MINAGRI yatangaje ibizagenderwaho habyazwa umusaruro igihembwe cy’ihinga 2023A

  • NTAWITONDA JEAN CLAUDE
  • Nzeri 27, 2022
  • Hashize imyaka 2
Image

Igihembwe cy’ihinga cy’Umuhindo cya 2023A cyatangiranye n’ukwezi kwa Nzeri 2022 gisanze Isi yose n’u Rwanda  rurimo bihanganye n’ingaruka z’ibihe bidasanzwe birimo izamuka ry’ ibiciro ku Isi muri rusange n’ihindagurika ry’ikirere.

Ni mu urwo rwego Minisiteri y’Ubuhinzi n’Ubworozi (MINAGRI) yatangaje ingamba zigomba gushyirwa mu bikorwa kugira ngo iki gihembwe cy’ihinga kirusheho kubyazwa umusaruro.

Muri byo harimo kongera ubuso buhingwa mu buryo buhuje (Land use consolidation), hahingwa ibihingwa byatoranyijwe bihakwiriye, hagendewe ku bujyanama butangwa n’inzego zishinzwe ubuhinzi.

Yasabye ko  ubuso bwose bugomba guhingwa ntihagire ubutaka busigara budahinzwe haba i musozi, mu bishanga no mu nkuka zabyo, mu duhaga no mu mibande.

Mu itangazo yasohoye, iyi Minisiteri yavuze    ko imirimo y’ihinga igomba kwihutishwa, gutera imbuto bigakorwa kare mu ntangiriro z’igihembwe cy’ihinga kugira ngo ibihingwa bizabashe kubona amazi ahagije y’imvura y’umuhindo.

Ku bijyanye no  gufata amazi y’imvura, yagize iti: “Hagendewe ku makuru y’iteganyagihe ry’amezi atatu (Nzeri-Ukuboza 2022), ateganya ko imvura izagabanyuka mu bice bimwe na bimwe by’Igihugu cyane cyane mu Ntara y’Iburasirazuba n’ibice by’ Amayaga, hagereranyijwe n’imvura isanzwe igwa mu bihe by’Umuhindo, muri ibyo bice, abahinzi barashishikarizwa guhinga ibihingwa byera vuba nk’ibishyimbo n’ibyihanganira imvura nkeya (imyumbati) kandi bakarushaho kwitabira gahunda ya Leta ya Nkunganire mu kuhira (SSIT), bakanongera imbaraga mu gufata amazi y’imvura ibonetse akazifashishwa igihe imvura ibaye nke”.

Kwitabira kurushaho ikoreshwa ry’imbuto z’indobanure n’ifumbire y’imvaruganda, hamwe n’ishwagara ikenerwa mu turere dufite ikibazo cy’ubusharire bw’ubutaka, binyuze muri gahunda ya Nkunganire na byo bizafasha kubyaza umusaruro iki gihembwe cy’ihinga.

Abahinzi barakangurirwa gukoresha imbuto nziza z’indobanure

Ibindi bigomba kwitabwaho ni  ukubagara imyaka kuko kutabagara bicura ibihingwa intungagihingwa bigatubya  umusaruro, no kongerera ibihingwa nk’ ibinyampeke ifumbire ya ire (urée) nyuma yo kubagara.

MINAGRI ivuga ko  kurushaho gukoresha ifumbire y’imborera ari  bumwe mu buryo bwo kongera umusaruro bwunganirana n’ifumbire y’imvaruganda no gukoresha andi moko y’amafumbire akoreshwa ku mababi (foliar fertilizers).

Iti: “Ubushakashatsi bwagaragaje ko iyo akoreshejwe hamwe n’ifumbire mvaruganda bitanga umusaruro mwiza kurushaho”.

Ikindi ni ukugenzura kenshi ibihingwa no kurwanya indwara n’ibyonnyi byagaragara mu murima kugira ngo bitazatubya umusaruro;  kwita ku bihingwa bihora mu mirima (perennial crops) nk’urutoki, ikawa, n’ibindi, harimo kubifumbira no kubiha isaso n’izindi nama z’abashinzwe iyamamazabuhinzi zigamije kuzamura umusaruro w’ibi bihingwa.

Ibi bigomba kugendana no kurwanya isuri hatunganywa imirwanyasuri ndetse hanaterwa ubwatsi bufata ubutaka n’ibiti ndumburabutaka ku miringoti, kandi hasiburwa imigende y’amazi mu bishanga; gutera ubwatsi bwo kugaburira amatungo no gutegura kare uburyo bwo kubuhunika.

Hiyongeraho kwitabira gahunda yo gukingira amatungo indwara zikunze kuyibasira muri iki gihe no kurushaho kwitabira gahunda y’ubwishingizi bw’ibihingwa n’amatungo kuri Nkunganire ya Leta nk’uburyo bufasha abahinzi n’aborozi guhangana n’ingaruka z’imihindagurikire y’ikirere.

MINAGRI irasaba ko habaho kwitegura hakiri kare uburyo bwo kuzafata neza umusaruro no kuwushakira amasoko hakiri kare, abahinzi n’aborozi bakaba bashishikarizwa kugirana amasezerano n’abaguzi.

Irasaba ubufatanye abahinzi n’aborozi, inzego z’ibanze n’abandi bafatanyabikorwa bose mu iterambere ry’ubuhinzi n’ubworozi mu gushyira mu bikorwa izi ngamba.

  • NTAWITONDA JEAN CLAUDE
  • Nzeri 27, 2022
  • Hashize imyaka 2
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE