MINECOFIN yahagurukiye ikibazo cy’uruganda rw’umuceri rumaze imyaka 7 rudakora

  • NSHIMIYIMANA FAUSTIN
  • Mutarama 16, 2024
  • Hashize amezi 4
Image

Mu gihe abahinzi b’umuceri bo mu Karere ka Rwamagana bataka igihombo baterwa no kuba uruganda rw’umuceri rwa ‘Rwamagana Rice’ rumaze imyaka irenga irindwi rudakora, Minisiteri y’Imari n’Igenamigambi (MINECOFIN) yemeje ko igiye gukurikirana iby’iki kibazo.

Minisitiri w’Imari n’Igenamigambi yahamirije Imvaho Nshya ko agiye gukurikirana intandaro y’icyo kibazo, kugira ngo abo bahinzi babone uruganda rubagurira umusaruro.

Abo bahinzi bagize ihuriro Twiyubake bo mu Turere twa Rwamagana na Ngoma ndetse n’abahinga mu gishanga cya Rugende kiri hagati ya Rwamagana na Gasabo, bavuga umusaruro wabo ugurwa n’inganda zibaturutse kure, bakaba bifuza ko begurirwa urwo ruganda rwasinziriye rukaba urwabo cyangwa Leta ikabemerera kwishingira urwabo.

Urwo ruganda rwahagaritse imirimo yo gutunganya umuceri mu mwaka wa 2016 bitewe no kutumvikana n’impande zirimo Leta, Umushoramari w’Umunya-Australia ICM-Rwanda n’abahinzi b’umuceri.

Nyuma yo gufunga imiryango, abahinzi b’umuceri bifuje kurugura ndetse bandikira amabaruwa Minisiteri y’Ubucuruzi n’Inganda, Minisiteri y’Ubuhinzi n’Ubworozi, Minisiteri y’Imari n’Igenamigamigambi n’izindi nzego zibifite mu nshingano.

Muri ayo mabaruwa bagaragazaga ko bifuza kugura urwo ruganda cyangwa bakaguramo imigabane, ariko ngo imyaka ibaye myinshi batarasubizwa.

Abo bahinzi bavuga ko bahoze bafite imigabane ya 40% ariko mu 2009 bakayikuramo kubera imikorere mibi no kutumvikana.

Gusa bemeza ko ku bwumvikane bwabaye hagati y’inzego bakomeje kujya baruha umusaruro kugera mu mwaka 2013, ubwo uru ruganda rwubatswe ahitwa mu Byimana rwakuraga umusaruro ahandi.

Basobanura ko kuba uruganda ruri hafi yabo rudakora rubateza ibihombo kuko bategereza ko umusaruro wabo uza kugurwa n’abaturutse i Mpamba mu Karere ka Gisagara.

Mukandayisaba Libertha uhinga mu gishanga cya Cyaruhogo yagize ati:  “Inzitizi zituma abahinzi b’umuceri tudatera imbere mu buryo bwihuse zirimo kuba umuceri tuwugemura kure, umusaruro dutegereza ko uruganda rwa Mpamba rw’i Gisagara ruza kuwutwara kandi mu Karere kacu dufite uruganda ariko rudakora.”

Yakomeje avuga ko kuwugemura kure bibahendesha, n’igiciro cyo gutonoza kikazamuka, maze inyungu bari biteze ntibe ari yo babona kuko wa muceri ubagarukira ku isoko uhenze.

Kubwimana Andre ahinga mu gishanga cya Gisaya yagize ati: “Hari igihe umusaruro wacu utinda kugenda kubera ibibazo by’imodoka ziva kure zije kudupakirira ibyo bikadukereza, ariko uruganda ruri hafi i Rwamagana rukora byatworohera kuko izo mbogamizi ntizabaho kandi n’ubuyobozi butwegereye bwadufasha kubikemura byihuse.”

Umuyobozi w’Ihuriro ry’Abahinzi b’umuceri mu Karere ka Rwamagana, Gahiza Appolinaire, ashimira Leta yabafashije gutunganya ibishanga no kubaka ingomero z’amazi byatumye umusaruro wiyongera, ariko bakaba bakibangamiwe n’uko urwo ruganda rudakora.

Yagize ati: “Kera twarakoranaga ariko ntitwahuza bituma imigabane abahinzi bari bafitemo ikurwamo ariko nyuma uruganda ruhagarika imirimo. Natwe twifuje kurukoresha twandikira MINECOFIN kuko ni yo ibifite mu nshingano, ubu hariyo amaburuwa menshi yacu. Ibaruwa iheruka imaze umwaka urenga itarasubizwa kandi baduhaga icyizere. Gusa ikibazo gihari ni uko batatwemerera cyangwa ngo baduhakanire.”

Yakomeje agira ati: “Twifuza kugura imigabane 100% cyangwa bakatubwira tukishingira uruganda rwacu. MINICOM itwemerere iduhe uburenganzira twiyubakire urutunganya umusaruro wacu kuko MINECOFIN yatubwiye ko hari ibibazo bagikurikirana ariko umwaka uarenga tutarasubizwa kandi twe ntitwamenya igihe bizarangirira.”

Umuyobozi w’Akarere ka Rwamagana, Mbonyumuvunyi Radjab, avuga ko iki kibazo gikwiye gushakirwa ibisubizo kuko umuceri usigaye wera mu Karere wikubye inshuro eshatu, bityo abahinzi bakaba biteguye kugura imigabane y’uruganda.

Yagize ati: “Umuceri wera wikubye inshuro eshatu kuko ibishanga twari dufite twarabitunganyije kugera i Rugende n’ahandi, ariko tukaba dufite uruganda rw’umuceri kandi tutanarufite kuko rumaze imyaka irindwi rudakora rufunze kandi dufite ihuriro ry’abahinzi b’umuceri bafite ubushobozi bwose. Basabye Leta ko yabegurira uruganda ikarugura kandi bakishyura 100% cyangwa bakumva batarugura 100% aho kugira ngo rukomeze rwangirike Leta ikabareka bakaguramo imigabane.”

Yakomeje agira ati: “Umushoramari w’Umunya Australia ufatanya na Leta ni baringa kuko ashobora gukora umunsi umwe mu mezi atatu kandi umuceri awukuye mu bindi bice. Kuba mu minsi 365 igize umwaka adakoramo n’iminsi 30 ni ikibazo kandi dufite umuceri rwagatonoye.”

Mu gikorwa cya Sena cyo gusura ibikorwa by’amakoperative y’ubuhinzi n’ubworozi mu Karere ka Rwamagana, itsinda rigizwe na Dr Mukabaramba Alvera na Mupenzi George ryavuze ko ari ikibazo kiremereye ndetse bazagitangira raporo bityo ryizeza abahinzi b’umuceri kubakorera ubuvugizi kugira ngo uruganda rukore.

Visi Perezidante wa Sena Ushinzwe imari n’Abakozi, Dr Mukabaramba Alvera, yagize ati: “Ni ikibazo gikomeye kandi kigomba gukemurwa n’inzego zo hejuru, kiratureba cyane kuko Sena ni twe dukontorora Guverinoma. Birororoshye guhamagara ba Minisitiri bireba hanyuma tukareba uburyo ikibazo cyakemuka. Ni ikibazo kiremereye muri raporo tugomba gutanga.”

Ihiriro Twiyubake rigizwe n’amakoperative icyenda afite abanyamuryango 3,050, rikaba rihinga ku buso bungana na hegitari 620.

Ubwo buso bugenda burushaho kwiyongera bitewe n’ingomero z’amazi zubatswe zirimo urw’i Nawe, urwubatse hagati ya Kigabiro na Munyaga ndetse n’urugomero ruri hagati ya Kigabiro na Mwulire.

Amazi ahagije mu bishanga yatumye umusaruro w’umuceri wiyongera kuko aheraga toni eshatu kuri hegitari ubu hera toni eshanu na zirindwi.

Amarembo y’uru rugand ayashyizweho iminyururu
  • NSHIMIYIMANA FAUSTIN
  • Mutarama 16, 2024
  • Hashize amezi 4
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE