MIGEPROF yerekanye uko umwana yaba umutware

  • Imvaho Nshya
  • Ugushyingo 21, 2023
  • Hashize amezi 6
Image

Minisiteri y’Uburinganire n’Iterambere ry’Umuryango (MIGEPROF) yagaragaje ko umwana ari umutware kandi ko bisaba uruhare rw’ubuyobozi by’umwihariko urw’ababyeyi bombi.

Byagarutsweho ejo ku wa Mbere tariki 20 Ugushyingo 2023, ubwo hizihizwaga umunsi mpuzamahanga w’umwana.

Ni umunsi wizihijwe hamurikwa imfashanyigisho ivuga ku burere budahutaza umwana yateguwe ku bufatanye na MIGEPROF, Ikigo cy’Igihugu Gishinzwe imikurire no kurengera umwana (NCDA) ndetse n’Ishami ry’Umuryango w’Abibumbye ryita ku bana UNICEF.

Dr Uwamariya Valentine, Minisitiri w’Uburinganire n’Iterambere ry’Umuryango, agaragaza ko imfashanyigisho yamuritswe yibutsa uruhare rwa buri wese mu burere bwiza bw’umwana.

Yavuze uko umwana yaba umutware. Yagize ati “Mu Kinyarwanda turavuga ngo umwana ni umutware, kuba umutware ni ukuvuga ko hari ibyo tumugomba nk’ubuyobozi ariko cyane cyane nk’ababyeyi bombi umugabo n’umugore.

Ni yo mpamvu mwabonye ko habayeho kugaragaza ziriya mfashanyigisho zigaragariza ababyeyi uko bagomba kwitwara no kurera abana ndetse no kubafasha mu mikurire yabo muri rusange naho umwana yahura n’ikibazo bakakibona hakiri kare umwana agahabwa ubuvuzi”.

Julianna Lindsey, uhagarariye Ishami ry’Umuryango w’Abibumbye ryita ku bana mu Rwanda (UNICEF), avuga ko bazakomeza gufatanya na Leta y’u Rwanda mu kwita ku burenganzira bw’umwana.

Ati “Twakoze akazi keza rwose hano mu Rwanda mu gushyigikira no guteza imbere uburenganzira bw’umwana dufatanyije na Leta y’u Rwanda, gusa haracyari byinshi tugomba gufatanya.

Murabizi ko hari bamwe mu bana uyu munsi batiga, turacyafite n’aho abana badafite ibyo kurya bihagije.

Icyiza Leta yabifatiye ingamba rero natwe twiteguye gukomeza gukorana na yo kugira ngo tubikemure burundu”.

Akariza Cyiza Kellen yishimira uburyo uburenganzira bwabo nk’abana bwitabwaho.

Agira ati “Icyizere tubasha kugirirwa, ni icyizere igihugu cyacu kitugirira aho mu burenganzira bw’umwana bashyiramo ko agomba kugira uruhare mu bimukorerwa”.

Akanyana Clarisse we yibutsa abakobwa bagenzi be ko hari ibishuko byinshi bibategereje hanze hano.

Ni ho ahera abasaba ko bigomba kwiyubaha. Ati “Abakobwa bagenzi banjye ikintu cya mbere bagomba gushyiramo imbaraga cyane, ni ukwiyubaha kuko utiyubashye nta wundi wakubaha, nutiha agaciro buri wese azakubona ati n’ubundu uyunguyu yataye umutwe usange ubuzima bwawe ubushyize ahabi”.

Kuri uyu munsi mpuzamahanga wahariwe umwana hagaragajwe impungenge z’uko hari abana 14% batanditse mu bitabo by’irangamimerere.

Ni mu gihe 95% bari ku ntebe y’ishuri. Ikindi kandi abana 3,000 bakuwe mu bigo byabareraga bashakirwa imiryango muri gahunda ya ‘Tubarerere mu muryango’.

Leta ivuga ko izakomeza gukora ibishoboka byose kugira ngo umwana abeho yishimye kandi uburenganzira bwe bwubahirizwa.

KAYITARE JEAN PAUL

  • Imvaho Nshya
  • Ugushyingo 21, 2023
  • Hashize amezi 6
TANGA IGITEKEREZO
Andika igitekerezo

AMATEGEKO AGENGA IYANDIKA RY'IGITEKEREZO CYAWE