Minisitiri Mimosa yashimiye Bella Murekatete wabonye ikipe muri WNBA

Minisitiri wa Siporo, Munyangaju Aurore Mimosa yashimiye Bella Murekatete wagiye gukora igeragezwa muri Phoenix Mercury ikina muri Shampiyona ya Basketball muri Leta Zunze Ubumwe z’Amerika mu bagore (WNBA).

Murekatete w’imyaka 23 yasinye amasezerano magufi y’imikino yo kwitegura Shampiyona izwi nka (Pre-Season), mu gihe ikipe yamushima ikazamusinyisha nk’umukinnyi wayo mushya.

Mubashimishijwe n’iyi nkuru barimo, Minisitiri wa Siporo Munyangaju Aurore Mimosa wamushimiye maze amwifuriza amahirwe.

Abinyujije ku rukutwa rwe rwa X Minisitiri Mimosa yagize ati: “Wakoze cyane Bella, komeza utsinde. Ibyo wagezeho ntabwo bisanzwe mwana w’u Rwanda.”

Murekatete asanzwe akinira ikipe ya Washington State Cougars Women’s Basketball ikina muri Shampiyona ihuza kaminuza zo muri Leta Zunze Ubumwe z’Amerika, (NCAA Division I).

Phoenix Mercury agiye gukoramo igeragezwa ni imwe mu makipe afite izina muri WNBA, yashinzwe mu 1997, ikaba imaze kwegukana Shampiyona inshuro eshatu (2007, 2009 na 2014).

Uyu mwaka w’imikino Murekatete yanditse andi mateka menshi. aho mu ntangiriro za Mata, yakinnye umukino w’intoranywa muri Shampiyona ihuza kaminuza zo muri Leta Zunze Ubumwe z’Amerika ‘Women’s College All Star Game’.

Harimo no kuba yaratsinze amanota menshi muri Washington State Cougars Women’s Basketball (1,552) bimushyira ku mwanya wa gatanu mu bamaze gutsindira iyi kipe amanota menshi mu mateka yayo.

Bella Murekatete wavukiye mu Karere ka Huye yakiniye amakipe y’Igihugu mu byiciro bitandukanye harimo Abatarengeje imyaka 16, 18 ndetse n’ikipe nkuru.