Minisitiri Gatabazi yashimye uruganda rw’icyayi rwa Rubaya

  • NTAWITONDA JEAN CLAUDE
  • Werurwe 20, 2022
  • Hashize imyaka 2
Image

Uyu munsi, Minisitiri w’Ubutegetsi bw’Igihugu Gatabazi Jean Marie Vianney, yatangiye urugendo rw’iminsi ibiri mu Karere ka Ngororero, aho agiranye inama n’inzego zitandukanye ndetse asura uruganda rw’icyayi rwa Rubaya arusaba kongera ibikorwa bifite uruhare mu guhindura imibereho y’abaturage baruturiye.

Minisitiri w’Ubutegetsi bw’Igihugu yasuye uruganda rw’icyayi rwa Rubaya, ruherereye mu Murenge wa Muhanda ajya inama y’uburyo uru ruganda rwarushaho kugirira akamaro abaturage, rubafasha gukemura ibibazo bibangamiye imibereho myiza yabo.

Aho ku ruganda rw’icyayi rwa Rubaya; yasobanuriwe imikorere y’uruganda, uko abaturage bakorana narwo n’abarukorera bitabwaho, n’uko rugira uruhare mu iterambere ry’abaruturiye.

Minisitiri Gatabazi yagize ati: “Ndashima Ubuyobozi bw’uru ruganda ku bikorwa bihindura imibereho y’abaturage rukora; ndanasaba ko rurushaho kongera ibikorwa bigamije guhindura imibereho y’abaturage barukorera n’abahinzi b’icyayi; ndetse n’abaturanye na rwo kugira ngo na bo bagerweho n’ibyiza n’inyungu z’uruganda”.

Yagaragaje amahirwe atangwa n’uruganda arimo imikoranire myiza n’ubuyobozi, abaturage bashishikarizwa guhinga icyayi.

Hatanzwe icyifuzo cyo kubona urwuri bakororeramo kugira ngo haboneke ifumbire y’imborera yo kunganira imvaruganda ihenze. Bagiriwe inama yo gukorana n’aborozi bo mu nzuri za Gishwati ku buryo babona ya fumbire bifuza.

Umuyobozi w’uruganda yasabye ko inzuri ziri mu mirima y’icyayi rwagati  zahindurwamo imirima y’icyayi. Minisitiri Gatabazi yabagiriye  inama yo kumvikana na bene izo nzuri.

Uruganda rw’icyayi rwa Rubaya rweguriwe abikorera mu 2006 rumaze gukuba gatatu umusaruro ndetse ubuso buhingwaho icyayi rukoresha ubu bugeze kuri Hegitari 1,717.

Rufite abakozi bagera ku 3870 kandi buri mwaka rwishyura abaturage barukorera n’abarugurisha icyayi amafaranga arenga miliyari imwe n’igice.

Mbere yo gusura uruganda rw’icyayi, Minisitiri Gatabazi yakiriwe na Guverineri w’Intara y’Uburengerazuba Habitegeko Francois agirana inama n’abagize Inama Njyanama y’Akarere, Komite Nyobozi, Abikorera, sosiyete sivile, abafatanyabikorwa, inzego z’umutekano n’abandi bavuga rikumvikana.

Muri iyo nama kandi yahuje abikorera bavuka muri ako Karere n’abandi bafatanyabikorwa mu iterambere bakorera muri ako Karere, hagarutswe ku iterambere ry’Akarere n’uruhare rw’abikorera mu rugendo rwo guteza imbere Akarere ka Ngororero.

Umuyobozi w’Akarere ka Ngororero Nkusi Christophe yabagaragarije aho Akarere kageze mu iterambere, amahirwe gafite mu kuryihutisha n’ibibazo birikoma mu nkokora.

Bimwe muri ibyo bikorwa harimo ubucukuzi bw’amabuye y’agaciro, ahabarurwa kampani 14 n’abaturage bakoramo 9784.

Nyuma yo kungurana ibitekerezo Minisitiri Gatabazi yibanze ku byakwitabwaho kugira ngo iterambere ry’Akarere rirusheho kwihuta.

Minisitiri w’Ubutegetsi bw’Igihugu yasuye uruganda rw’icyayi rwa Rubaya ( Foto Intara y’Iburengerazuba)
Abagize inzego zitandukanye bitabiriye inama mu Karere ka Ngororero (Foto MINALOC)
  • NTAWITONDA JEAN CLAUDE
  • Werurwe 20, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE