Minisitiri Ngabitsinze yibukije Abanyarwanda kutiyima ahubwo bakwiha mu rugero

  • NYIRANEZA JUDITH
  • Ukuboza 26, 2023
  • Hashize amezi 5
Image

Mu gihe hizihizwa iminsi mikuru isoza umwaka, abantu bababanezerewe bakishimisha, hakaba ubwo barengera bakibagirwa ko n’ubundi buzima bukomeza mu bijyanye n’imibereho ya buri munsi nko kwishyurira abana amashuri, guhaha, kwivuza n’ibindi. Abanyarwanda bakaba bagirwa inama yo kwizihiza iminsi mikuru bazirikana ukwezi kwa mbere.

Minisitiri w’Ubucuruzi n’Inganda Ngabitsinze Jean Chrisostome yibukije Abanyarwanda ko kwizihiza iminsi mikuru byakorwa abantu ntibiyime ariko bakiha ku rugero ntibibagirwe ko ubuzima bukomeza.

Yagize ati: “Nabwira Abanyarwanda ngo ntimwiyime kugira ngo muzabone ibyo mubona mu kwa mbere, nimwihe mu rugero hanyuma no mu kwa mbere muzazirikane ko ubuzima buzakomeza. Ntuziyime uzazirikane ukwa mbere gusa”.

Inyama ziri mu biribwa bihahwa cyane mu minsi mikuru

Minisitiri Ngabitsinze kandi yibukije abantu ko batagomba gusesagura mu gihe cya Noheli n’Ubunani, anagaragaza n’ingaruka bigira.

Ati: “Abantu ntibagomba gusesagura mu gihe cya Noheli n‘Ubunani, usanga akenshi mu kwa mbere amashuri ahita aza, ugasanga abantu batangiye kuguza cyangwa se bagize ikibazo kubera yuko baba batabaze neza mu gihe cy’iminsi mikuru, ntabwo iminsi mikuru ivanaho kuvuga ko umuryango wagombaga guteganya n’ikizakurikiraho”.

Yagarutse ku buryo iyo abantu badacunze neza ibijyanye no kwizihiza iminsi mikuru isoza umwaka, ukwezi kwa Mutarama kubagora.

Ushobora gusanga amafunguro yo mu byiciro bimwe nk’inyama z’inka, inkoko, amafi byateguwe

Yagize ati: “Ntitwavuga ngo nibiyime, nibihe ariko bamenye ko na nyuma ya Noheli n’Ubunani ubuzima buzakomeza. Kenshi na kenshi turasesagura ni byo, ugasanga ukwa mbere kuragorana ku bantu benshi kubera iminsi mikuru”.

Akomeza avuga ko kenshi na kenshi iyo umuntu azi gufata neza inshingano ze, umubyeyi, umuntu wese uhagarara neza mu nshingano aragena akamenya neza icyo azasiga, ubuzima bugakomeza hatabayeho kwaya, abantu bakiha ku rugero.

Umubyeyi ufite umunyeshuri wiga mu mashuri yisumbuye, abajijwe uko yiteguye kwizihiza iminsi mikuru isoza umwaka, yatangarije Imvaho Nshya ko asa n’ukomeza kubaho uko bisanzwe, adakabya mu kuyizihiza.

Yagize ati: “Bitewe n’uko iminsi mikuru isoza umwaka iba mbere gato yo gutangira igihembwe cya kabiri, mu by’ukuri mba ntekereza amafaranga y’ishuri kurusha kwizihiza iminsi mikuru ku buryo buhambaye. Nsa nukomeza kubaho uko bisanzwe, nta cyo nkora gikabije mu kuyizihiza, bya bindi usanga bamwe bagura inyama   zitandukanye ari iz’inka, inkoko, amafi n’ibindi biribwa, bakanywa inzoga cyane,  imyenda n’inkweto bihenze, gutembera n’ibindi”.

Umunyeshuri wiga muri imwe muri kaminuza mu Mujyi wa Kigali, nawe yavuze ko aba yumva nta kidasanzwe, iminsi mikuru ayifata kimwe n’indi atakabya kuyizihiza, kuko n’ubundi ubuzima abayemo buba bumusaba kugendera ku bipimo ntarengwa agamije kutazisanga mu bibazo nyuma y’iminsi mikuru isoza umwaka.

Mu kwizihiza iminsi mikuru ni ngombwa kuzirikana ko ubuzima bukomeza, abantu bagirwa inama yo kudasesagura.

  • NYIRANEZA JUDITH
  • Ukuboza 26, 2023
  • Hashize amezi 5
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE