Minisitiri Nduhungirehe yashimye indirimbo nshya ya Bwiza

Minisitiri w’Ububanyi n’Amahanga n’Ubutwererane, Amb Patrick Olivier Nduhungirehe, yashimiye indirimo shya ‘Gake gake’ umuhanzi Bwiza Emerance uzwi nka Bwiza, agaragaza ko imyandikire y’uyu muhanzikazi itajya ibatenguha.

Uyu muyobozi uzwi nk’umukunzi w’umuziki kubera kugaragaza ibihangano byamunyuze nk’ibisanzwe ubwo butumwa yabugaragaje yifashishije urubuga rwa X kuri uyu wa Gatandatu tariki 23 Gicurasi 2026.

Minisitiri Nduhungirehe yasangije abamukurikira indirimbo nshya ya Bwiza ‘Gake Gake’ yandikaho ati : ” Ntajya adutenguha.” Ayo magambo yagaragaje ko Bwiza akomeje gukora ku rwego rushimisha abakunzi b’umuziki we ndetse akagaragaza ubuhanga buhoraho mu bihangano bye.

Bwiza ashyize hanze indirimbo ‘Gake Gake’ mu gihe ari mu myiteguro y’ibitaramo mpuzamahanga azakorera mu bice bitandukanye by’Isi, agamije kumenyekanisha Album ye ya Gatatu arimo gukoraho.

Ni indirimbo yakiriwe neza kuko abakunzi be bagiye bandika ahatangirwa ibitekerezo ko ifite amagambo meza ibyatumye bamwe bagirira amatsiko Album ndetse ntibatinye gutekereza ko yaba ari imwe mu ziyigize kuko aherutse gutangaza ko azagenda asobora indirimbo ziyigize gahoro gahoro.

Uretse Bwiza, Minisitiri Nduhungirehe akunze kugaragara ashyigikira abahanzi batandukanye aho yashimye Album ‘Colourful Generation’ ya Bruce Melodie, Spice Diana n’abandi benshi yagiye agaraza ko yanyuzwe n’ibihangano byabo iburushaho gutera imbaraga abahanzi.