Yongeyeho ko hari hamwe umusaruro wazamutse ndetse naho wagabanyutse.

 Ati: “Ibishyimbo byera muri iyo Ntara byagabanyutseho 2,2%, imyumbati yo yazamutseho 23%, umuceri 8% n’ingano zizamukaho 29% izo tweza mu Rwanda”.

Ubuhinzi bwinjiza amadovize hafi 50% y’ibyoherezwa hanze

Minisitiri w’Ubuhinzi n’Ubworozi. Dr. Mukeshimana Geraldine na we yavuze ko ubuhinzi ari rumwe mu nzego zashoboye gukomeza gukora mu bihe Isi yari yugarijwe n’icyorezo cya COVID-19 kandi ko ari n’urwego rwinjiriza Igihugu amadovize hafi 50% y’ayinjizwa n’ibyoherezwa hanze.

Yagize ati: “Ubuhinzi buvamo ibidutunga bigeze hafi kuri 90% hano mu gihugu, ariko buninjiriza Igihugu amadovize ageze hafi kuri 50%y’amadovize twinjiza mu byo twohereza hanze”.

Dr. Mukeshimana yagarutse kuri gahunda ya Nkunganire, aho Leta yunganira umuhinzi kugura ifumbire kimwe no kubaka ibikorwa bituma umusaruro ufatwa neza ukagumana ubuziranenge.

Yanakomoje ku buryo Leta yigisha abaturage uburyo bwo guhunika bugezweho. Ati: “Guhunika ni uko umuturage asarura, agahunika, akazagurisha. Muri Afurika imibare yerekana yuko umusaruro umuntu ahomba hafi 40% by’ibyo tuba twasaruye byangirika.

Leta y’u Rwanda yashyizemo imbaraga mu kwita ku musaruro harimo guhunika  n’ibijyanye nabyo byose kugeza umuturage agurishije, harimo kugura imashini zumisha imyaka,  kubaka ubwanikiro ndetse uturere twahawe intego y’ubwanikiro bw’imyaka, uko bugomba kuba bwubatse bungana, mu gihe iki n’iki byarakozwe mu myaka itatu ishize ndetse ku buryo kwangirika kw’imyaka  nk’ibigori  byabagaho byagabanyutse”.

Minisitiri Dr. Mukeshimana yavuze ko ibyo Leta ifasha abahinzi mu kubaka ubwanikiro, ubuhunikiro, ubwanikiro, ibyuma bikonjesha akenshi Leta ibyubaka kugira ngo bikoreshwe n’abahinzi bibumbiye hamwe. Si kuri buri muhinzi ku giti ke. Ni urugendo hari ibyo Leta yagiye yubaka.

Yongeyeho ko hari ubuhunikiro bwinshi cyane bw’abantu bikorera, ariko ko abikorera bashishikarizwa gushora imari mu kongerera agaciro umusaruro. Leta iba yashoyemo amafaranga, ubwanikiro, ubuhunikiro bikaba byafasha kugabanya ingano y’umusaruro wagenda utakara.

Ikindi ni uko ngo igikenewe atari uguhagarika kugura hanze no kudacuruza no hanze ahubwo icyifuzwa ari uko umusaruro wakwiyongera hakaboneka ibitunga abantu hakanaboneka n’ibyo gucuruza.

Minisitiri w’Ubuhinzi n’Ubworozi yashishikarije abahinzi guhinga ubutaka bwose buhari bugahoreshwa, kugira ngo bubyazwe umusaruro cyane ko Leta iba yaborohereje ibashyiriraho Nkunganire. 

Yagize ati: “Leta iba yaragiye itanga nkunganire. Ubu turi mu gihembwe cya kabiri, mu mafumbire tukava kuri 15% tukagera kuri 42% dusaba abahinzi guhinga ubutaka bwose buhari bugakoreshwa kugira ngo hatazagira aho twagira icyuho”.

  • NTAWITONDA JEAN CLAUDE
  • Werurwe 17, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE