Minisitiri wa Siporo yatumiwe muri Gen-Z Comedy

Minisitiri wa Siporo, Nelly Mukazayire, yatangajwe nk’umutumirwa w’umunsi mu gitaramo cy’urwenya cya Gen-Z Comedy giteganyijwe ku wa 8 Ukwakira 2026, ari na cyo cya mbere cy’uku kwezi.

Ibi bitaramo ubusanzwe bizwiho guha umwanya abanyarwenya bakizamuka bakagaragaza impano zabo ariko bikagira n’umwanya w’abatumirwa b’umunsi biganjemo abafite amazina muri sosiyete mu rwego rwo kuganiriza urubyiruko ruba rwabikoraniyemo.

Kuri iyi nshuro, ibi bitaramo byatumiwemo Minisitiri Nelly Mukazayire aho azaganiriza urubyiruko ruzacyitabira ku ngingo zitandukanye zirimo ibyaranze urugendo rwe haba muri politiki n’ubuzima bwe bwite aho aba abwira by’umwihariko urubyiruko, ibyarufasha kugera ku nzozi zarwo. 

Iki gitaramo cy’urwenya cyatumiwemo abahanga mu gusetsa barimo nka Dogiteri Nsabii, Lucky Baby, Umushumba, Dody Pirate, MC Kandii na Musa, ndetse na Kaddu, Clement na Rumi.